Degé Kangyur volume 55, F.212.a

ཆོས་ཐམས་ཅད་ནི་རྟེན་ཅིང་འབྲེལ་པར་འབྱུང་བ་སྟེ། ཆོས་གང་ཡང་ཐེར་ཟུག་ཏུ་གནས་པ་མ་ཡིན་ནོ། །​ཆོས་ཐམས་ཅད་ནི་རྐྱེན་ལས་འབྱུང་བ་སྟེ། རྐྱེན་མེད་པར་འབྱུང་བའི་ཆོས་ནི་གང་ཡང་མེད་དོ། །​ཆོས་གང་རྟེན་ཅིང་འབྲེལ་པར་འབྱུང་བ་དེ་ནི་མ་སྐྱེས་པའོ། །​དེ་ལྟར་ན་ཆོས་ཐམས་ཅད་ནི་སྐྱེ་བ་མེད་པ་སྟེ། ཆོས་ཐམས་ཅད་མ་སྐྱེས་པར་རྟོགས་པར་གྱུར་པ་དེ་ནི་བྱང་ཆུབ་སེམས་དཔའི་ལམ་ལ་འཇུག་པ་རྟོགས་པ་འཐོབ་བོ། །​འདི་ལྟར་སེམས་ཅན་ཐམས་ཅད་ལ་ཕན་པའི་དངོས་པོ་དང་། སྙིང་རྗེའི་སེམས་ཀྱི་རྗེས་སུ་འཇུག་པ་རབ་ཏུ་འཐོབ་བོ། །​དེ་དེ་ལྟར་མོས་པས་ཆོས་ཐམས་ཅད་སྒྱུ་མ་ལྟ་བུར་རབ་ཏུ་ཤེས་སོ། །​ཆོས་ཐམས་ཅད་ནི་ཡོངས་སུ་བརྟགས་པས་སྤྲུལ་པ་སྟེ། ཡོངས་སུ་བརྟགས་པ་དེ་ཡང་ཤིན་ཏུ་སྟོང་པའོ། །​ཆོས་ཐམས་ཅད་སྟོང་པར་རྟོགས་པ་དེ་ནི་སྒྱུ་མ་ལྟ་བུའི་ཏིང་ངེ་འཛིན་འཐོབ་སྟེ། ཏིང་ངེ་འཛིན་དེ་ཐོབ་མ་ཐག་ཏུ་ཇི་ལྟ་ཇི་ལྟར་སེམས་ཅན་རྣམས་དགེ་བའི་རྩ་བ་ཡོངས་སུ་རྫོགས་པར་འགྱུར་བ་དེ་ལྟ་དེ་ལྟར་ལུས་མངོན་པར་སྤྲུལ་ནས་སེམས་ཅན་རྣམས་ཀྱི་མོས་པ་ཇི་ལྟ་བ་དེ་བཞིན་དུ་ཆོས་སྟོན་པ་དང་། ཅི་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །​དེ་སྐད་ཅེས་བཀའ་སྩལ་ནས། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་པད་མའི་དཔལ་གྱི་སྙིང་པོས་འདི་སྐད་ཅེས་གསོལ་ཏོ། །​བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སྒྱུ་མ་ལྟ་བུའི་ཏིང་ངེ་འཛིན་འདི་ཐོབ་པ་གང་ལ་ལ་དག་འཁོར་འདིར་འདུས་པ་ལྟ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། པད་མའི་དཔལ་གྱི་སྙིང་པོ་འཁོར་འདི་ན་བསམས་བཞིན་དུ་གོ་ཆ་བགོས་པ་གང་དག་སྒྱུ་མ་ལྟ་བུའི་ཏིང་ངེ་འཛིན་འདི་ཐོབ་པ་སྐྱེས་བུ་དམ་པ་དྲུག་ཅུ་ཡོད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་། འཇམ་དཔལ་གཞོན་ནུར་གྱུར་པ་ལ་སོགས་པ་སྐྱེས་བུ་དམ་པ་དྲུག་ཅུ་པོ་དག་སྒྱུ་མ་ལྟ་བུའི་ཏིང་ངེ་འཛིན་འདི་ཐོབ་པ་ཡིན་ནོ། །​གསོལ་པ། བཅོམ་ལྡན་འདས་སྐྱེས་བུ་དམ་པ་འདི་དག་གིས་འཇིག་རྟེན་གྱི་ཁམས་འདི་ཉིད་དུ་སྒྱུ་མ་ལྟ་བུའི་ཏིང་ངེ་འཛིན་འདི་ཐོབ་པ་ལགས་སམ།



The English translation of this folio by 84000 - Translating the words of the Buddha can be found at:
https://read.84000.co/translation/toh130.html?part=UT22084-055-004-255#UT22084-055-004-255