ཆོས་ཐམས་ཅད་སྟོང་པ་ཉིད་དང་། རང་གི་མཚན་ཉིད་སྟོང་པ་ཉིད་དང་། མི་དམིགས་པ་སྟོང་པ་ཉིད་དང་། དངོས་པོ་མེད་པ་སྟོང་པ་ཉིད་དང་། ངོ་བོ་ཉིད་སྟོང་པ་ཉིད་དང་། དངོས་པོ་མེད་པའི་ངོ་བོ་ཉིད་སྟོང་པ་ཉིད་གཟུང་བའམ། མི་གཟུང་བར་བགྱི་བའི་སླད་དུ་བསྟན་པ་མ་ལགས། དེ་བཞིན་དུ་དྲན་པ་ཉེ་བར་གཞག་པ་རྣམས་གཟུང་བའམ། མི་གཟུང་བར་བགྱི་བའི་སླད་དུ་བསྟན་པ་མ་ལགས། ཡང་དག་པའི་སྤོང་བ་དང་། རྫུ་འཕྲུལ་གྱི་རྐང་པ་དང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། འཕགས་པའི་ལམ་ཡན་ལག་བརྒྱད་པ་གཟུང་བའམ། མི་གཟུང་བར་བགྱི་བའི་སླད་དུ་བསྟན་པ་མ་ལགས། དེ་བཞིན་དུ་དེ་བཞིན་གཤེགས་པའི་སྟོབས་བཅུ་གཟུང་བའམ། མི་གཟུང་བར་བགྱི་བའི་སླད་དུ་བསྟན་པ་མ་ལགས། དེ་བཞིན་དུ་སྦྱར་ཏེ། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དུ་གཟུང་བའམ། མི་གཟུང་བར་བགྱི་བའི་སླད་དུ་བསྟན་པ་མ་ལགས་པའི་སླད་དུའོ། །བཙུན་པ་བཅོམ་ལྡན་འདས་དེ་བཞིན་དུ་ཆོས་འདི་ནི་རྒྱུན་དུ་ཞུགས་པའི་འབྲས་བུ་གཟུང་བའམ། མི་གཟུང་བར་བགྱི་བའི་སླད་དུ་བསྟན་པ་མ་ལགས། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་བྱང་ཆུབ་དང་། རྣམ་པ་ཐམས་ཅད་མཁྱེན་པ་ཉིད་གཟུང་བའམ། མི་གཟུང་བར་བགྱི་བའི་སླད་དུ་བསྟན་པ་མ་ལགས་སོ། །བཙུན་པ་བཅོམ་ལྡན་འདས་འཇིག་རྟེན་ནི་བདག་གཟུགས་སོ། །དེ་བཞིན་དུ་བདག་ཚོར་བའོ། །བདག་འདུ་ཤེས་སོ། །བདག་འདུ་བྱེད་རྣམས་སོ། །བདག་གི་འདུ་བྱེད་རྣམས་སོ། །བདག་རྣམ་པར་ཤེས་པའོ། །དེ་བཞིན་དུ་བདག་མིག་གོ། །བདག་གི་མིག་གོ། །བདག་རྣ་བའོ། །བདག་གི་རྣ་བའོ། །སྣ་དང་། ལྕེ་དང་། ལུས་དང་། ཡིད་ཀྱང་དེ་བཞིན་ནོ། །དེ་བཞིན་དུ་བདག་ཅག་ནི་གཟུགས་རྣམས་སོ། །སྒྲ་དང་། དྲི་དང་། རོ་དང་། རེག་བྱ་རྣམས་ཀྱང་དེ་བཞིན་ནོ། །བདག་ཅག་ཆོས་རྣམས་སོ། །བདག་ཅག་གི་ཆོས་རྣམས་སོ།