།བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་གསོལ་པ། བདག་གིས་ནི་བསྐལ་པ་གང་གཱའི་ཀླུང་བཅུའི་བྱེ་མ་སྙེད་འདས་པ་ན་བསྐལ་པ་ཆེན་པོ་ཀུན་ནས་སྒྲོལ་བ་ཞེས་བགྱི་བ་ཞིག་བྱུང་སྟེ། དེ་ན་སངས་རྒྱས་ཀྱི་ཞིང་རྒྱན་ཐམས་ཅད་ཀྱིས་བརྒྱན་པ་ཞེས་བགྱི་བར་གྱུར་པ་དེར་སངས་རྒྱས་སཱ་ལའི་དབང་པོའི་རྒྱལ་པོ་ཞེས་བགྱི་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་ཞིང་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དགེ་སློང་བྱེ་བ་ཁྲག་ཁྲིག་འབུམ་ཕྲག་མཐའ་ཡས་པའི་དགེ་འདུན་གྱིས་ཡོངས་སུ་བསྐོར་ཅིང་། དེ་བཞིན་དུ་བྱང་ཆུབ་སེམས་དཔའ་བགྲང་བ་ལས་ཡང་དག་པར་འདས་པས་ཡོངས་སུ་བསྐོར་བ་ཞིག་བྱུང་བས་ཐམས་ཅད་མཁྱེན་པ་ཉིད་ཀྱི་རྣམ་པའི་གཟུངས་ཀྱི་སྒོ་ལ་འཇུག་པའི་གཟུངས་འདི་ཉིད་བཤད་པར་གྱུར་པ་ན། དེ་ལས་གཟུངས་འདི་ཐོས་ནས་བདག་གིས་བསྒོམ་པ་ཡོངས་སུ་རྫོགས་པར་བགྱིས་ཤིང་རྟོགས་པར་བགྱིས་ལགས་སོ། །དེ་བཞིན་དུ་བསྐལ་པ་ཚད་མ་མཆིས་པའི་ཡང་ཆེས་ཚད་མ་མཆིས་པ། གྲངས་མ་མཆིས་པའི་ཡང་ཆེས་གྲངས་མ་མཆིས་པ་དག་ལ་འདས་པའི་ཡང་དག་པར་རྫོགས་པའི་སངས་རྒྱས་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ལ་བྱང་ཆུབ་སེམས་དཔའི་རྣམ་པར་འཕྲུལ་པ་གྲངས་མ་མཆིས་པ་དག་གིས་མཆོད་པར་བགྱིས་ནས། སངས་རྒྱས་རེ་རེ་ལས་ཀྱང་དགེ་བའི་རྩ་བ་ཚད་མ་མཆིས་པ་དང་། གྲངས་མ་མཆིས་པ་དང་། གཞལ་དུ་མ་མཆིས་པ་དང་། དཔག་ཏུ་མ་མཆིས་པ་དག་བསྲུངས་ཤིང་བསོད་ནམས་ཀྱི་ཕུང་པོ་ཡོངས་སུ་བཟུང་སྟེ། དགེ་བའི་རྩ་བ་དེས་བདག་སངས་རྒྱས་སྟོང་ཕྲག་མང་པོ་དག་གིས་ལུང་བསྟན་ཀྱང་། བདག་ནི་སྨོན་ལམ་གྱི་ཁྱད་པར་གྱིས་དུས་ལ་ལྟ་ཞིང་འདི་ལྟར་ཡུན་རིང་པོར་འཁོར་བ་ན་འཁོར་བར་གྱུར་ཏེ། དེའི་སླད་དུ་བདག་འཁོར་བ་ན་འཁོར་ཞིང་། སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པའི་སངས་མ་རྒྱས་ལགས་ཏེ། ང་ནི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱལ་ཚབ་ཏུ་དབང་བསྐུར་ནས། བདག་གི་ཤེས་རབ་ཀྱི་མགོ་ལ་རྣམ་པར་གྲོལ་བའི་ཅོད་པན་བཅིངས་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་འདི་སྐད་ཅེས་བཀའ་སྩལ་ཏོ།