སངས་རྒྱས་བཅོམ་ལྡན་འདས་རྣམས་ལ་སྦྱིན་པ་སྦྱིན་པར་བྱེད་ཀྱང་འདོད་པ་དག་ལ་ཡོངས་སུ་མི་སྤྱོད་ཅིང་རྟག་ཏུ་ཚངས་པར་སྤྱོད་པ་ཡིན་ཏེ། མི་གཙང་བ་དང་དྲི་ང་བ་མེད་དོ། །དེ་ནམ་ཡང་སུ་ལ་ཡང་ཕ་རོལ་ལ་བརྙས་པ་དང་། ཁྱད་དུ་གསོད་པ་གང་དག་གིས་ཕ་རོལ་མི་དགའ་བར་འགྱུར་བའི་ཕ་རོལ་ལ་བརྙས་པ་དང་། ཁྱད་དུ་གསོད་པ་མི་བྱེད་དེ།རབ་འབྱོར་རྣམ་པ་དང་། རྟགས་དང་། མཚན་མ་དེ་དག་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་ཕྱིར་མི་ལྡོག་པར་བསྟན་ཏོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་སྙམ་ནས། བསྲུང་བ་དང་། ཡོངས་སུ་བསྐྱབ་པའི་ཕྱིར་གནོད་སྦྱིན་ལག་ན་རྡོ་རྗེ་རྟག་ཏུ་རྒྱུན་མི་འཆད་པར་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པའི་ཕྱི་བཞིན་འབྲང་བར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་སངས་རྒྱས་ངའི་ཕྱི་བཞིན་འབྲང་བ་བཞིན་ནོ། །དེ་བཞིན་དུ་སྦྱར་ཏེ། རྡོ་རྗེའི་རིགས་ལྔ་བརྒྱའི་བར་དུ་ཡང་བསྲུང་བ་དང་ཡོངས་སུ་བསྐྱབ་པའི་ཕྱིར་རྟག་ཏུ་རྒྱུན་མི་འཆད་པར་ཕྱི་བཞིན་དུ་འབྲང་སྟེ། དེ་ལ་མི་རྣམས་སམ། མི་མ་ཡིན་པ་རྣམས་ཀྱིས་ནམ་ཡང་གནོད་པར་བྱེད་མི་ནུས་ཏེ། དེ་ལ་འཇིག་རྟེན་ན་ལྷའམ། བདུད་དམ། ཚངས་པའམ། སུས་ཀྱང་ནམ་ཡང་ཆོས་དང་འཐུན་པར་ཐུབ་པ་མེད་དོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་བྱང་ཆུབ་ཡིད་ལ་བྱེད་པ་ལས་དེའི་སེམས་རྣམ་པར་གཡེང་བར་མི་འགྱུར་རོ། །ནམ་ཡང་དེ་དབང་པོ་མ་ཚང་བར་མི་འགྱུར་ཏེ། འདི་ལྟ་སྟེ། མིག་གི་དབང་པོ་དང་། ལུས་ཀྱི་དབང་པོའི་བར་དུ་མ་ཚང་བར་མི་འགྱུར་རོ། །ནམ་དུ་ཡང་འཇིག་རྟེན་ལས་འདས་པའི་དབང་པོ་ལྔ་དང་བྲལ་བར་མི་འགྱུར་རོ། །ལྔ་གང་ཞེ་ན། འདི་ལྟ་སྟེ། དད་པའི་དབང་པོ་དང་། བརྩོན་འགྲུས་ཀྱི་དབང་པོ་དང་། དྲན་པའི་དབང་པོ་དང་། ཏིང་ངེ་འཛིན་གྱི་དབང་པོ་དང་། ཤེས་རབ་ཀྱི་དབང་པོའོ། །དེ་ནི་སྐྱེས་བུ་དམ་པ་ཡིན་ནོ། །གསོལ་པ། བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་ན་སྐྱེས་བུ་དམ་པ་ལགས།