།ཡེ་ཤེས་ཞེས་བྱ་བ་ནི་ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པ་དང་། གནས་དང་གནས་མ་ཡིན་པ་རྣམ་པར་དཔྱད་པ་ལ་མཁས་པ་སྟེ། རིགས་ཀྱི་བུ་དེའི་ཕྱིར་ཡེ་ཤེས་ནི་ལྡན་པ་ཞེས་བྱ་སྟེ། །མི་ལྡན་པ་མ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་པ་རྣམ་པ་བཅུ་སྟེ། རྣམ་པ་བཅུ་གང་ཞེ་ན། འདི་ལྟ་སྟེ། རྒྱུ་ཤེས་པ་དང་། འབྲས་བུ་ཤེས་པ་དང་། དོན་ཤེས་པ་དང་། ཐབས་ཤེས་པ་དང་། ཤེས་རབ་ཤེས་པ་དང་། བསྡུ་བ་ཤེས་པ་དང་། ཕ་རོལ་ཏུ་ཕྱིན་པ་ཤེས་པ་དང་། སྙིང་རྗེ་ཆེན་པོ་ཤེས་པ་དང་། སེམས་ཅན་ཡོངས་སུ་སྨིན་པར་བྱ་བ་ཤེས་པ་དང་། ཆོས་ཐམས་ཅད་ལ་མངོན་པར་ཞེན་པ་མེད་པར་ཤེས་པ་སྟེ། རིགས་ཀྱི་བུ་རྣམ་པ་དེ་བཅུ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་པའོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྩོམ་པ་རྣམ་པ་བཅུ་སྟེ། རྣམ་པ་བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་ལུས་ཀྱི་ལས་ཡོངས་སུ་སྦྱང་བའི་ཕྱིར་ལུས་ཀྱི་རྩོམ་པ་དང་། སེམས་ཅན་ཐམས་ཅད་ཀྱི་ངག་གི་ལས་ཡོངས་སུ་སྦྱང་བའི་ཕྱིར་ངག་གི་རྩོམ་པ་དང་། སེམས་ཅན་ཐམས་ཅད་ཀྱི་ཡིད་ཀྱི་ལས་ཡོངས་སུ་སྦྱང་བའི་ཕྱིར་སེམས་ཀྱི་རྩོམ་པ་དང་། སེམས་ཅན་ཐམས་ཅད་ལ་མངོན་པར་ཞེན་པ་མེད་པར་བྱ་བའི་ཕྱིར་ནང་གི་རྩོམ་པ་དང་། སེམས་ཅན་ཐམས་ཅད་ལ་མཚུངས་པར་སྦྱར་བར་བྱ་བའི་ཕྱིར་ཕྱིའི་རྩོམ་པ་དང་། སངས་རྒྱས་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་ཕྱིར་ཡེ་ཤེས་ཀྱི་རྩོམ་པ་དང་། སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་བཀོད་པ་ཀུན་ཏུ་བསྟན་པའི་ཕྱིར་ཞིང་གི་རྩོམ་པ་དང་། ཉོན་མོངས་པའི་ནད་ཀྱི་སྨན་ཡོངས་སུ་ཤེས་པར་བྱ་བའི་ཕྱིར་སེམས་ཅན་ཡོངས་སུ་སྨིན་པར་བྱ་བའི་རྩོམ་པ་དང་། ངེས་པའི་ཕུང་པོ་ཡོངས་སུ་རྫོགས་པར་བྱ་བའི་ཕྱིར་དེ་ཁོ་ནའི་རྩོམ་པ་དང་། ཁམས་གསུམ་པ་ཐམས་ཅད་ལ་སེམས་མངོན་པར་ཞེན་པ་མེད་པར་བྱ་བའི་ཕྱིར་འདུས་མ་བྱས་ཀྱི་ཡེ་ཤེས་ཡོངས་སུ་རྫོགས་པར་བྱ་བའི་རྩོམ་པ་སྟེ།