Degé Kangyur volume 51, F.59.a

རྒྱལ་བ་ཡི། །​དེ་དག་གི་ནི་སྤྱོད་པ་ང་ལས་ཉོན། །​དམ་པའི་ཆོས་པད་མ་དཀར་པོ་ལས་ཉན་ཐོས་ལུང་བསྟན་པའི་ལེའུ་ཞེས་བྱ་བ་སྟེ་དྲུག་པའོ།​། །​།དགེ་སློང་དག་སྔོན་བྱུང་བ་འདས་པའི་དུས་ན། བསྐལ་པ་གྲངས་མེད་པའི་ཡང་ཆེས་གྲངས་མེད་པ་དཔག་ཏུ་མེད་བསམ་གྱིས་མི་ཁྱབ་པ་གཞལ་དུ་མེད་པ་ཚད་མེད་པའི་ཕ་རོལ་གྱི་ཡང་ཆེས་ཕ་རོལ་དུ་གྱུར་པ། དེའི་ཚེ་དེའི་དུས་ན་བསྐལ་པ་གཟུགས་ཆེན་པོ་ཞེས་བྱ་བ་ལ། འཇིག་རྟེན་གྱི་ཁམས་འབྱུང་བ་ཞེས་བྱ་བར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་མངོན་པར་ཤེས་པའི་ཡེ་ཤེས་ཆེན་པོས་ཟིལ་གྱིས་གནོན་པ་ཞེས་བྱ་བ་འཇིག་རྟེན་དུ་བྱུང་ངོ་། །​དགེ་སློང་དག་དེ་བཞིན་གཤེགས་པ་དེ་བྱུང་ནས་ཇི་སྲིད་ལོན་ཞེ་ན། དགེ་སློང་དག་འདི་ལྟ་སྟེ། དཔེར་ན། མི་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སའི་ཁམས་ཐམས་ཅད་བཏབས་ཏེ་ཕྱེ་མར་བྱས་ལ། དེ་ནས་མི་དེས་འཇིག་རྟེན་གྱི་ཁམས་དེ་ནས་རྡུལ་ཕྲ་རབ་ཀྱི་རྡུལ་ཅིག་བླངས་ཏེ། ཤར་ཕྱོགས་སུ་འཇིག་རྟེན་གྱི་ཁམས་སྟོང་འདས་ནས་དེར་རྡུལ་ཕྲ་རབ་ཀྱི་རྡུལ་ཅིག་བཞག །​དེ་ནས་ཡང་མི་དེས་རྡུལ་ཕྲ་རབ་ཀྱི་རྡུལ་ཅིག་བླངས་ཏེ། དེའི་ཕ་རོལ་གྱི་ཡང་ཆེས་ཕ་རོལ་འཇིག་རྟེན་གྱི་ཁམས་སྟོང་འདས་ནས་རྡུལ་ཕྲ་རབ་ཀྱི་རྡུལ་ཅིག་བཞག་ལ། རྣམ་གྲངས་འདིས་མི་དེས་ཤར་ཕྱོགས་སུ་སའི་ཁམས་དེ་ཐམས་ཅད་བཞག་ན། དགེ་སློང་དག་འདི་ཇི་སྙམ་དུ་སེམས། འཇིག་རྟེན་གྱི་ཁམས་དེ་དག་གི་མཐའ་དང་མུ་བགྲང་བས་རྟོགས་པར་ནུས་སམ། དེ་དག་གིས་གསོལ་པ། བཅོམ་ལྡན་འདས་དེ་རྔོ་མི་ཐོགས་སོ། །​བདེ་བར་གཤེགས་པ་དེ་རྔོ་མི་ཐོགས་སོ། །​བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གང་དག་ཏུ་རྡུལ་ཕྲ་རབ་བཞག་པ་དང་། གང་དག་ཏུ་མ་བཞག་པའི་འཇིག་རྟེན་གྱི་ཁམས་དེ་རྣམས་ནི་རྩིས་པའམ་རྩིས་པ་



The English translation of this folio by 84000 Translating the words of the Buddha can be found at:
https://read.84000.co/translation/toh113.html?part=UT22084-051-001-6118#UT22084-051-001-6118