བསམ་པ་སྣ་ཚོགས་རྣམས་ཀྱང་རབ་ཏུ་མཁྱེན་ཏོ། །སེམས་ཀྱི་རྒྱུད་ཀྱང་རབ་ཏུ་མཁྱེན་ཏོ། །སེམས་གང་གི་འོག་ཏུ་སེམས་གང་བྱུང་བ་དེ་དག་ཐམས་ཅད་ཀྱང་དེ་བཞིན་གཤེགས་པས་མངོན་སུམ་གྱི་ཤེས་པ་དང་རྗེས་སུ་རྟོགས་པའི་ཤེས་པས་བགྲང་བའི་ཚུལ་གྱིས་རབ་ཏུ་མཁྱེན་ཏེ། དེ་དང་དེ་བཞིན་གཤེགས་པའི་སེམས་ཀྱི་རྒྱུད་འདས་པ་བཏང་བ་རྣམས་ཀྱང་དམིགས་སོ། །དེ་བཞིན་གཤེགས་པ་ནི་ཡེ་ཤེས་དེ་ལྟ་བུ་དང་ལྡན་པས་སེམས་ཅན་རྣམས་ལ་བསམ་པ་ཇི་ལྟ་བ་བཞིན་དུ་ཕྱད་པར་ཆོས་སྟོན་ཏེ། འདི་ནི་དེ་བཞིན་གཤེགས་པའི་དེ་བཞིན་གཤེགས་པའི་འཕྲིན་ལས་སུམ་ཅུ་པའོ། །དེ་ལ་འདི་སྐད་ཅེས་བྱའོ། །ཞིང་དང་སེམས་ཅན་དང་ནི་ཆོས་སྨྲ་ལ། །སངས་རྒྱས་ཡེ་ཤེས་ཆགས་མེད་ཚད་ཀྱང་མེད། །འདྲེན་པས་སེམས་ཅན་གང་དག་ཐར་བྱས་དང་། །ཞིང་དུ་དགེ་སློང་དགེ་འདུན་གྱུར་གྲངས་དང་། །སེམས་ཅན་བསམ་པ་དབང་པོ་གང་ཡིན་དང་། །དབྱིབས་དང་སྒྲ་ཡི་རིམ་པ་གང་དང་སེམས། །མིང་དང་སྦྱོར་བ་གང་དག་འདས་པ་ཀུན། །རྫོགས་པའི་སངས་རྒྱས་ཡང་དག་གཟིགས་པས་རྟོགས། །རིགས་ཀྱི་བུ་གཞན་ཡང་མ་འོངས་པའི་དུས་ལ་དེ་བཞིན་གཤེགས་པའི་ཡེ་ཤེས་མཐོང་བ་ཆགས་པ་མེད་ཅིང་ཐོགས་པ་མེད་པ་འཇུག་གོ། །ཇི་ལྟར་འཇུག་ཅེ་ན། སེམས་ཅན་ནམ། ཆོས་སམ། ཞིང་གང་དག་ཁ་ཅིག་མ་འོངས་པའི་དུས་ན་འབྱུང་བའམ། འགག་པའམ། འབྱུང་བར་འགྱུར་བའམ། འཇིག་པར་འགྱུར་བ་དེ་དག་ཐམས་ཅད་དེ་བཞིན་གཤེགས་པས་རབ་ཏུ་མཁྱེན་ཏོ། །བསྐལ་པའི་མེས་ཚིག་པར་འགྱུར་བ་ཇི་སྙེད་པ་དང་། ཆུས་འཇིག་པར་འགྱུར་བ་ཇི་སྙེད་པ་དང་། སངས་རྒྱས་ཀྱི་ཞིང་གནས་པར་འགྱུར་བ་ཇི་སྙེད་པ་དང་། སངས་རྒྱས་ཀྱི་ཞིང་དེ་དག་ན་སའི་ཁམས་སུ་འགྱུར་བ་ཇི་སྙེད་པ་དང་། རྡུལ་ཕྲ་རབ་ཀྱི་རྡུལ་དུ་འགྱུར་བ་ཇི་སྙེད་པ་དང་། རྩྭ་དང་། ཤིང་གེལ་བ་དང་། སྨན་དང་། ནགས་ཚལ་དུ་འགྱུར་བ་ཇི་སྙེད་པ་དང་། སྐར་མའི་གཟུགས་སུ་འགྱུར་བ་ཇི་སྙེད་པ་དང་། ཞིང་རབ་འབྱམ་རེ་རེར་སངས་རྒྱས་འབྱུང་བར་འགྱུར་བ་ཇི་སྙེད་པ་དང་། ཉན་ཐོས་འབྱུང་བར་འགྱུར་བ་ཇི་སྙེད་པ་དང་། རང་སངས་རྒྱས་འབྱུང་བར་འགྱུར་བ་ཇི་སྙེད་པ་དང་།