རིང་པོ་མ་ལགས་པའི་དེ་བཞིན་གཤེགས་པ་པད་མ་དམ་པ་དེ་ཡང་ཡུན་ཇི་སྲིད་ཅིག་ཏུ་བཞུགས་ཏེ་འཚོ་ཞིང་གཞེས་ལ་ཆོས་སྟོན་པར་འགྱུར། ཡོངས་སུ་མྱ་ངན་ལས་འདས་ནས་ནི་དམ་པའི་ཆོས་ཡུན་ཇི་སྲིད་ཅིག་ཏུ་གནས་པར་འགྱུར། འཇིག་རྟེན་གྱི་ཁམས་པད་མའི་སངས་རྒྱས་ཀྱི་ཞིང་དུ་བྱང་ཆུབ་སེམས་དཔའ་གང་དག་སྐྱེས་པ་དང་། སྐྱེ་བར་འགྱུར་བ་དེ་དག་ནི་ཡུན་ཇི་སྲིད་ཅིག་ཏུ་གནས་པར་འགྱུར། ཅི་བྱང་ཆུབ་སེམས་དཔའ་དེ་དག་སངས་རྒྱས་ལ་ལྟ་བ་དང་། ཆོས་ཉན་པ་དང་། དགེ་འདུན་ལ་བསྙེན་བཀུར་བགྱིད་པ་དང་མི་འབྲལ་ལགས་སམ་འོན་ཏེ་དེ་ལྟ་མ་ལགས། འཇིག་རྟེན་གྱི་ཁམས་པད་མ་དེ་ནི་སྔོན་མིང་ཅི་ཞེས་བགྱི་བར་གྱུར། དེར་རྒྱལ་བའི་ཉི་མ་ནུབ་ནས་ཡུན་ཇི་སྲིད་ཅིག་ལགས་ནས། དེའི་འོག་ཏུ་དེ་བཞིན་གཤེགས་པ་པད་མ་དམ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ཅིའི་རྐྱེན་གྱིས་ན་ཕྱོགས་བཅུའི་སངས་རྒྱས་ཀྱི་ཞིང་གཞན་དག་ན་སངས་རྒྱས་བཅོམ་ལྡན་འདས་གང་དག་ཆོ་འཕྲུལ་དག་མཛད་པའི་སངས་རྒྱས་ཀྱི་རྣམ་པར་འཕྲུལ་པ་དག་དང་། སངས་རྒྱས་ཀྱི་ཆོ་འཕྲུལ་དག་ཁ་ཅིག་གིས་ནི་མཐོང་ལ། ཁ་ཅིག་གིས་ནི་མི་མཐོང་བར་གྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལྟ་སྟེ་དཔེར་ན་རིའི་རྒྱལ་པོ་རི་རབ་ལ་འཕང་དུ་ནི་དཔག་ཚད་འབུམ་དྲུག་ཁྲི་བརྒྱད་སྟོང་ཡོད་ལ། རྒྱར་ནི་དཔག་ཚད་བརྒྱད་ཁྲི་བཞི་སྟོང་ཡོད་པ་སྐྱེས་བུ་བརྩོན་འགྲུས་དང་ལྡན་པ། སྟོབས་དང་ལྡན་པ་ལ་ལ་ཞིག་འོངས་ནས་ཏིང་ངེ་འཛིན་གྱི་མཐུས་རིའི་རྒྱལ་པོ་རི་རབ་དེ་ཡུངས་འབྲུའི་ཚད་ཙམ་དུ་བཀྲུམ་ནས། ཡུངས་འབྲུ་ཙམ་དུ་གྱུར་པ་དེ་དག་ནི་བགྲང་བ་ལས་ཡང་དག་པར་འདས་པས་ན་ཡུངས་འབྲུ་ཙམ་པོ་དེ་དག་ནི་ཐམས་ཅད་མཁྱེན་པའི་ཡེ་ཤེས་མ་གཏོགས་པར་སུས་ཀྱང་བགྲང་བར་མི་ནུས་ཏེ། ཡུངས་འབྲུ་ཙམ་པོ་དེ་དག་ཇི་སྙེད་པར་དེ་ན་གླིང་བཞི་པའི་ཚད་ཀྱང་དེ་སྙེད་ཡོད་དོ། །འདི་ལྟ་སྟེ་དཔེར་ན་འཇིག་རྟེན་གྱི་ཁམས་བདེ་བ་ཅན་བྱང་ཆུབ་སེམས་དཔའ་དག་གིས་ཀུན་ཏུ་གང་བ་བཞིན་དུ་སངས་རྒྱས་ཀྱི་ཞིང་པད་མ་ཡང་བྱང་ཆུབ་སེམས་དཔའ་དག་གིས་ཀུན་ཏུ་གང་བ་ཡིན་ནོ། །རིགས་ཀྱི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མ་དམ་པའི་སྐུ་ཚེའི་ཚད་ནི་བར་གྱི་བསྐལ་པ་སུམ་ཅུར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པར་འགྱུར་རོ།