Degé Kangyur volume 51, F.128.b

།དེ་ལ་ཚད་ཀྱང་ཡོང་མེད་དོ། །​ཇི་ལྟར་ནམ་མཁའི་ཁམས་ཀྱི་ཚད། །​ཕྱོགས་བཅུ་དག་ནི་ཐམས་ཅད་དུ། །​རྟག་ཏུ་རྙེད་པར་འགྱུར་མ་ཡིན། །​བསོད་ནམས་ཕུང་པོ་འདི་དེ་འདྲ། །​བཟོད་ཅིང་དུལ་ཏེ་མཉམ་པར་གཞག །​ཚུལ་ཁྲིམས་ལྡན་ཞིང་བསམ་གཏན་པ། །​ཡང་དག་ནང་འཇོག་སྤྱོད་ཡུལ་ཅན། །​དེ་འདྲ་བ་ལྟ་སྨོས་ཅི་དགོས། །​ཁྲོ་བ་མེད་ཅིང་ཕྲ་མ་མེད། །​མཆོད་རྟེན་དག་ལ་གུས་པར་གནས། །​དགེ་སློང་རྣམས་ལའང་རྟག་ཏུ་འདུད། །​ང་རྒྱལ་མེད་ཅིང་ལེ་ལོ་མེད། །​ཤེས་རབ་ལྡན་ཞིང་བདེ་བཞིན་བརྟན། །​དྲི་བ་དྲིས་ན་མི་ཁྲོ་སྟེ། །​སྙིང་རྗེ་བློ་ཡིས་སྲོག་ཆགས་ལ། །​རྗེས་སུ་འཐུན་པར་རབ་ཏུ་སྟོན། །​གང་ཞིག་དེ་འདྲར་གྱུར་ནས་སུ། །​མདོ་འདི་ཡང་ནི་གང་འཛིན་པ། །​དེ་ཡི་བསོད་ནམས་ཕུང་པོ་ནི། །​ཚད་ཀྱང་རྙེད་པར་མི་འགྱུར་རོ། །​མདོ་འདི་འཛིན་པར་བྱེད་པ་ཡི། །​དེ་ལྟ་བུ་ཡི་ཆོས་སྨྲ་བ། །​གལ་ཏེ་མི་འགས་མཐོང་ན་ཡང་། །​དེ་ལ་ཤིན་ཏུ་བཀུར་སྟི་བྱ། །​ལྷ་ཡི་མེ་ཏོག་རྣམས་ཀྱིས་དེ་ལ་གཏོར། །​ལྷ་ཡི་གོས་རྣམས་ཀྱིས་ཀྱང་མངོན་པར་དགབ། །​དེ་ཡི་རྐང་པར་མགོ་བོས་ཕྱག་འཚལ་ཏེ། །​དེ་ལ་དེ་བཞིན་གཤེགས་པར་འདུ་ཤེས་སྐྱེད། །​དེ་མཐོང་ནས་ནི་དེ་ཚེ་འདི་སྙམ་དུ། །​དེ་ནི་ཤིང་ལྗོན་དྲུང་དུ་འགྲོར་འགྱུར་ཏེ། །​ལྷ་དང་བཅས་པའི་འཇིག་རྟེན་ཕན་པའི་ཕྱིར། །​བླ་མེད་བྱང་ཆུབ་ཞིང་འཚང་རྒྱ་སྙམ་བསམ། །​མདོ་སྡེ་འདི་ལས་ཚིགས་བཅད་གཅིག་བརྗོད་ཅིང་། །​དེ་འདྲའི་མཁས་དེ་གང་ན་འཆག་པ་འམ། །​གང་ན་འགྲེང་ངམ་འོན་ཏེ་འདུག་པ་འམ། །​དཔའ་བོ་གང་དུ་ཉལ་བར་བྱེད་པའང་རུང་། །​དེར་ནི་འདྲེན་པ་སངས་རྒྱས་བཅོམ་ལྡན་གྱི། །​ཆེད་དུ་སྐྱེས་བུ་དམ་པའི་མཆོད་རྟེན་ནི། །​བལྟ་ན་སྡུག་པ་སྣ་ཚོགས་བྱེད་དུ་གཞུག །​དེ་བཞིན་དེར་ནི་མཆོད་པ་སྣ་ཚོགས་བྱས། །​གང་ན་སངས་རྒྱས་བུ་དེ་འདུག་པ་ཡི། །​ས་ཕྱོགས་དེ་ནི་ང་ཡིས་ཡོངས་སུ་སྤྱད། །​ངས་ནི་དེ་ཉིད་དུ་ཡང་འཆག་པ་བྱས། །​དེ་ཉིད་དུ་ཡང་ང་ནི་འདུག་པར་གྱུར། །​དམ་པའི་ཆོས་པད་མ་དཀར་པོ་ལས་བསོད་ནམས་ཀྱི་རྣམ་གྲངས་ཀྱི་ལེའུ་ཞེས་བྱ་བ་སྟེ་བཅུ་དྲུག་པའོ།​། །​།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་འདི་སྐད་ཅེས་གསོལ་ཏོ།