ཕ་རོལ་ཏུ་ཕྱིན་པ་འདི་དག་ལ་བརྩོན་པར་བྱས་སོ་ཞེས་བདག་གི་སྐུ་གདུང་གི་རྣམ་པར་འགྱུར་བའི་སྔོན་གྱི་ཚུལ་དག་རྒྱ་ཆེར་ཇི་ལྟར་སྔར་སྨོས་པའི་བར་དུ་རྒྱ་ཆེར་སྟོན་པར་གྱུར་ཅིག །དེ་ནས་མདུན་ན་འདོན་གྱི་གཙོ་བོ་བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་པོ་ཆེའི་སྙིང་པོའི་སྤྱན་སྔར་ལྷ་དང་། དྲི་ཟ་དང་། མི་དང་བཅས་པའི་སྐྱེ་དགུ་ཐམས་ཅད་ཀྱི་དོན་དུ་སྙིང་རྗེ་ཆེན་པོ་དང་ལྡན་པའི་སྨོན་ལམ་ཆེན་པོ་ལྔ་བརྒྱ་པོ་དེ་དག་བཏབ་ནས་དེས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གལ་ཏེ་དེ་ལྟར་བདག་གིས་མ་འོངས་པའི་དུས་ན་བསྐལ་པ་བཟང་པོ་ལ་ཉོན་མོངས་པ་དང་། ཐབ་མོ་དང་། སྙིགས་མ་བདོ་ཞིང་རྩོད་པའི་དུས་ལ་བབ་པ་ན་འཇིག་རྟེན་ལྡོངས་ཤིང་འདྲེན་པ་མ་མཆིས་པ་དང་། ཡོངས་སུ་འདྲེན་པ་མ་མཆིས་པ་དང་། ལྟ་བའི་སྡུག་བསྔལ་གྱི་མུན་པར་ཆུད་པའི་འཇིག་རྟེན་ན་མཚམས་མ་མཆིས་པ་བགྱིད་པ་རྣམས་དང་། སྔར་སྨོས་པ་ལྟ་བུའི་བར་དག་ལ་བདག་གི་རེ་བ་འདི་ལྟ་བུ་ཡོངས་སུ་རྫོགས་པར་འགྱུར་ཞིང་། གལ་ཏེ་བདག་གིས་ཇི་ལྟར་སྨོན་ལམ་བཏབ་པ་དེ་ལྟ་བུའི་སངས་རྒྱས་ཀྱི་མཛད་པ་ཐམས་ཅད་སྒྲུབ་པར་རྔོ་ཐོགས་པ་ལྟ་ན་བྱང་ཆུབ་ཀྱི་སླད་དུ་སྨོན་པ་སྤང་བར་མི་བགྱི་ཞིང་། དགེ་བའི་རྩ་བ་ཡང་ཞིང་གཞན་དུ་ཡོངས་སུ་བསྔོ་བར་མི་བགྱི་སྟེ། བཙུན་པ་བཅོམ་ལྡན་འདས་དེ་ནི་བདག་གི་ངེས་པ་ལགས་སོ། །ཡང་བདག་ནི་དགེ་བའི་རྩ་བ་དེས་རང་སངས་རྒྱས་ཀྱི་ཐེག་པ་མི་འཚལ། ཉན་ཐོས་ཀྱི་ཐེག་པ་ཡང་མི་འཚལ། ལྷ་དང་མིའི་འཇིག་རྟེན་གྱི་རྒྱལ་སྲིད་ཀྱང་མི་འཚལ། ལྷ་དང་མིའི་འཇིག་རྟེན་གྱི་དབང་ཕྱུག་ཀྱང་མི་འཚལ། འདོད་པ་ལྔའི་ཡོན་ཏན་གྱི་ལོངས་སྤྱོད་ཀྱང་མི་འཚལ། ལྷར་སྐྱེ་བ་ཡང་མི་འཚལ། དྲི་ཟ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཀླུ་དང་། ནམ་མཁའ་ལྡིང་དུ་སྐྱེ་བ་ཡང་མི་འཚལ་ལ་དགེ་བའི་རྩ་བ་གཞན་དུ་ཡོངས་སུ་བསྔོ་བར་ཡང་མི་བགྱིད་དེ། གང་ཡང་བཅོམ་ལྡན་འདས་ཀྱིས་འདི་སྐད་དུ་སྦྱིན་པས་ནི་ལོངས་སྤྱོད་ཆེན་པོར་འགྱུར། ཚུལ་ཁྲིམས་ཀྱིས་ནི་མཐོ་རིས་སུ་སྐྱེ། ཐོས་པས་ནི་ཤེས་རབ་ཆེན་པོར་འགྱུར། བསྒོམ་པས་ནི་འབྲལ་བར་འགྱུར་རོ།