།འཁྱིལ་བ་མཐའ་ཡས་པའི་གཟུངས་འདི་ལ་རབ་ཏུ་གནས་པའི་བྱང་ཆུབ་སེམས་དཔའ་ནི་མཐའ་ཡས་པའི་རྗེས་སུ་སོང་། ཆོས་འཁྱིལ་བའི་རྗེས་སུ་སོང་བས་བསྐལ་པ་བརྒྱ་སྟོང་ཕྲག་མཐའ་ཡས་པར་ཆོས་སྟོན་ཀྱང་དོན་དང་ཚིག་འབྲུས་གཟུངས་ཀྱི་ཡེ་ཤེས་འདིའི་མཐར་མི་ཕྱིན་ཏོ། །འདི་ནི་འཁྱིལ་བ་མཐའ་ཡས་པའི་གཟུངས་ལ་གཞོལ་བར་འཇུག་པ་དང་། རྗེས་སུ་འགྲོ་བར་བསྟན་པ་དང་། ཡེ་ཤེས་ཀྱི་སྣང་བ་རྗེས་སུ་རྟོགས་པ་དང་། རྣམ་པར་དག་པའི་སྒོ་ལ་རབ་རིབ་མེད་པའི་ཡེ་ཤེས་ཀྱི་རྗེས་སུ་འགྲོ་བ་རྗེས་སུ་རྟོགས་པའོ། །རིགས་ཀྱི་བུ་དེ་ལ་རྒྱ་མཚོའི་ཕྱག་རྒྱའི་གཟུངས་གང་ཞེ་ན། རིགས་ཀྱི་བུ་འདི་ལྟ་སྟེ། དཔེར་ན་གླིང་བཞི་པ་ཆེན་པོའི་འཇིག་རྟེན་གྱི་ཁམས་ན་གང་དག་གཟུགས་སུ་སྣང་བ་དང་། སེམས་ཅན་གྱི་གཟུགས་སུ་སྣང་བའམ། རིའི་གཟུགས་སུ་སྣང་བའམ། ཤིང་གི་གཟུགས་སུ་སྣང་བའམ། རྩྭ་དང་། ཤིང་གེལ་པ་དང་། སྨན་དང་། ནགས་ཚལ་དང་། ལོ་ཏོག་གི་གཟུགས་སུ་སྣང་བའམ། ཟླ་བ་དང་། ཉི་མ་དང་། སྐར་མ་དང་། ནོར་བུ་དང་། སྤྲིན་དང་། མེ་དང་། གློག་གི་གཟུགས་སུ་སྣང་བའམ། གྲོང་དང་། གྲོང་ཁྱེར་དང་། གྲོང་རྡལ་གྱི་དབྱིབས་ཀྱི་གཟུགས་སུ་སྣང་བའམ། གཞལ་མེད་ཁང་དང་ལོངས་སྤྱོད་ཀྱི་གཟུགས་སུ་སྣང་བའམ། སྐྱེད་མོས་ཚལ་དང་། ཆུ་མིག་དང་། མཚེའུ་དང་། ལྟེང་ཀ་དང་། འབབ་ཆུའི་གཟུགས་སུ་སྣང་བའམ། ཉེ་བར་སྤྱོད་པའམ། ཡོངས་སུ་སྤྱོད་པ་ཐམས་ཅད་ཀྱི་གཟུགས་སུ་སྣང་བ་ངན་པ་དང་། འབྲིང་དང་། རབ་དང་། གཟུགས་སུ་སྣང་བ་དེ་དག་ཐམས་ཅད་རྒྱ་མཚོ་ཆེན་པོ་ལ་རྒྱ་དང་བཅས་པར་མི་ཉུང་། མི་མང་། ལྷག་པ་མེད་པས་དེའི་ཕྱིར་རྒྱ་མཚོ་ཆེན་པོ་ཞེས་བྱའོ། །རིགས་ཀྱི་བུ་དེ་བཞིན་དུ་རྒྱ་མཚོའི་ཕྱག་རྒྱའི་གཟུངས་ལ་རབ་ཏུ་གནས་པའི་བྱང་ཆུབ་སེམས་དཔའ་ཡང་སེམས་ཅན་ཐམས་ཅད་ལ་ལུས་རྒྱ་དང་མཚུངས་པ་ཡིན་ནོ། །སེམས་ཅན་ཐམས་ཅད་ལ་ངག་རྒྱ་དང་མཚུངས་པ་ཡིན་ནོ། །སེམས་ཅན་ཐམས་ཅད་ལ་སེམས་རྒྱ་དང་མཚུངས་པ་ཡིན་ནོ། །ཕྱོགས་བཅུ་དག་ན་སངས་རྒྱས་བཅོམ་ལྡན་འདས་ཆོས་སྟོན་པའི་གསུང་གི་འཕྲིན་ལས་ཇི་སྙེད་འཇུག་པ་དེ་དག་བྱང་ཆུབ་སེམས་དཔའ་དེའི་ཁའི་སྒོ་ནས་ཕྱག་རྒྱས་བཏབ་པ་དང་མཚུངས་པར་འབྱུང་ངོ་།