།གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ལ་རྒྱགས་པ་མེད་ཅིང་གཡོ་མེད་ང་རྒྱལ་མེད། །དྲན་ལྡན་བློ་གྲོས་ལྡན་ཞིང་བློ་ལྡན་རྟོགས་དང་ལྡན། །ཡེ་ཤེས་མཐའ་ཡས་སྤྱོད་ཡུལ་ནམ་མཁའ་བཞིན་དུ་འགྱུར། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ཡི་འདུས་བྱས་ཉེས་པ་ཐམས་ཅད་རབ་ཏུ་ཆད། །ཤེས་རབ་ཡེ་ཤེས་ཐབས་དང་ཟུང་དུ་འབྲེལ་བར་འགྱུར། །བྱམས་དང་སྙིང་རྗེ་དག་ཀྱང་ཟུང་དུ་འབྲེལ་བར་འགྱུར། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ནི་སྨྲ་ཚེ་འཁྲུལ་པ་ཆུང་ཟད་མི་དམིགས་ཏེ། །བདག་ཉིད་ཆེ་དེ་སེམས་ཅན་རྣམས་ཀྱི་སྒྲ་སྐད་ཤེས། །སྤྱོད་དང་དབང་པོ་དང་ནི་མོས་པ་ཐམས་ཅད་ཤེས། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེས་ནི་ཆོས་ལ་ལྷག་མཐོང་དགེ་དང་དྲན་པ་དང་། །རྫུ་འཕྲུལ་དང་ནི་སྤང་དང་དབང་པོ་སྟོབས་ལྔ་དང་། །བྱང་ཆུབ་ཡན་ལག་དེ་བཞིན་ལམ་མཆོག་ཞི་གནས་འཐོབ། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ནི་བདེ་གཤེགས་རྣམས་ཀྱི་སྤྱོད་ཡུལ་རང་གིས་རྟོགས། །ཕ་རོལ་ཕྱིན་པ་དག་ནི་ཀུན་གྱི་ཕ་རོལ་སོན། །བསྡུ་བའི་དངོས་པོ་ཀུན་ལ་མཁས་ཤིང་བློ་གྲོས་ལྡན། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ལ་ནམ་ཡང་འཁྲུལ་པ་ཆུང་ཟད་མི་དམིགས་ཏེ། །ངེས་པ་དེ་ནི་ཞི་ཞིང་ཉེར་ཞི་མྱོས་པ་མེད། །དེ་ནི་སྤྱོད་ལ་རབ་ཏུ་གནས་གྱུར་ཤིན་ཏུ་དུལ། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ནི་བདེ་གཤེགས་སྤྱན་སྔར་པད་མའི་སྟེང་ན་འདུག །དེ་ཡི་ལུས་ནི་ཆོས་ཀྱི་རྒྱུས་བྱུང་རྡུལ་དང་བྲལ། །དེ་ཡི་ལུས་ལ་མངལ་གྱི་དྲི་མས་གོས་མི་འགྱུར། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ནི་རྒྱལ་བ་ཀུན་གྱིས་བྱིན་བརླབས་ཆོས་སྨྲ་སྟེ། །དེ་ནི་ལུས་དང་ངག་ཡིད་ལས་རྣམས་གང་བྱེད་པ། །ཐམས་ཅད་ཤེས་པས་བྱས་ཏེ་སྐྱེ་བོ་ཕན་པར་བྱེད། །གང་གིས་གཟུངས་ཀྱི་མཆོག་རྣམས་རབ་ཏུ་ཐོབ་གྱུར་པ། །དེ་ནི་སྨྲ་ཚེ་བསྔགས་པ་ཟད་པར་མི་འགྱུར་ཏེ། །སེམས་ཅན་ཐམས་ཅད་འདྲེན་པ་ཤེས་རབ་ཆེར་གྱུར་ཀྱང་། །དེ་ཡི་བསྔགས་པ་བསྐལ་པ་མང་པོར་བསམ་མི་ཁྱབ།།