།ལྟ་བའི་ཟག་པ་རྣམས་ལས་དེ་བཞིན་གཤེགས་པའི་སེམས་རྣམ་པར་གྲོལ་བས་ཉོན་མོངས་པ་ལ་སྤྱོད་པའི་བག་ཆགས་ཐམས་ཅད་ལེགས་པར་བཅོམ་སྟེ། དེའི་ཕྱིར་འཇིག་རྟེན་གྱི་ཀུན་རྫོབ་ཉེ་བར་བཟུང་ནས་དེ་བཞིན་གཤེགས་པ་ཟག་པ་ཟད་པ་ཞེས་བྱའོ། །དོན་དམ་པར་ན་ནི་འཕགས་པའི་ཤེས་རབ་དང་ཡེ་ཤེས་ཀྱི་མདུན་ན་གང་ཡོངས་སུ་ཤེས་པར་བྱ་བའམ་སྤང་བར་བྱ་བའམ། བསྒོམ་པར་བྱ་བའམ་མངོན་སུམ་དུ་བྱ་བར་འགྱུར་བའི་ཆོས་གང་ཡང་མི་གནས་སོ། །དེ་ཅིའི་ཕྱིར་ཞེ་ན། གང་ཟད་པ་ཞེས་བྱ་བ་དེ་ནི་ནམ་དུ་ཡང་མི་ཟད་པ་ཡིན་ནོ། །དེ་ནི་ཤིན་ཏུ་ཟད་པ་ཉིད་ཡིན་གྱི་གཉེན་པོས་ཟད་པ་ཞེས་ནི་མི་བྱ་སྟེ། དེ་ནི་ཇི་ལྟ་བ་བཞིན་དུ་ཟད་པའོ། །ཇི་ལྟ་བ་བཞིན་དུ་ཟད་པ་གང་ཡིན་པ་དེ་ལ་ཟད་པ་གང་ཡང་མེད་དོ། །གང་ལ་ཟད་པ་གང་ཡང་མེད་པ་དེ་འདུས་མ་བྱས་པའོ། །འདུས་མ་བྱས་པ་གང་ཡིན་པ་དེ་ལ་སྐྱེ་བ་མེད། འཇིག་པ་མེད། གནས་པ་མེད་དེ། དེའི་ཕྱིར་དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་སྟེ། ཆོས་ཉིད་དང་ཆོས་ཀྱི་དབྱིངས་དེ་ནི་གནས་པ་ཉིད་དོ། །ཆོས་ཀྱི་དབྱིངས་དེ་ཇི་ལྟར་གནས་པ་དེ་བཞིན་དུ་དེ་ལ་ཡེ་ཤེས་ཞུགས་ཏེ། ཇི་ལྟར་འཇུག་པ་མེད་པ་དང་། ལྡོག་པ་མེད་པ་དེ་ལྟར་ཞུགས་སོ། །དེ་ལྟ་བུའི་ཆོས་ཀྱི་ཚུལ་གྱིས་ཟག་པ་དང་། ཟག་པ་སྤོང་བ་མི་དམིགས་ཏེ། དེ་བཞིན་གཤེགས་པ་ནི་ཐུགས་རྗེ་ཆེན་པོ་ལ་གནས་ནས་སེམས་ཅན་རྣམས་ཀྱི་ཟག་པ་སྤང་བའི་ཕྱིར་སེམས་ཅན་རྣམས་ལ་ཆོས་སྟོན་ཏེ། འདི་ནི་དེ་བཞིན་གཤེགས་པའི་དེ་བཞིན་གཤེགས་པའི་འཕྲིན་ལས་བཅུ་གཉིས་པའོ། །དེ་ལ་འདི་སྐད་ཅེས་བྱའོ། །རྒྱལ་བས་འདོད་པའི་ཟག་པ་སྤངས་པས་ན། འདོད་ཆགས་བག་ཆགས་ཕྱིས་ནི་ཡོད་མ་ཡིན། །མི་དབང་སྲིད་པ་ཀུན་ལས་རྣམ་གྲོལ་བས། །དེ་ཡི་ཉེས་པ་མ་ལུས་ཡང་དག་འཆད། །བདེ་གཤེགས་རིག་པ་ཀུན་ལ་གནས་པས་ན། །དེ་ཡི་གཏི་མུག་ལྷག་མ་མ་ལུས་བྲལ། །མི་ཡི་སེང་གེ་ལྟ་བ་ཀུན་དང་བྲལ། །དེས་ནི་ཉོན་མོངས་སྤྱོད་པའི་བག་ཆགས་མེད། །ཀུན་གྱིས་ཟག་པ་ཟད་པ་འཐོབ་འགྱུར་བར། །རྒྱལ་བ་ཀུན་རྫོབ་ཏུ་ནི་ཆོས་སྟོན་ཏོ། །གང་ཞིག་འཕེལ་བ་དང་ནི་ཟད་འགྱུར་བ། །ཆོས་དེ་དམ་པའི་དོན་དུ་ཡོད་མ་ཡིན། །ཟད་པ་གཉེན་པོས་ཟད་པ་མ་ཡིན་ཏེ། །