།རབ་འབྱོར་རིན་པོ་ཆེའི་ཕ་རོལ་ཏུ་ཕྱིན་པ་འདི་ནི་ཆོས་གང་གིས་ཀྱང་གོས་པ་མེད་དོ། །དེ་ཅིའི་ཕྱིར་ཞེ་ན། རབ་འབྱོར་འདི་ལྟར་གང་དག་གིས་རིན་པོ་ཆེའི་ཕ་རོལ་ཏུ་ཕྱིན་པ་གོས་པར་འགྱུར་བའི་ཆོས་དམིགས་སུ་མེད་པའི་ཕྱིར་རོ། །རབ་འབྱོར་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན། དེ་ལྟར་ཡང་ཀུན་ཏུ་མི་འཛིན་ཅིང་། དེ་ལྟར་ཡང་རྣམ་པར་རྟོག་པར་མི་བྱེད་ལ། དེ་ལྟར་ཡང་སྤྲོས་པར་མི་བྱེད་ན། དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་ཏེ། སངས་རྒྱས་བཅོམ་ལྡན་འདས་རྣམས་ལ་བཀུར་སྟི་དང་། རི་མོ་དང་། མཆོད་པ་བྱེད་དུ་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བར་འགྱུར་ཞིང་། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བ་ན། སེམས་ཅན་འབུམ་དག་ཀྱང་ཡོངས་སུ་སྨིན་པར་བྱེད་ལ། སངས་རྒྱས་ཀྱི་ཞིང་ཡང་ཡོངས་སུ་དག་པར་བྱེད་པར་འགྱུར་རོ། །རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་ཆོས་གང་ཡང་སྟོན་པར་བྱེད་པའམ། མི་སྟོན་པར་བྱེད་པའམ། འཛིན་པར་བྱེད་པའམ། སྦྱིན་པར་བྱེད་པའམ། སྐྱེ་བར་བྱེད་པའམ། འགག་པར་བྱེད་པ་འམ། ཀུན་ནས་ཉོན་མོངས་པར་བྱེད་པའམ། རྣམ་པར་བྱང་བར་བྱེད་པའམ། འགྲིབ་པའམ། འཕེལ་བར་བྱེད་པར་འགྱུར་བ་མ་ཡིན་ནོ། །འདས་པ་ཡང་མ་ཡིན། མ་འོངས་པ་དང་། ད་ལྟར་བྱུང་བ་ཡང་མ་ཡིན་ནོ། །རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ནི། འདོད་པའི་ཁམས་ནས་འགྲོ་བར་བྱེད་པ་མ་ཡིན། འདོད་པའི་ཁམས་སུ་འཇོག་པར་བྱེད་པ་མ་ཡིན་ནོ། །གཟུགས་ཀྱི་ཁམས་ནས་འགྲོ་བར་བྱེད་པ་མ་ཡིན། གཟུགས་ཀྱི་ཁམས་སུ་འཇོག་པར་བྱེད་པ་མ་ཡིན་ནོ། །གཟུགས་མེད་པའི་ཁམས་ནས་འགྲོ་བར་བྱེད་པ་མ་ཡིན། གཟུགས་མེད་པའི་ཁམས་སུ་འཇོག་པར་བྱེད་པ་མ་ཡིན་ནོ། །སྦྱིན་པའི་ཕ་རོལ་ཏུ་ཕྱིན་པ་སྦྱིན་པར་བྱེད་པ་མ་ཡིན། འདོར་བར་བྱེད་པ་མ་ཡིན། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྦྱིན་པར་བྱེད་པ་མ་ཡིན། འདོར་བར་བྱེད་པ་མ་ཡིན།