དེས་ང་ཐམས་ཅད་ཀྱི་དང་པོར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཅུག་ཅིང་བཞག་སྟེ་རབ་ཏུ་གནས་པར་བྱས་སོ། །དེའི་ཚིག་གིས་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བཞིན་གཤེགས་པ་དེས་ང་དང་པོ་སྦྱིན་པའི་ཕ་རོལ་ཏུ་ཕྱིན་པ་ལ་བཞག་པ་ནས། དེ་བཞིན་གཤེགས་པ་ཤཱཀྱ་ཐུབ་པ་དེ་ནི་ཆོས་བཞི་པོ་དེ་དག་གིས་ཁྱད་པར་དུ་འཕགས་པ་ཡིན་ནོ་ཞེས་ཇི་སྐད་སྔར་སྨོས་པའི་བར་དག་དེ་སྐད་དུ་གསུངས་ཏེ། འདི་ལྟར་དེ་བཞིན་གཤེགས་པ་དེས་མེ་ཏོག་ཟླ་བ་མདོག་མཛེས་དྲི་མ་མེད་པ་འདི་དག་ཀྱང་བསྐུར་ཞིང་བཅོམ་ལྡན་འདས་ལ་སྙུན་མི་མངའ་འམ། ཐུགས་བདེའམ་ཞེས་ཀྱང་སྙུན་གསོལ་ལགས་སོ། །དེ་བཞིན་དུ་སངས་རྒྱས་ཀྱི་ཞིང་མངོན་པར་དགའ་བ་ན་དེ་བཞིན་གཤེགས་པ་མི་འཁྲུགས་པའི་གདན་ཡང་གཡོས་ཤིང་བྱང་ཆུབ་སེམས་དཔའ་གང་དག་དེར་འདུས་པར་གྱུར་པ་དེ་དག་གིས་དེ་བཞིན་གཤེགས་པ་མི་འཁྲུགས་པའི་གདན་གཡོས་པར་མཐོང་སྟེ། ཡོངས་སུ་ཞུས་པ་ནས་དེ་བཞིན་དུ་སྦྱར་ཏེ་ཇི་སྐད་སྔར་སྨོས་པའི་བར་དེ་དག་ཐམས་ཅད་ཀྱང་བརྗོད་པར་བྱའོ། །དེའི་ཚེ་ན་ཤར་ཕྱོགས་ལོགས་ནས་དེ་བཞིན་གཤེགས་པའི་ཕོ་ཉ་བྱང་ཆུབ་སེམས་དཔའ་དཔག་ཏུ་མེད་གྲངས་མེད་པ་དག་དེ་བཞིན་གཤེགས་པ་ཤཱཀྱ་ཐུབ་པ་ལ་ཡོངས་སུ་ཞུ་བ་དང་མཆོད་པ་བྱ་བ་དང་། ཕྱག་བྱ་བ་དང་། བསྙེན་བཀུར་བྱ་བ་དང་། ཆོས་མཉན་པའི་ཕྱིར་མེ་ཏོག་ཟླ་བ་མདོག་མཛེས་དྲི་མ་མེད་པ་དག་ཐོགས་ཏེ་སངས་རྒྱས་ཀྱི་ཞིང་མི་མཇེད་འདིར་ལྷགས་སོ། །བཅོམ་ལྡན་འདས་ཀྱིས་ཤར་ཕྱོགས་ཀྱི་སངས་རྒྱས་བཅོམ་ལྡན་འདས་རྣམས་ཀྱི་མཚན་དང་། སངས་རྒྱས་ཀྱི་ཞིང་ཡོངས་སུ་བསྒྲགས་པ་དག་མཐར་ཕྱིན་མ་ཐག་ཏུ་ཡང་བཅོམ་ལྡན་འདས་ཀྱིས་ལྷོ་ཕྱོགས་ལོགས་ཀྱི་ཡོངས་སུ་བསྒྲགས་པ་བརྩམས་ཏེ། རིགས་ཀྱི་བུ་ངས་སངས་རྒྱས་ཀྱི་ཞིང་འདི་ནས་ལྷོ་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་གཅིག་གི་བྱེ་མ་སྙེད་འདས་པ་དེ་ན་འཇིག་རྟེན་གྱི་ཁམས་མྱ་ངན་ཐམས་ཅད་དང་བྲལ་བ་ཞེས་བྱ་བ་ཞིག་ཡོད་པ་དེ་ན་དེ་བཞིན་གཤེགས་པ་མྱ་ངན་མེད་པའི་དཔལ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པ་གཟིགས་ཏེ།