།ཇི་ལྟར་དེ་ལ་ཅ་ཅོ་མེད་པ་དེ་བཞིན་དུ་སེམས་ཅན་ཐམས་ཅད་ཀྱི་ཅ་ཅོ་ཐམས་ཅད་སྤང་བའི་ཕྱིར་ཆོས་སྟོན་ཏེ། འདི་ནི་དེ་བཞིན་གཤེགས་པའི་དེ་བཞིན་གཤེགས་པའི་འཕྲིན་ལས་བཅུ་དྲུག་པའོ། །དེ་ལ་འདི་སྐད་ཅེས་བྱའོ། །བསྔགས་པ་ཐོས་ཀྱང་མ་ཐོས་པར་སེམས་པ་མེད། །མི་བསྔགས་ཐོས་ཀྱང་སྲོ་ཤིར་མི་འགྱུར་ཏེ། །རྗེས་སུ་འཆགས་དང་ཁོང་ཁྲོར་འགྱུར་བ་མེད། །སྔོན་སྤྱོད་ལེགས་པར་སྤྱད་པ་སྨད་པ་མིན། །རྒྱལ་བས་ཉོན་མོངས་མེད་པ་རྟག་ཏུ་བསྒོམས། །དེ་ལ་ང་ཡི་མེད་ཅིང་འཛིན་མདུད་མེད། །ཇི་ལྟར་གནས་པ་དེ་ལྟར་ཆོས་སྟོན་ཏེ། །འདི་ནི་བདེན་པ་མཐོང་བའི་ལམ་གྱི་མཆོག །རིགས་ཀྱི་བུ་གཞན་ཡང་བསྙེལ་བ་གང་གིས་ཆོས་གང་ལ་ཡང་རྨོངས་པར་འགྱུར་བའི་བསྙེལ་བ་དེ་བཞིན་གཤེགས་པ་ལ་མེད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ཐམས་ཅད་ལ་བསྙེལ་བ་མེད་དོ། །དེ་བཞིན་གཤེགས་པ་ནི་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང་། གཡོ་བ་ལ་རྣམ་པར་ལྟ་ཞིང་སོ་སོ་ཅི་རིགས་པར་ཆོས་སྟོན་པ་ལ་བསྙེལ་བ་མེད་དོ། །དེ་བཞིན་གཤེགས་པ་ནི་དོན་དང་། ཆོས་དང་། ངེས་པའི་ཚིག་དང་། སྤོབས་པ་སོ་སོ་ཡང་དག་པར་རིག་པ་རྣམས་ལ་བསྙེལ་བ་མེད་དོ། །དེ་བཞིན་གཤེགས་པ་ནི་འདས་པ་དང་། མ་འོངས་པ་དང་། ད་ལྟར་བྱུང་བ་ལ་ཆགས་པ་མེད་པའི་ཡེ་ཤེས་མཐོང་བ་ལ་བསྙེལ་བ་མེད་དོ། །དེ་བཞིན་གཤེགས་པ་ཇི་ལྟར་བདག་བསྙེལ་བ་མེད་པ་དེ་ལྟར་སེམས་ཅན་ཐམས་ཅད་བརྗེད་པར་མི་འགྱུར་བར་ཆོས་སྟོན་ཏེ། འདི་ནི་དེ་བཞིན་གཤེགས་པའི་དེ་བཞིན་གཤེགས་པའི་འཕྲིན་ལས་བཅུ་བདུན་པའོ། །དེ་ལ་འདི་སྐད་ཅེས་བྱའོ། །ཆོས་དང་ཡེ་ཤེས་རྣམ་ཐར་སྤྱོད་ཡུལ་ལ། །རྣམ་པར་འདྲེན་པ་བསྙེལ་བ་མེད་པ་སྟེ། །བསམ་པ་ཇི་བཞིན་ཆོས་རྣམས་བསྟན་པའི་ཕྱིར། །སེམས་ཅན་བསམ་པ་རྣམས་ལ་སྤྱོད་མཐའ་ཡས། །སོ་སོ་ཡང་དག་རིག་ལ་བསྙེལ་བ་མེད། །དུས་གསུམ་ལ་ནི་ཡེ་ཤེས་བསྒྲིབས་པ་མེད། །ཇི་ལྟར་མི་བསྙེལ་དེ་ལྟར་ཆོས་སྟོན་ཏེ། །འདི་ནི་སྐྱེས་མཆོག་རྣམས་ཀྱི་འཕྲིན་ལས་ཡིན། །རིགས་ཀྱི་བུ་གཞན་ཡང་དེ་བཞིན་གཤེགས་པ་ལ་སེམས་མཉམ་པར་མ་བཞག་པ་མེད་དོ།