Degé Kangyur volume 55, F.241.b

བས་མཐར་དགའ་ཞིང་དགོན་དབེན་སྤྱོད་ཡུལ་བ། །​ཚིག་ཙམ་མ་ཡིན་ཟབ་མོ་བཟོད་པ་དང་། །​བསེ་ལྟ་བུ་དང་ཤེས་ཁེ་བདེ་བསྲིངས་པ། །​དེ་ནི་བྱང་ཆུབ་འཇིག་པར་འགྱུར་བ་སྲུང་། །​ཚོགས་ལས་བསྲིངས་ཤིང་རབ་ཏུ་ཞི་ལ་མོས། །​རི་དགས་ལྟ་བུར་འཇིགས་ཤིང་གནས་མེད་རྒྱུ། །​ནམ་མཁའ་རླུང་བཞིན་རྙེད་ལ་མི་ཆགས་པ། །​དེ་འདྲ་དེ་ནི་རྒྱལ་བའི་ཆོས་འཛིན་ཡིན། །​ལུས་ལ་མི་ལྟ་སྲོག་དོན་མི་གཉེར་ན། །​ཤེས་ཀྱི་ཁེ་འདོད་པར་ལྟ་ག་ལ་འགྱུར། །​བརྩོན་བརྩམས་བདག་གི་མ་ཡིན་ཅི་ཡང་མིན། །​དེ་ནི་མ་འོངས་དུས་ན་བྱང་ཆུབ་སྣོད། །​ཕྱི་མའི་དུས་ན་སེམས་ཅན་འབྱུང་བ་ནི། །​བདག་ཅག་བྱང་ཆུབ་ལ་ནི་སྤྱོད་ཅེས་འཛེར། །​དེ་དག་སེམས་རྒོད་ཚུལ་འཆོས་ཉོན་མོངས་བཅས། །​དེ་དག་རྣམས་ཀྱིས་ཆོས་འདི་བསྲུང་མི་ནུས། །​འདྲེན་པ་མར་མེ་མཛད་ཀྱི་ཕ་རོལ་གྱི། །​བསྐལ་པ་དག་ནི་སྟོང་ཕྲག་བྱེ་བ་ན། །​སངས་རྒྱས་ཟླ་བའི་ཏོག་ཅེས་བྱ་བ་བྱུང་། །​འགྲོ་བ་རྣམས་ལ་ཏིང་འཛིན་འདི་བཤད་དྲན། །​རྒྱལ་བ་དེ་ཡི་འདུས་པ་དང་པོ་ནི། །​ཕྱིར་མི་ལྡོག་པ་ཁྲག་ཁྲིག་བརྒྱད་ཅུ་སྟེ། །​འདུས་པ་གཉིས་པ་ཁྲག་ཁྲིག་བདུན་ཅུ་ཡིན། །​འདུས་པ་གསུམ་པ་བདུན་ཅུ་རྩ་གསུམ་མོ། །​རྒྱལ་བའི་ཚེ་ནི་བསྐལ་པ་བྱེ་བ་མང་། །​འོད་ཀྱང་དཔག་ཚད་དྲུག་ཅུ་རྩ་གསུམ་པ། །​དགེ་འདུན་བྱེ་བ་དགུ་བཅུ་རྩ་དགུ་སྟེ། །ཐམས་ཅད་དགྲ་བཅོམ་དབང་ལྡན་གྱུར་པའོ། །​དེ་ཡི་ཚེ་ན་རྒྱལ་པོ་བྱུང་བ་ནི། །​འཁོར་ལོས་སྒྱུར་བ་བསོད་ནམས་འཕགས་ཞེས་བྱ། །​འཛམ་བུའི་གླིང་གི་ཚད་དུ་གྱུར་པ་ནི། །​མཚུངས་པར་དཔག་ཚད་སྟོང་ཕྲག་ཉི་ཤུའོ། །​གླིང་བཞི་རྣམས་ཀྱི་ཚད་ཀྱང་དེ་བཞིན་ནོ། །​རྒྱལ་པོའི་སླས་ནི་བྱེ་བ་དྲུག་ཅུ་ཐམ། །​བུ་ནི་སྟོང་ཐམ་པ་སྟེ་ཉུང་མ་ཡིན། །​རྒྱལ་པོའི་ཕོ་བྲང་དགའ་བའི་འོད་ཅེས་བྱ། །​གྲོང་ཁྱེར་དག་ནི་བྱེ་བ་བརྒྱད་ཅུར་གྱུར། །​ཐམས་ཅད་སྐྱེད་མོས་ཚལ་རྒྱས་མཛེས་པར་གནས། །​ཐམས་ཅད་ལོ་ལེགས་བདེ་ཞིང་དགའ་བ་སྟེ། །​སུམ་ཅུ་རྩ་གསུམ་རྣམ་རྒྱལ་ཁང་གནས་འདྲ། །​རྒྱལ་པོས་རྨི་ལམ་དུ་ནི་ཟླ་བའི་ཏོག །​སངས་རྒྱས་བྱུང་ངོ་ཞེས་ནི་ཐོས་གྱུར་ནས། །​གཡོག་འཁོར་བྱེ་བ་བརྒྱ་ཕྲག་དྲུག་ཅུ་དང་། །​རྒྱལ་བ་དེ་ཡི་དྲུང་དུ་ཉེར་སོང་ནས། །​དེས་ནི་ཏིང་འཛིན་ཟབ་མོ་རྒྱལ་བའི་སྐུ། །​མདོ་སྡེ་བཤད་པ་འདི་ནི་ཐོས་ནས་སུ། །​སྟོན་པ་ཇི་ལྟར་བཞེད་བཞིན་སྤྱད་གསོལ་ཞེས། །​རྒྱལ་སྲིད་ཐམས་ཅད་སངས་རྒྱས་དེ་ལ་ཕུལ།



The English translation of this folio by 84000 - Translating the words of the Buddha can be found at:
https://read.84000.co/translation/toh131.html?part=UT22084-055-005-425#UT22084-055-005-425