Degé Kangyur volume 57, F.36.b

རིགས་ཀྱི་བུ་ཁྱོད་ཀྱང་ཆོས་ཐམས་ཅད་ཀྱི་དབང་ཕྱུག་གི་རྒྱལ་པོ་ཡིན་གྱིས་བདག་ལ་མ་གསུང་ཤིག །​ཡང་རིགས་ཀྱི་བུ་ཁྱོད་ནི་སྟོང་པ་ཉིད་ལ་གནས་པའི་ཏིང་ངེ་འཛིན་བསམ་གྱིས་མི་ཁྱབ་པ་དང་ལྡན་པའོ། །​དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོར་མོ་བཅུའི་ཐལ་མོ་སྦྱར་ཏེ་ཕྱག་འཚལ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །​ཀྱེ་རྒྱལ་བའི་སྲས་ཁྱོད་ཀྱིས་བདག་ལ་སྐབས་ཕྱེ་ན་ཁྱོད་ལ་བདག་ཡི་གེ་འབྲུ་གཉིས་ཤིག་འདྲིའོ། །​བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། རིགས་ཀྱི་བུ་དེའི་དུས་ལ་དབབ་པར་ཤེས་ན་དྲིས་ཤིག །​དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །​ཀྱེ་རྒྱལ་བའི་སྲས་སངས་རྒྱས་སངས་རྒྱས་ཞེས་བྱ་བའི་གཞིའི་དོན་གང་ཡིན། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། ཀྱེ་རྒྱལ་བའི་སྲས་སངས་རྒྱས་ཀྱི་གཞིའི་དོན་ནི་གཞི་མེད་པའི་དོན་ཏོ། །​སངས་རྒྱས་ཀྱི་གཞིའི་དོན་ནི་དངོས་པོ་མེད་པའི་དོན་ཏོ། །​སངས་རྒྱས་ཀྱི་གཞིའི་དོན་ནི་བསམ་གྱིས་མི་ཁྱབ་པའི་དོན་ཏོ། །​སངས་རྒྱས་ཀྱི་གཞིའི་དོན་ནི་མི་མཉམ་པ་དང་མཉམ་པའི་དོན་ཏོ། །​སངས་རྒྱས་ཀྱི་གཞིའི་དོན་ནི་སྤྲོས་པ་མེད་པའི་དོན་ཏོ། །​སངས་རྒྱས་ཀྱི་གཞིའི་དོན་ནི་མ་སྤྲོས་པའི་དོན་ཏོ། །​སངས་རྒྱས་ཀྱི་གཞིའི་དོན་ནི་བླང་བ་མེད་པའི་དོན་ཏོ། །​སངས་རྒྱས་ཀྱི་གཞིའི་དོན་ནི་དོར་བ་མེད་པའི་དོན་ཏོ། །​སངས་རྒྱས་ཀྱི་གཞིའི་དོན་ནི་ནམ་མཁའ་དང་མཚུངས་པའི་དོན་ཏོ། །སངས་རྒྱས་ཀྱི་གཞིའི་དོན་ནི་བསྙད་དུ་མེད་པའི་དོན་ཏེ། རིགས་ཀྱི་བུ་སངས་རྒྱས་ཀྱི་ཆོས་རྣམས་ཀྱི་རང་བཞིན་ནི་དེ་ལྟ་བུ་ཡིན་ནོ། །​འཇམ་དཔལ་གྱིས་སྨྲས་པ། ཀྱེ་རྒྱལ་བའི་སྲས་གལ་ཏེ་ཆོས་ཐམས་ཅད་སྤྲོས་པ་མེད་པ་ཡིན་ན། འོ་ན་སངས་རྒྱས་ཀྱི་ཆོས་རྣམས་ཤེས་ཇི་སྐད་བསྟན། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། ཀྱེ་རྒྱལ་བའི་སྲས་བསྟན་པ་འདི་ནི་བསྟན་དུ་མེད་པའོ། །​འཇམ་དཔལ་གྱིས་སྨྲས་པ། ཀྱེ་རྒྱལ་བའི་སྲས་བསྟན་དུ་མེད་ན་ཅི་ཞིག་བསྟན། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། འཇམ་དཔལ་བསྟན་དུ་མེད་པ་ནི་བཏགས་ཏེ་བསྟན་ཏོ།



The English translation of this folio by 84000 - Translating the words of the Buddha can be found at:
https://read.84000.co/translation/toh145.html?part=UT22084-057-004-2579#UT22084-057-004-2579