སོ་སོ་ཅི་རིགས་པར་ཆོས་བསྟན་པ་ཤེས་པ་དང་ལྡན་པར་འགྱུར་ཏེ། རིགས་ཀྱི་བུ་འདི་ནི་སངས་རྒྱས་ཀྱི་རྒྱན་བྱིན་གྱིས་བརླབས་པའི་གཟུངས་གང་ཆུང་ཟད་གཞོལ་བའི་སྒོར་འཇུག་པ་ཞེས་བྱའོ། །གཟུངས་འདི་ནི་མི་ཟད་པ། ཐུག་པ་མེད་པའི་རྗེས་སུ་སོང་བ། དེ་བཞིན་གཤེགས་པའི་མཚམས་དང་བཅས་པ་དང་བསྟན་པ་ཚད་མེད་པའོ། །རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་གཟུངས་ནི་བརྒྱད་པོ་འདི་དག་སྟེ། གཟུངས་དེ་དག་ལ་རབ་ཏུ་གནས་པའི་བྱང་ཆུབ་སེམས་དཔའ་རྣམས་ནི་སངས་རྒྱས་ཐམས་ཅད་ཀྱིས་གསུངས་པ་ཀུན་དུ་འཛིན་ཏོ། །ཆོས་སྟོན་པ་ནི་མི་ཟད་པར་འགྱུར་རོ། །ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པར་འགྱུར་རོ། །དེ་ནས་དེའི་ཚེ་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོས་ཚིགས་སུ་བཅད་པ་འདི་དག་སྨྲས་སོ། །བདེ་གཤེགས་རྣམས་ཀྱིས་རབ་ཏུ་གསུངས་པའི་གཟུངས་བརྒྱད་པོ། །ཐེག་པ་འདིར་ནི་དེ་དག་རྣམ་པར་ངེས་ཐོབ་པ། །མདོ་སྡེ་བྱེ་བ་སྟོང་ཕྲག་ཐུག་པ་མེད་འཆད་ཀྱང་། །དེ་ནི་དོན་དང་ཚིག་འབྲུ་གང་ལའང་ཆགས་པ་མེད། །ཡིད་འོང་ཤིན་ཏུ་སྙན་ཅིང་ཆགས་པར་འགྱུར་བའི་དབྱངས། །བྱེ་བ་སྟོང་ཕྲག་ཚད་མེད་ཞིང་དུ་གོ་བྱེད་པ། །སེམས་ཅན་རྣམས་ཀྱིས་དེ་ཐོས་མྱ་ངན་འདས་པར་འགྲོ། །སྒྲ་དབྱངས་རྣམ་པར་དག་པའི་གཟུངས་འདི་ཐུག་པ་མེད། །ཡི་གེ་ཐམས་ཅད་ཤེས་པ་མཁས་པ་བློ་གྲོས་ལྡན། །བསྐལ་པ་མང་པོར་འཆད་ཀྱང་ཆོས་ལ་ཟད་པ་མེད། །རྩ་བའི་ཚིག་གཅིག་བརྗོད་པའང་ཟད་པར་མི་འགྱུར་ཏེ། །མི་ཟད་ཆོས་ཀྱི་ཟ་མ་ཏོག་འདི་དྲན་པ་ཡི། །གང་གིས་གཟུངས་ཐོབ་མཐའ་མར་ཐུག་པར་ཡོངས་བཅད་པ། །མཉམ་ཉིད་ཚུལ་བཞིན་ཆོས་ལ་སེམས་པ་བློ་གྲོས་ལྡན། །མཐར་འཛིན་ཐམས་ཅད་རྣམ་པར་སྤངས་ཏེ་ཡོངས་དག་པས། །ཁྱུ་མཆོག་གྱུར་པ་དེ་ནི་དབུས་ལ་གནས་མི་འགྱུར། །གང་གིས་མཚོ་ཆེན་ཕྱག་རྒྱའི་གཟུངས་ནི་རབ་ཐོབ་པ། །དེ་ཡི་ཁ་ནས་ཕྱག་རྒྱ་བསམ་ཡས་རྗོད་པ་ན། །གང་དག་གླིང་བཞི་གཟུགས་ཀྱི་རྣམ་པ་ཇི་སྙེད་པ། །དེ་དག་ཀུན་དང་རྒྱ་མཚོ་མཚོ་ཆེན་བཅས་མི་རྟོག །འཁོར་དུ་གལ་ཏེ་བདག་ཉིད་ཆེན་པོ་དེ་ཆོས་སྟོན། །ནམ་མཁའ་ལས་ནི་པད་མ་དག་གི་ཆར་ཆེན་འབབ། །