རྣམ་པར་ཤེས་པའི་སྐྱེ་བ་མེད་པ་དང་། འགག་པ་མེད་པ་དང་། ཀུན་ནས་ཉོན་མོངས་པ་མེད་པ་དང་། རྣམ་པར་བྱང་བ་མེད་པ་འདི་ལྟ་སྟེ། མཐའ་ལས་འདས་པ་སྟོང་པ་ཉིད་དང་ཐོག་མ་དང་ཐ་མ་མེད་པ་སྟོང་པ་ཉིད་ཀྱི་ཆོས་དེ་ནི་རྣམ་པར་མི་རྟོག་ཅིང་བརྗོད་དུ་མེད་པ་ཡིན་པའི་ཕྱིར་རོ། །གསོལ་པ། བཙུན་པ་བཅོམ་ལྡན་འདས་གལ་ཏེ་ཀུན་རྫོབ་ཀྱི་བདེན་པ་ལ་བརྟེན་ཏེ། འབྲས་བུ་རྣམ་པར་གཞག་པ་ལགས་ན་བྱིས་པ་སོ་སོའི་སྐྱེ་བོ་ཐམས་ཅད་རྒྱུན་དུ་ཞུགས་པའི་འབྲས་བུར་མི་འགྱུར་ལགས་སམ། དེ་བཞིན་དུ་ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་བྱང་ཆུབ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་འགྱུར་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་ཅི་བྱིས་པ་སོ་སོའི་སྐྱེ་བོ་རྣམས་ཀུན་རྫོབ་ཀྱི་བདེན་པའམ། དོན་དམ་པའི་བདེན་པ་ཤེས་སམ། དེ་དག་ལ་ནི་འདི་ལྟ་སྟེ། རྒྱུན་དུ་ཞུགས་པའི་འབྲས་བུ་དང་དེ་བཞིན་དུ་སྦྱར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་གྱི་རྣམ་པར་གཞག་པ་ཡང་མེད་དོ། །རབ་འབྱོར་གང་གི་ཕྱིར་བྱིས་པ་སོ་སོའི་སྐྱེ་བོ་ཐམས་ཅད་ལ། འཕགས་པའི་ལམ་ཡན་ལག་བརྒྱད་པ་མེད་ཅིང་འཕགས་པའི་ལམ་ཡན་ལག་བརྒྱད་པ་བསྒོམ་པ་མེད་ལ། འཕགས་པའི་ལམ་ཡན་ལག་བརྒྱད་པའི་འབྲས་བུ་མེད་པ་དེ་ཉིད་ཀྱི་ཕྱིར་བྱིས་པ་སོ་སོའི་སྐྱེ་བོ་ཐམས་ཅད་ལ་འབྲས་བུ་རྣམ་པར་གཞག་པར་མི་འགྱུར་རོ། །རབ་འབྱོར་འཕགས་པའི་གང་ཟག་རྣམས་ལ་ནི་མྱ་ངན་ལས་འདས་པའི་ལམ་དང་། མྱ་ངན་ལས་འདས་པའི་ལམ་བསྒོམ་པ་དང་། མྱ་ངན་ལས་འདས་པའི་ལམ་བསྒོམ་པའི་འབྲས་བུ་ཡང་ཡོད་དོ། །དེ་ཅིའི་ཕྱིར་ཞེ་ན། རབ་འབྱོར་འཕགས་པའི་གང་ཟག་དེ་དག་ཉིད་ལ་འབྲས་བུ་རྣམ་པར་གཞག་པ་ཡིན་གྱི་གཞན་དག་ལ་ནི་མ་ཡིན་པའི་ཕྱིར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཅི་ལམ་བསྒོམ་ན། འབྲས་བུ་ཐོབ་ལགས་སམ་འོན་ཏེ་ལམ་མ་བསྒོམས་པ་འབྲས་བུ་ཐོབ་པར་འགྱུར་ལགས།