Degé Kangyur volume 54, F.242.b

རྟག་ཏུ་རྒྱུན་མི་འཆད་པར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གཞོལ་བར་གྱུར་ཏོ། །​ནམ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དངོས་པོར་མ་དམིགས་ཏེ། འདི་ལྟ་སྟེ། དཔེར་ན་མི་ཞིག་གཟིངས་ལས་རྒྱ་མཚོ་ཆེན་པོ་རྒལ་ནས་གཟིངས་བོར་ཏེ་གར་དགའ་བར་འགྲོ་བ་དེ་བཞིན་དུ་དགེ་སློང་སྤྲིན་གྱི་རྒྱལ་པོ་དེའང་ཤེས་རབ་ཀྱི་ཕ་རོལ་ཏུ་ཕྱིན་པ་ཤེས་པར་བྱེད་མོད་ཀྱི། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མངོན་པར་ཞེན་པར་མི་བྱེད་དོ། །​འདི་ལྟ་སྟེ་དཔེར་ན་མི་ཞིག་མེ་འདོད་པ་དེས་མེས་དགོས་པ་བྱེད་མོད་ཀྱི་ཚིག་པའི་ཉེས་པའང་སྲུང་བ་དེ་བཞིན་དུ། བྱང་ཆུབ་སེམས་དཔའ་སྤྲིན་གྱི་རྒྱལ་པོ་དེའང་ཤེས་རབ་ཀྱི་ཕ་རོལ་ཏུ་ཕྱིན་པས་ཆོས་རྣམས་མཐོང་མོད་ཀྱི། མངོན་པར་ཞེན་པའི་ཉེས་པའང་བསྲུང་ངོ་། །​ཤེས་རབ་ཀྱི་ཕ་རོལ་ཏུ་ཕྱིན་པ་གཞན་ལའང་སྟོན་མོད་ཀྱི། མངོན་པར་ཞེན་པའི་ཉེས་པ་ལས་ཀྱང་ཟློག་པར་བྱེད་དོ། །​ཤེས་རབ་ཀྱི་ཕ་རོལ་ཏུ་ཕྱིན་པས་སངས་རྒྱས་ཀྱི་ཞིང་ཚད་མེད་པར་སངས་རྒྱས་ཀྱི་བྱ་བ་བྱེད་མོད་ཀྱི། དེས་སེམས་ཅན་དེ་དག་དང་། སངས་རྒྱས་དེ་དག་ཏུ་འཛིན་པའང་མེད་དོ། །​འཇམ་དཔལ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དགེ་སློང་སྤྲིན་གྱི་རྒྱལ་པོ་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་འཛིན་ན། འཇམ་དཔལ་ཁྱོད་ཀྱིས་དེ་ལྟར་མི་བལྟའོ། །​དེ་ཅིའི་ཕྱིར་ཞེ་ན། དེ་བཞིན་གཤེགས་པ་དོན་ཐམས་ཅད་གྲུབ་པ་དེ་དེའི་ཚེ་དེའི་དུས་ན་དགེ་སློང་སྤྲིན་གྱི་རྒྱལ་པོ་ཞེས་བྱ་བར་གྱུར་ཏོ། །​འཇམ་དཔལ་དེ་ལྟ་བས་ན་ཐབས་མཁས་པ་གང་དང་ལྡན་པས་དགེ་སློང་སྤྲིན་གྱི་རྒྱལ་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཐབས་མཁས་པ་དེ་དང་ལྡན་པར་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱད་པར་བྱའོ། །​དེ་ལྟ་བུའི་ཐབས་མཁས་པ་དང་ལྡན་པའི་བྱང་ཆུབ་སེམས་དཔའ་ནི་སངས་རྒྱས་ཀྱི་ཞིང་དཔག་ཏུ་མེད་པ་ཡོངས་སུ་སྦྱོང་ངོ་། །​སངས་རྒྱས་ཀྱི་ཞིང་གྲངས་མེད། བསམ་གྱིས་མི་ཁྱབ། མཚུངས་པ་མེད། གཞལ་དུ་མེད། བརྗོད་དུ་མེད་པ་ཡོངས་སུ་སྦྱོང་ངོ་། །​དེ་ནས་ཡང་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh124.html?part=UT22084-054-005-1093#UT22084-054-005-1093