བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སེམས་ཅན་ཐམས་ཅད་གདུལ་བར་འདོད་པར་སེམས་ཏེ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་ནས། སེམས་ཅན་ཐམས་ཅད་གདུལ་བར་བྱའོ་སྙམ་ནས་གོ་ཆ་བགོས་པ་དེ་དག་ནི་ནམ་མཁའ་གདུལ་བར་འདོད་པར་སེམས་པ་ཡིན་ནོ། །དེ་ཅིའི་ཕྱིར་ཞེ་ན། ནམ་མཁའ་དབེན་པའི་ཕྱིར་སེམས་ཅན་དབེན་པར་བལྟ་བར་བྱ་བ་དང་། དེ་བཞིན་དུ་ནམ་མཁའ་སྟོང་པ་ཉིད་ཀྱི་ཕྱིར་སེམས་ཅན་སྟོང་པ་ཉིད་དུ་བལྟ་བར་བྱ་བ་དང་། ནམ་མཁའ་སྙིང་པོ་མེད་པའི་ཕྱིར་སེམས་ཅན་སྙིང་པོ་མེད་པ་ཉིད་དུ་བལྟ་བར་བྱ་བའི་ཕྱིར་ཏེ། ལྷའི་བུ་དག་རྣམ་གྲངས་དེས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཡོད་པ་མ་ཡིན་པའི་སེམས་ཅན་རྣམས་ཀྱི་ཆེད་དུ་སྙིང་རྗེ་ཆེན་པོའི་གོ་ཆ་གྱོན་པ་རྣམས་ནི་དཀའ་བ་བྱེད་པ་ཡིན་ནོ། །གང་ཞིག་སེམས་ཅན་རྣམས་ཀྱི་ཆེད་དུ་སྙིང་རྗེ་ཆེན་པོའི་གོ་ཆ་བགོ་བར་སེམས་པ་དེ་ནི་ནམ་མཁའ་དང་འཐབ་པར་འདོད་དུ་ཟད་དེ། བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་བགོས་པ་དེས་ནི་གང་དག་གི་དོན་དུ་གོ་ཆ་བགོས་པའི་སེམས་ཅན་དེ་དག་ཀྱང་མི་དམིགས་སོ། །དེ་ཅིའི་ཕྱིར་ཞེ་ན། འདི་ལྟར་སེམས་ཅན་དབེན་པའི་ཕྱིར་གོ་ཆ་དབེན་པར་བལྟ་བར་བྱ་བའི་ཕྱིར་རོ། །གལ་ཏེ་དེ་སྐད་བཤད་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་མི་ཞུམ་ཞིང་ཀུན་ཏུ་མི་ཞུམ་ན། དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་གཟུགས་དབེན་པ་གང་ཡིན་པ་དེ་སེམས་ཅན་དབེན་པ་ཉིད་ཡིན་པ་དང་། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དབེན་པ་གང་ཡིན་པ་དེ་སེམས་ཅན་དབེན་པ་ཉིད་ཡིན་པ་དང་། དེ་བཞིན་དུ་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་དབེན་པ་གང་ཡིན་པ་དེ་ཕ་རོལ་ཏུ་ཕྱིན་པ་དྲུག་དབེན་པ་ཉིད་ཡིན་པ་དང་། དེ་བཞིན་དུ་རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་ཡང་གོང་མ་བཞིན་དུ་སྦྱར་བར་བྱ་བའི་ཕྱིར་རོ། །གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་དབེན་པ་ཉིད་དུ་བསྟན་པ་ན། སེམས་མི་ཞུམ་མི་འགོང་ཞིང་མི་སྐྲག་མི་དངང་ལ་དངང་བར་མི་འགྱུར་ན། དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ནོ།