བྱང་ཆུབ་ཀྱི་ཡན་ཡག་རྣམས་དང་། འཕགས་པའི་ལམ་ཡན་ལག་བརྒྱད་པ་གཟུང་བའམ། མི་གཟུང་བར་བྱ་བའི་ཕྱིར་བསྟན་པ་མ་ཡིན། དེ་བཞིན་གཤེགས་པའི་སྟོབས་བཅུ་གཟུང་བའམ། མི་གཟུང་བར་བྱ་བའི་ཕྱིར་བསྟན་པ་མ་ཡིན། དེ་བཞིན་དུ་སྦྱར་ཏེ། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དུ་གཟུང་བའམ། མི་གཟུང་བར་བྱ་བའི་ཕྱིར་བསྟན་པ་མ་ཡིན་ཞིང་། ལྷ་དག་ཆོས་འདི་ནི་རྒྱུན་དུ་ཞུགས་པའི་འབྲས་བུ་གཟུང་བའམ། མི་གཟུང་བར་བྱ་བའི་ཕྱིར་བསྟན་པ་མ་ཡིན། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་བྱང་ཆུབ་གཟུང་བའམ། མི་གཟུང་བར་བྱ་བའི་ཕྱིར་བསྟན་པ་མ་ཡིན། དེ་བཞིན་དུ་སྦྱར་ཏེ། རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་གཟུང་བའམ། མི་གཟུང་བར་བྱ་བའི་ཕྱིར་བསྟན་པ་མ་ཡིན་ན། ལྷ་དག་གང་ཟག་གང་དག་གཟུགས་གཟུང་བའམ། སྤང་བར་བྱ་བའི་ཕྱིར་སྤྱོད་པ་དང་། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་གཟུང་བའམ། སྤང་བར་བྱ་བའི་ཕྱིར་སྤྱོད་པ་དེ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་མི་ནུས་སོ། །དེ་དག་གིས་ནི་སྦྱིན་པའི་ཕ་རོལ་ཏུ་ཕྱིན་པ་བསྒོམ་པ་དང་། དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་མི་ནུས་སོ། །དེ་བཞིན་དུ་མིག་གཟུང་བའམ། སྤང་བར་བྱ་བའི་ཕྱིར་སྤྱོད་པ་དང་། དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་དང་། ཡིད་གཟུང་བའམ། སྤང་བར་བྱ་བའི་ཕྱིར་སྤྱོད་པ་དང་། དེ་བཞིན་དུ་གཟུགས་རྣམས་དང་། སྒྲ་རྣམས་དང་། དྲི་རྣམས་དང་། རོ་རྣམས་དང་། རེག་བྱ་རྣམས་དང་། ཆོས་རྣམས་གཟུང་བའམ། སྤང་བར་བྱ་བའི་ཕྱིར་སྤྱོད་པ་དང་། དེ་བཞིན་དུ་མིག་གི་ཁམས་དང་། གཟུགས་ཀྱི་ཁམས་དང་། མིག་གི་རྣམ་པར་ཤེས་པའི་ཁམས་གཟུང་བའམ། སྤང་བར་བྱ་བའི་ཕྱིར་སྤྱོད་པ་དང་།