Degé Kangyur volume 55, F.89.a

ནན་ཏན་ལ་གནས་པ་དང་འཁོར་བ་ལས་འབྱོར་པ་དང་མྱ་ངན་ལས་འདས་པ་ཐོབ་པར་བྱེད་པ་དང་ཀུན་ནས་ལྡང་བ་མེད་པར་གནས་པ་དང་ཏིང་ངེ་འཛིན་རབ་ཏུ་འཐོབ་པ་དང་། མི་དབུལ་བར་འགྱུར་ཏེ། གཞོན་ནུ་བཅུ་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཚུལ་ཁྲིམས་ཡོངས་སུ་དག་པའི་ཕན་ཡོན་ནོ། །​དེ་ལ་འདི་སྐད་ཅེས་བྱ་སྟེ། ཡེ་ཤེས་ཡོངས་སུ་རྫོགས་བྱེད་ཅིང་། །སངས་རྒྱས་དག་གི་རྗེས་སུ་སློབ། །​མཁས་པ་དག་གིས་མ་སྨད་པ། །​རྟག་ཏུ་འཇིགས་པ་མེད་པར་འགྱུར། །​དམ་བཅས་པ་ལས་མི་གཡོ་ཞིང་། །​ནན་ཏན་ལ་ཡང་རབ་ཏུ་གནས། །​མྱ་ངན་འདས་པ་ཐོབ་བྱེད་ཅིང་། །​འཁོར་བ་ལས་ཀྱང་ཤིན་ཏུ་འབྱོར། །​ཀུན་ནས་ལྡང་བ་མེད་གནས་ཤིང་། །​ཏིང་ངེ་འཛིན་རྣམས་མྱུར་དུ་འཐོབ། །​དབུལ་པོར་ཡང་ནི་མི་འགྱུར་ཏེ། །​ཚུལ་ཁྲིམས་ཕུང་པོར་རབ་ཏུ་གནས། །​དེ་ཡི་ཡེ་ཤེས་ཡོངས་སུ་རྫོགས་པར་འགྱུར། །​དེ་བཞིན་གཤེགས་པ་རྣམས་ཀྱིས་རྗེས་སུ་སློབ། །​དེ་ལྟར་དེ་ཡི་ཚུལ་ཁྲིམས་ཡོངས་དག་ཅིང་། །​དེ་ལ་མཁས་པ་དག་ནི་སྨོད་མི་བྱེད། །​དམ་བཅས་པ་ལས་མཁས་པ་མི་གཡོ་ཞིང་། །​དེ་ལྟར་དཔའ་བོ་ནན་ཏན་གནས་པར་བྱེད། །​འཁོར་བའི་ཉེས་པ་མང་པོ་མཐོང་ནས་ནི། །​འབྱོལ་ཞིང་མྱ་ངན་འདའ་བར་དེ་ཡིས་འགྲོ། །​དེ་ལྟར་ཚུལ་ཁྲིམས་སྟོབས་ལ་གནས་པས་ན། །​དེ་ཡི་སེམས་ནི་ཀུན་ནས་ལྡང་མི་འགྱུར། །​ཉོན་མོངས་མེད་པའི་ཏིང་འཛིན་མྱུར་དུ་འཐོབ། །​ཚུལ་ཁྲིམས་དག་པའི་ཕན་ཡོན་འདི་དག་ཡིན། །​ཚུལ་ཁྲིམས་ངེས་པར་བསྟན་པའི་ལེའུ་སྟེ་ཉི་ཤུ་བརྒྱད་པའོ།​། །​།གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་ལ་གནས་ཤིང་བྱམས་པ་ལ་སྤྱོད་པའི་ཕན་ཡོན་ནི་འདི་བཅུ་སྟེ། བཅུ་གང་ཞེ་ན། འདི་ལྟ་སྟེ། མེས་མི་ཚིག །​མཚོན་གྱིས་མི་སོད། དུག་གིས་མི་ཚུགས། ཆུས་མི་འཆི། ལྷ་རྣམས་དེ་ལ་སྲུང་བར་བྱེད། ལུས་མཚན་གྱིས་བརྒྱན་པ་ཐོབ་པར་འགྱུར། དེའི་ངན་འགྲོའི་སྒོ་ཐམས་ཅད་བཅད་པར་འགྱུར། དེ་ཚངས་པའི་འཇིག་རྟེན་དུ་སྐྱེ་བ་རྙེད་པ་མི་དཀའ་བར་འགྱུར། དེ་བདེ་བར་ཉིན་མཚན་འདའ་བར་འགྱུར། །​དེའི་ལུས་ལ་དགའ་བ་དང་བདེ་བ་མི་འདོར་བར་འགྱུར་ཏེ། གཞོན་ནུ་བྱང་ཆུབ་སེམས་དཔའ་སེམས་དཔའ་ཆེན་པོ་བཟོད་པ་ལ་གནས་པ། བྱམས་པ་ལ་སྤྱོད་པའི་ཕན་ཡོན་ནི་འདི་བཅུའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh127.html?part=UT22084-055-001-6009#UT22084-055-001-6009