Degé Kangyur volume 54, F.216.b

བསམ་གྱིས་མི་ཁྱབ་པ་འདི་ནའོ་ཞེས་ཀྱང་མི་འཛིན། མཚུངས་པ་མེད་པ་མེད་པར་ཡང་མི་འཛིན། མཚུངས་པ་མེད་པ་འདི་ནའོ་ཞེས་ཀྱང་མི་འཛིན། གཞལ་དུ་མེད་པ་མེད་པར་ཡང་མི་འཛིན། གཞལ་དུ་མེད་པ་འདི་ནའོ་ཞེས་ཀྱང་མི་འཛིན། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན་ཏོ། །​འཇམ་དཔལ་འདི་ལྟ་སྟེ། དཔེར་ན་མི་ཞིག་གཉིད་ཀྱིས་ལོག་པའི་རྨི་ལམ་དུ་འདོད་པའི་ཡོན་ཏན་ལྔ་ལ་ཀུན་ཏུ་སྤྱོད་པ་རྨིས་ལ་མི་དེ་ཡང་བྱིས་པའི་རང་བཞིན་ཅན་མ་ཡིན། བླུན་པའི་རང་བཞིན་ཅན་མ་ཡིན་གྱི་མཁས་པ་རྟོགས་པ་ཤེས་རབ་དང་ལྡན་པའི་རང་བཞིན་ཅན་ཏེ། ཉལ་བ་སད་ནས་འདོད་པའི་ཡོན་ཏན་མེད་པར་ཡང་མི་འཛིན། འདོད་པའི་ཡོན་ཏན་འདི་ནའོ་ཞེས་ཀྱང་མི་འཛིན། འདོད་པའི་དགའ་བ་མེད་པར་ཡང་མི་འཛིན། འདོད་པའི་དགའ་བ་འདི་ནའོ་ཞེས་ཀྱང་མི་འཛིན་པ་དེ་བཞིན་དུ། འཇམ་དཔལ་སྒྲིབ་པ་མེད་པའི་རྣམ་པར་ཐར་པ་ལ་སྤྱོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་རྣམ་པར་ཐར་པ་མེད་པར་ཡང་མི་འཛིན། རྣམ་པར་ཐར་པ་འདི་ནའོ་ཞེས་ཀྱང་མི་འཛིན་ཏོ། །​དེ་བཞིན་དུ་སྦྱར་ཏེ། བརྗོད་དུ་མེད་པ་མེད་པར་ཡང་མི་འཛིན། བརྗོད་དུ་མེད་པ་འདི་ནའོ་ཞེས་ཀྱང་མི་འཛིན་པའི་བར་དུའོ། །​འཇམ་དཔལ་འདི་ལྟ་སྟེ་དཔེར་ན་སྒྱུ་མ་མཁན་ནམ་སྒྱུ་མ་མཁན་གྱི་སློབ་མ་མཁས་པས་སྐྱེ་བོ་ཕལ་པོ་ཆེའི་མདུན་དུ་སྒྱུ་མ་སྣ་ཚོགས་འདི་ལྟ་སྟེ། གླང་པོ་ཆེའི་ཚོགས་སམ། རྟའི་ཚོགས་སམ། ཤིང་རྟའི་ཚོགས་སམ། དཔུང་བུ་ཆུང་གི་ཚོགས་བསྟན་ལ། དེ་ལ་མི་བྱིས་པའི་རང་བཞིན་ཅན་མ་ཡིན་པ། བླུན་པའི་རང་བཞིན་ཅན་མ་ཡིན་པ་མཁས་པ་རྟོགས་པ། བྱེ་བྲག་ཕྱེད་པ། ཤེས་རབ་དང་ལྡན་པའི་རང་བཞིན་ཅན་དེ་དག་གིས་དེ་མཐོང་ན། གླང་པོ་ཆེའི་ཚོགས་མེད་པར་ཡང་མི་འཛིན། གླང་པོ་ཆེའི་ཚོགས་འདི་ནའོ་ཞེས་ཀྱང་མི་འཛིན། རྟའི་ཚོགས་མེད་པར་ཡང་མི་འཛིན། རྟའི་ཚོགས་འདི་ནའོ་ཞེས་ཀྱང་མི་འཛིན། ཤིང་རྟའི་ཚོགས་མེད་པར་ཡང་མི་འཛིན། ཤིང་རྟའི་ཚོགས་འདི་ནའོ་ཞེས་ཀྱང་མི་འཛིན། དཔུང་བུ་ཆུང་གི་ཚོགས་མེད་པར་ཡང་མི་འཛིན། དཔུང་བུ་ཆུང་གི་ཚོགས་འདི་ནའོ་ཞེས་ཀྱང་མི་འཛིན།



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1041#UT22084-054-005-1041