ཡིད་ཆེས་པའི་རྣམ་པ་དང་། འགྱུར་བའི་རྣམ་པ་དང་། མངོན་པར་དགའ་བའི་རྣམ་པའོ། །གསོལ་པ། བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་སླད་དུ་ཐེག་པ་ཆེན་པོ་ལ་དད་པ་ཡིད་ཆེས་པའི་རྣམ་པས་འཇུག་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་ཟབ་ཅིང་རྒྱ་ཆེ་བའི་ཆོས་བསྟན་པ་རྣམས་ལ་ཐོག་མ་ཉིད་དུ་ཡོད་པར་མོས་སོ། །དེ་ཅིའི་ཕྱིར་ཞེ་ན། འདི་ལྟར་ཆོས་འདི་དག་ནི་དེ་བཞིན་གཤེགས་པ་ཉིད་ཀྱི་ཡུལ་དེ་བཞིན་གཤེགས་པ་ཉིད་ཀྱིས་གསུངས་པར་འོས་པའོ། །དེ་བས་ན་དེ་བཞིན་གཤེགས་པ་རྣམས་ཉིད་ཀྱིས་མངོན་པར་རྫོགས་པར་སངས་རྒྱས་ཏེ་རྟོག་གེ་པ་རྣམས་ཀྱི་ཡུལ་མ་ཡིན་ནོ། །འདི་ལྟར་རྟོག་གེ་པ་རྣམས་ནི་ཟབ་ཅིང་རྒྱ་ཆེ་བའི་ཆོས་འདི་ལྟ་བུ་དག་ཐོས་ན་དངང་བར་གྱུར་ཏེ་རྟོགས་པར་ལྟ་བ་ག་ལ་འགྱུར། དེ་བས་ན་དེ་དག་ནི་རྟོག་གེ་པ་རྣམས་ཀྱི་ཡུལ་མ་ཡིན་ནོ། །སངས་རྒྱས་རྣམས་ཀྱི་བྱང་ཆུབ་ཇི་ལྟར་དེ་དག་གིས་བསྟན་པའི་ཆོས་དེ་དག་ཀྱང་དེ་བཞིན་དུ་ཡོད་དེ། དེའི་ཕྱིར་སངས་རྒྱས་བཅོམ་ལྡན་འདས་དེ་དག་གི་ཆོས་བསྟན་པ་ཟབ་ཅིང་རྒྱ་ཆེ་བ་འབྲས་བུ་དང་བཅས་པ་ལ་ཡོད་པ་ཉིད་དུ་མོས་ནས་བྱང་ཆུབ་སེམས་དཔའ་ཡིད་ཆེས་པའི་རྣམ་པས་དད་པ་སྐྱེད་དོ། །གསོལ་པ། བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་སླད་དུ་ཐེག་པ་ཆེན་པོ་ལ་དད་པར་འགྱུར་བའི་རྣམ་པས་འཇུག་པ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་ཟབ་ཅིང་རྒྱ་ཆེ་བའི་ཆོས་ཡོད་པ་ཡོན་ཏན་དང་ལྡན་པ་དག་ལ་རྣམ་པ་དུ་མར་མོས་ཤིང་ལུས་ཀྱི་འགྱུར་བ་དང་། སེམས་ཀྱི་འགྱུར་བ་དང་བཅས་པར་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེད་དོ། །གསོལ་པ། བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ལས་བྱུང་བའི་ལུས་ཀྱི་འགྱུར་བ་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སྤུ་ལྡང་བ་དང་། སྤུ་གཡོ་བ་དང་། མཆི་མ་འཁོར་བ་དང་། མཆི་མ་ཟག་པ་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ལས་བྱུང་བའི་ལུས་ཀྱི་འགྱུར་བའོ།