ཨ་ཏི་མུག་ཏ་ཀ་དང་། ཙམ་པ་ཀ་དང་། མྱ་ངན་འཚང་དང་། དྷ་ནུ་སྐ་རི་དང་། སྐྱ་སྣར་དང་། མེ་ཏོག་བཏང་བཟུང་དག་ཀྱང་གཏོར་ཏོ། །སིལ་སྙན་དང་ཕེག་རྡོབ་པ་དག་ཀྱང་ཀུན་དུ་ཡང་དག་པར་སྦྱར་བ་ལ་འདི་ལྟ་སྟེ། ཕེག་རྡོབ་པ་དང་། གླིང་བུ་དང་། རྔ་བོ་ཆེ་དང་། དུང་དང་། རྫ་རྔ་དང་། འཁར་རྔ་དང་། སིལ་སྙན་དང་། གླུ་དབྱངས་རྣམ་པ་སྣ་ཚོགས་ཀྱང་བྱས་སོ། །སྤོས་ཀྱི་ཆར་དང་། ཕྱེ་མའི་ཆར་དང་། རིན་པོ་ཆེའི་ཆར་དང་། རྒྱན་གྱི་ཆར་དང་། མུ་ཏིག་གི་རྒྱན་ཕྲེང་གི་ཆར་དང་། གོས་ཀྱི་ཆར་དང་། སིལ་སྙན་དང་། རོལ་མོའི་སྒྲའི་ཆར་ཡང་མངོན་པར་ཕབ་བོ། །བྱང་ཆུབ་སེམས་དཔའ་གང་དག་ཕྱོགས་བཅུའི་འཇིག་རྟེན་གྱི་ཁམས་སྣ་ཚོགས་ནས་འདུས་པ་དེ་དག་སྟེང་གི་བར་སྣང་ལ་མངོན་པར་འཕགས་ཏེ། བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་རང་རང་གི་ལུས་བོར་རོ། །བྱང་ཆུབ་སེམས་དཔའ་དེ་དག་གིས་ལུས་བོར་མ་ཐག་ཏུ་དེ་ནས་སྟེང་གི་བར་སྣང་ལ་ཐམས་ཅད་དང་ལྡན་པའི་འཁོར་གྱི་ཁྱམས་རིན་པོ་ཆེ་བཀོད་པ་ཁེབས་པར་བྱས་ཏེ། རིན་པོ་ཆེའི་དྲ་བ་མུ་ཏིག་གི་རྒྱན་ཕྲེང་དུ་མ་དཔྱངས་པ། ཀུན་ནས་མིག་མངས་རིས་སུ་བྲིས་པ། ཤིན་ཏུ་ཡོངས་སུ་ལས་སུ་བྱས་པ། དྲིལ་བུ་གཡེར་ཀའི་དྲ་བས་མཛེས་པར་བྱས་པ། རིན་པོ་ཆེའི་པད་མས་སྤྲས་པ་བྱུང་བར་གྱུར་ཏོ། །མུ་ཏིག་གི་རྒྱན་ཕྲེང་དེ་དག་གི་མུ་ཏིག་གི་འབྲུ་རེ་རེ་ལས་ཀྱང་བྱང་ཆུབ་སེམས་དཔའི་ལུས་དཔག་ཏུ་མེད་ཅིང་གྲངས་མེད་པ་དག་བྱུང་བར་ཀུན་དུ་སྣང་ངོ་། །དེ་དག་བྱུང་ནས་བཅོམ་ལྡན་འདས་ལ་ལན་བདུན་བསྐོར་བ་བྱས་ཏེ། རིན་པོ་ཆེ་བཀོད་པའི་པད་མའི་སེང་གེའི་ཁྲི་དེ་དག་ལ་འཁོད་དོ། །ཕྱོགས་བཅུའི་སངས་རྒྱས་ཀྱི་ཞིང་ཚད་མེད་པ་ནས་སངས་རྒྱས་བཅོམ་ལྡན་འདས་ཚད་མེད་པ་དག་གིས་ཆོས་ཀྱི་རྣམ་གྲངས་འདི་ལ་མཆོད་པའི་ལས་ཀྱི་ཕྱིར་དེ་བཞིན་གཤེགས་པ་རེ་རེས་ཀྱང་བསྐལ་པར་བརྗོད་པ་ཡོངས་སུ་ཐུག་པ་མེད་པ་ཞེས་བྱ་བའི་མཆོད་པ་བཀོད་པ་བསྒྲུབས་ཏེ་འཇིག་རྟེན་གྱི་ཁམས་མི་མཇེད་འདིར་བཏང་བ་དང་། སངས་རྒྱས་ཀྱི་མཐུས་བཀོད་པ་དེ་དག་འཇིག་རྟེན་གྱི་ཁམས་མི་མཇེད་འདིར་ཕྱིན་ཏེ། དེ་དག་གིས་འཁོར་གྱི་ཁྱམས་རིན་པོ་ཆེ་བཀོད་པ་ལ་རྒྱན་གྱི་མཆོག་གིས་བརྒྱན་པར་གྱུར་ཏོ།