།སྐྱེས་བུ་དམ་པ་ཁྱོད་ཀྱིས་སྣོད་འདི་ལྟ་བུ་འདིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་རིན་པོ་ཆེ་བཀོད་པ་ཆེན་པོ་མ་སྐམས་པ། མ་རྙིངས་པ་འདི་འཛིན་པར་ནུས་སམ། དེ་ནས་བདུད་རྣམ་པར་འཕྲུལ་པས་བཅོམ་ལྡན་འདས་ལ་ཕྱག་འཚལ་ཏེ། ཚིག་འདི་སྐད་ཀྱང་སྨྲས་སོ། །བཅོམ་ལྡན་འདས་བདག་གིས་སྔོན་ཆད་སྐྱེས་བུ་དམ་པ་འདི་ཡང་མ་མཐོང་ངོ་། །ཆོས་ཀྱི་རྣམ་གྲངས་འདིའང་མ་ཐོས་པས་ཅི་བདག་ཉན་ཐོས་ཀྱི་ཐེག་པས་མྱུར་དུ་ཡོངས་སུ་མྱ་ངན་ལས་འདས་པར་བགྱིའམ་སྙམ་པ་ལས། དེང་བདག་གིས་ཆོས་ཀྱི་རྣམ་གྲངས་འདིའང་ཐོས། བྱང་ཆུབ་སེམས་དཔའ་ཆོས་ཐམས་ཅད་རྣམ་པར་འཕྲུལ་པའི་རྣམ་པར་སྤྲུལ་པའི་བྱིན་གྱི་རླབས་འདི་ཡང་མཐོང་བས་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །བཅོམ་ལྡན་འདས་གལ་ཏེ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་སེམས་ཅན་དམྱལ་བ་ཆེན་པོར་བསྲེགས་ལ། དེའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་དུ་ལགས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལྟ་བུ་ཡོངས་སུ་མི་གཏོང་ངོ་། །དེ་ནས་བཅོམ་ལྡན་འདས་ཀྱིས་བདུད་རྣམ་པར་འཕྲུལ་པ་ལ་ལེགས་སོ་ཞེས་བྱ་བ་གནང་སྟེ། སྐྱེས་བུ་དམ་པ་ཁྱོད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གོ་ཆ་བགོས་པ་དང་། རྣམ་པར་སྤྲུལ་པའི་བྱིན་གྱི་རླབས་འདི་ལྟ་བུ་དང་ལྡན་པར་འགྱུར་བ་ལེགས་སོ་ལེགས་སོ། །དེ་ནས་བྱང་ཆུབ་སེམས་དཔའ་སེང་གེའི་ཏོག་ཅེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོ་ལ་འདི་སྐད་ཅེས་སྨྲས་སོ། །རིགས་ཀྱི་བུ་བྱང་ཆུབ་སེམས་དཔའ་དག་གཟུངས་གང་ལ་རབ་ཏུ་གནས་ན་སངས་རྒྱས་ཐམས་ཅད་ཀྱིས་གསུངས་པ་ཀུན་དུ་འཛིན་པ་དང་། ཆོས་བསྟན་པ་ན་ཟད་པར་མི་འགྱུར་བ་དང་། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པར་འགྱུར་བ་བྱང་ཆུབ་སེམས་དཔའ་རྣམས་ཀྱི་གཟུངས་གང་ཡིན། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་གཟུངས་ཀྱི་དབང་ཕྱུག་གི་རྒྱལ་པོས་བྱང་ཆུབ་སེམས་དཔའ་སེང་གེའི་ཏོག་ལ་འདི་སྐད་ཅེས་སྨྲས་སོ།