Degé Kangyur volume 102, F.255.b

།ལུས་ནི་སྣུམ་གྱིས་གསར་དུ་བྱུགས་ཤིང་ཁྲག་དང་ཞག་མང་འཛག་པའི་ཐིག་ལེས་ཚོམ་བུར་བྲིས། །​མི་རོའི་ཤལ་སོ་ཡིས་ཆེམ་ཆེམ་གཅོད་བྱེད་ཐོད་པ་ཅན་ནི་བདག་ལ་སྐྱོང་གྱུར་ཅིག །​དྲག་པའི་དྲག་མོ་མི་བཟད་མི་ཤ་ཁ་ན་ཐོགས་པ་སྔ་ན་མ་བྱུང་ཁྱོད་མཐོང་ན། །​མ་མོ་རྣམས་ཀྱང་སྐྲག་ཅིང་རྟབས་ལ་རྔམ་པ་འཐོན་ཅིང་མིག་རྩ་རིག་རིག་ཁྱོད་ལ་འདུད། །​ནག་མོ་བཟང་མོ་ལུས་མདོག་གནག་ཅིང་བཟོད་པར་དཀའ་བ་ཁྱོད་ལ་བརྒྱ་བྱིན་ལ་སོགས་ཀྱང་། །​ཉིན་གཅིག་བཞིན་དུ་སྟོད་པར་བྱེད་ཅིང་གཤིན་རྗེ་ཉིད་ཀྱང་འདར་བཞིན་རྟག་ཏུ་འདུད་པར་བྱེད། །​མི་རྣམས་དང་ནི་འགྲོ་བ་མ་ལུས་པ་དག་མཇུག་བརྟུལ་བས་ནི་རྣ་བ་ཡ་གཅིག་ལ། །བྲང་གིས་འགྲོ་བའི་མགོ་བོས་གདེངས་ཀ་སྟོང་དང་ལྡན་པ་ཁྱབ་གནས་རྒྱན་ཏུ་བྱས། །​ཡ་གཅིག་ལ་ནི་སེང་གེ་མཚུངས་མེད་ཐོགས་ཤིང་རྒྱ་མཚོས་བསྐོར་བའི་ས་གཞི་ནོན། །​སྟེང་ནས་རྒྱུ་བའི་ཉི་མའི་འོད་ཟེར་སྟོང་ལྡན་ཁྱོད་ཀྱིས་ལྟེ་བའི་ཕྱོགས་སུ་བཞག །​རྒྱ་མཚོའི་ཀློང་ནས་མེ་འབར་ཁྱོད། །​ཆུ་རྣམས་སྐེམས་པར་ནུས་པ་སྟེ། །​བུད་མེད་ཐམས་ཅད་ཞི་མཛད་ཕྱིར། །​ལྷ་ཆེན་སྐུ་ཡི་ཕྱེད་དུ་བཞུགས། །​རྫོངས་དང་དཀའ་ཟློག་ནམ་མོ་ཆེ། །​ལྷ་དང་ལྷ་མིན་ཕྱག་བྱས་པ། །​མི་ནད་གང་ཡིན་ཁྱོད་ཀྱིས་ཤེས། །​དེ་ལ་འཇིགས་པ་མེད་པར་འགྱུར། །​གཤིན་རྗེའི་ལྕམ་མོ་བདུད་ཀྱི་ཡུམ། །​འདོད་པའི་ཁམས་ཀྱི་དབང་ཕྱུག་མ། །​ནད་དོ་ཅོག་གི་བདག་མོ་སྟེ། །​ལྷ་མོ་ཆེན་མོ་ལ་བསྟོད་པ་བརྒྱད་པ། བྲམ་ཟེ་མཆོག་སྲེད་ཀྱིས་བྱས་པ་རྫོགས་སྷོ།​། །​།༄༅། །​ལྷ་མོ་ནམ་གྲུ་ལ་བསྟོད་པ། དཀོན་མཆོག་གསུམ་ལ་ཕྱག་འཚལ་ལོ། །​འཕགས་པ་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །​ལྷ་མོ་ཆེན་མོ་རེ་མ་ཏི་ལ་ཕྱག་འཚལ་ལོ། །​ནམ་གྲུ་དག་གི་ཆོ་འབྲང་དང་། །​མཚན་ཉིད་དག་ནི་བཤད་བྱ་ན། །ནོར་བུའི་རང་བཞིན་ཁྱོད་ཀྱི་ལུས། རྒྱབ་ནི་འཛམ་བུ་ཆུ་བོའི་གསེར། །​ཁྱོད་ཀྱི་གདོང་ནི་དངུལ་ཡིན་ཏེ། །​ལྟོ་བའི་ངོས་ནི་རྡོ་རྗེས་བལྟམ། །​མིང་པོ་མཛོད་དང་མཛོད་བདག་པོ། །​ཁྱོད་ཀྱི་མ་ནི་ཀུན་འགྲོ་མ། །​ཁྱོད་ཀྱི་ཕ་ནི་རླུང་ཞེས་བྱ། །​སྐལ་ལྡན་ཤིང་རྟ་ཁྱོད་ཀྱི་རུས།