Degé Kangyur volume 51, F.173.a

མེ་ཏོག་ཀུན་ཏུ་རྒྱས་པས་རྒྱལ་པོ་དགེ་བ་བཀོད་པ་ལ་འདི་སྐད་ཅེས་བཀའ་སྩལ་ཏོ། །​རྒྱལ་པོ་ཆེན་པོ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །​དགེ་བའི་རྩ་བསྐྱེད་པའི་རིགས་ཀྱི་བུའམ་རིགས་ཀྱི་བུ་མོ་རྣམས་ནི་སྲིད་པའི་འགྲོ་བ་དང་འཆི་འཕོའི་གནས་ཐམས་ཅད་དུ་སྐྱེས་པ་ན་ཡང་། གང་དག་སྟོན་པའི་བྱེད་པས་ཉེ་བར་གནས་པ་དང་། གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དང་། འཛུད་པ་དང་ཡོངས་སུ་སྨིན་པར་བྱེད་པའི་དགེ་བའི་བཤེས་གཉེན་རྣམས་རྙེད་པར་སླ་བར་འགྱུར་རོ། །​རྒྱལ་པོ་ཆེན་པོ་འདི་ལྟ་སྟེ་དགེ་བའི་བཤེས་གཉེན་གྱིས་ཡོངས་སུ་ཟིན་པ། དེ་བཞིན་གཤེགས་པ་ལྟར་འཛུད་པ་གནས་འདི་ནི་རྒྱ་ཆེ་བའོ། །​རྒྱལ་པོ་ཆེན་པོ་ཁྱེའུ་འདི་གཉིས་མཐོང་ངམ། གསོལ་པ་བཅོམ་ལྡན་འདས་མཐོང་ལགས་སོ། །​བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱེའུ་འདི་གཉིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་དྲུག་ཅུ་རྩ་ལྔའི་བྱེ་མ་སྙེད་ལ་མཆོད་པ་བྱེད་དོ། །​སེམས་ཅན་རྣམས་ལ་སྙིང་བརྩེ་བའི་ཕྱིར། ལོག་པར་ལྟ་བའི་སེམས་ཅན་རྣམས་ཡང་དག་པའི་ལྟ་བ་ལ་བརྩོན་འགྲུས་བསྐྱེད་པའི་ཕྱིར་དམ་པའི་ཆོས་པད་མ་དཀར་པོའི་ཆོས་ཀྱི་རྣམ་གྲངས་འདི་འཛིན་པར་འགྱུར་རོ། །​རིགས་ཀྱི་བུ་དག་དེ་ནས་རྒྱལ་པོ་དགེ་བ་བཀོད་པ་ནམ་མཁའི་དཀྱིལ་དེ་ནས་བབས་ཏེ། སོར་མོ་བཅུའི་ཐལ་མོ་སྦྱར་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འབྲུག་སྒྲ་དབྱངས་སྙན་སྐར་མའི་རྒྱལ་པོ་མེ་ཏོག་ཀུན་ཏུ་རྒྱས་པ་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་དེ་བཞིན་གཤེགས་པ་ཇི་ལྟ་བུའི་ཡེ་ཤེས་དང་ལྡན་པས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གི་སླད་དུ། དབུའི་གཙུག་ཏོར་རྣམ་པར་མཛེས་སྤྱན་དྲི་མ་མ་མཆིས་པ་ལགས། སྨིན་མཚམས་ཀྱི་མཛོད་སྤུ་མཛེས་ཤིང་། ཟླ་བ་དང་དུང་ལྟར་དཀར་ལ་མཛེས། མཉམ་ཞིང་ཐགས་



The English translation of this folio by 84000 Translating the words of the Buddha can be found at:
https://read.84000.co/translation/toh113.html?part=UT22084-051-001-6346#UT22084-051-001-6346