།སེམས་ཅན་ཀུན་གྱིས་ཤེས་པར་ཡོང་མི་ནུས། །དེ་ནི་ཚེ་རབས་ཀུན་ཏུ་རྒྱལ་བ་མཐོང་། །དེ་དག་ལ་ཡང་དད་པ་བསམ་ཡས་རྙེད། །མདོ་སྡེ་ཟབ་མོའི་ཚུལ་ཡང་ཤེས་པར་འགྱུར། །དེ་ནི་མྱུར་དུ་བྱང་ཆུབ་མཆོག་འཚང་རྒྱ། །བླ་མེད་བྱང་ཆུབ་མ་རེག་བར་དུ་ཡང་། །དེ་ནི་ཏིང་ངེ་འཛིན་དང་མངོན་ཤེས་དང་། །གཟུངས་རྣམས་དང་ནི་གཟུགས་དང་ལོངས་སྤྱོད་དང་། །སངས་རྒྱས་མཐོང་ལས་ཉམས་པར་ཡོང་མི་འགྱུར། །རྗེས་སུ་དྲན་པ་སྔོན་གྱི་ཚེ་རབས་ན། །ཚོང་དཔོན་བུས་ནི་གཟུངས་འདི་ཐོས་གྱུར་ནས། །སངས་རྒྱས་གང་གཱའི་བྱེ་སྙེད་མཐོང་གྱུར་ཏེ། །དེས་ནི་འདོད་བཞིན་བྱང་ཆུབ་རྣམས་སངས་རྒྱས། །མར་མེ་མཛད་པ་དེ་ཚེ་ཚོང་དཔོན་བུ། །སྔོན་གྱི་ཚེ་རབས་འོད་ཟེར་མཐའ་ཡས་གྱུར། །དེ་ཚེ་ཆོས་སྨྲ་སངས་རྒྱས་ཚེ་དཔག་མེད། །ང་ནི་བསྐལ་པ་བཟང་དང་བཅས་ཡི་རང་། །བྱང་ཆུབ་མྱུར་དུ་རེག་པར་སུ་འདོད་དང་། །བདུད་རྣམས་མྱུར་དུ་གཞོམ་པར་སུ་འདོད་དང་། །བསོད་ནམས་བརྒྱ་ཡི་མཚན་བཟང་སུ་འདོད་པ། །འདི་ལ་བརྩོན་ན་རྙེད་པར་དཀའ་མི་འགྱུར། །གང་གཱའི་ཀླུང་གི་བྱེ་སྙེད་འཇིག་རྟེན་ཁམས། །གང་གིས་རིན་ཆེན་བཀང་སྟེ་སྦྱིན་བྱིན་ཡང་། །བྲིས་དང་བཟུང་བའི་བསོད་ནམས་གང་ཡིན་པ། །དེ་ལ་སྦྱིན་པས་དཔེར་ཡང་མི་འགྱུར་རོ། །དེ་ལྟར་ཐོས་ནས་རྩེ་གཅིག་བག་ཡོད་པར། །བྱང་ཆུབ་སེམས་དཔའ་མཁས་པས་འདི་བཟུང་ངམ། །གཟུངས་འདི་བྲིས་ཤིང་སེམས་པ་དེ་དག་ནི། །བྱང་ཆུབ་རྙེད་པ་དཀའ་བ་མེད་པར་བཤད། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་སྒོ་མཐའ་ཡས་པས་སྒྲུབ་པའི་གཟུངས་འདི་ལ་མངོན་པར་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ལུས་ལ། གངས་ལ་གནས་པའི་གནོད་སྦྱིན་བརྒྱད་གཟི་བརྗིད་དང་མདངས་འཇུག་ཅིང་ཉིན་མཚན་དུ་སྲུང་བ་དང་། སྐྱོབ་པ་དང་། སྦེད་པར་བྱེད་དོ།