།དེ་ལྟར་བྱས་ན་བསོད་ནམས་ཀྱི་ཕུང་པོ་དང་ལྡན་པར་འགྱུར་ཏེ། ཚེ་ཡང་རིང་བར་འགྱུར་རོ། །དེ་བཞིན་གཤེགས་པ་བྱེ་བ་ཕྲག་འབུམ་གྱི་བསོད་ནམས་ཀྱི་ཕུང་པོ་དང་ལྡན་པར་འགྱུར་རོ། །རྟག་ཏུ་མི་མ་ཡིན་པ་རྒྱུ་བ་འབྱུང་པོ་དང་། ཤ་ཟ་ལ་སོགས་པ་དང་། གནོད་སྦྱིན་དང་། སྲིན་པོ་དང་། གདོན་དང་། ཡི་དགས་རྣམས་ཀྱིས་མི་མཐོང་བར་འགྱུར་རོ། །སྟོབས་དང་། བརྩོན་འགྲུས་དང་ཡང་ལྡན་པར་འགྱུར་རོ། །གཟུགས་དང་ལྡན་པ་དང་། གཟི་བརྗིད་དང་ལྡན་པ་དང་། དྲན་པ་དང་ལྡན་པར་ཡང་འགྱུར་རོ། །བྲམ་ཟེའི་དྲང་སྲོང་ཚིམ་པར་བྱེད་འདོད་པ་དེས་ནི་མཆོད་ཡོན་དང་། དབུལ་བར་བྱ་བ་སྣོད་བཀང་བ་ལ་ལན་བདུན་བཟླས་བརྗོད་བྱས་ལ་འབབ་ཆུ་ག་ལ་ཡོད་པའི་གནས་དེར་སྦྱིན་པར་བྱའོ། །དེ་ལྟར་བྱས་ན་བྲམ་ཟེའི་དྲང་སྲོང་གང་གཱའི་ཀླུང་བྱེ་བ་ཁྲག་ཁྲིག་འབུམ་ཕྲག་དུ་མའི་བྱེ་མ་སྙེད་དག་ལྷའི་བཟའ་བ་དང་བཏུང་བ་རྣམས་ཀྱིས་ཚིམ་པར་བྱས་པར་འགྱུར་རོ། །བྲམ་ཟེའི་དྲང་སྲོང་དེ་དག་ཀྱང་དབང་བོ་ཚིམ་པར་འགྱུར་ཏེ། དེ་དག་ཐམས་ཅད་ཀྱིས་ཨོཾ་བདེ་ལེགས་སུ་གྱུར་ཅིག་ཅེས་བྱ་བའི་སྒྲ་འབྱིན་པར་བྱེད་ལ། སེམས་ཅན་དེ་དག་ཀྱང་བསམ་པ་ཡོངས་སུ་དག་པར་འགྱུར་ཏེ། བྲམ་ཟེའི་གཟི་བརྗིད་དང་ལྡན་པར་འགྱུར་རོ། །རྟག་ཏུ་ཚངས་བར་སྤྱོད་པར་ཡང་འགྱུར་རོ། །དེ་བཞིན་གཤེགས་པ་གང་གཱའི་ཀླུང་བྱེ་བ་ཁྲག་ཁྲིག་ཕྲག་འབུམ་གྱི་བྱེ་མ་སྙེད་དག་གིས་དགེ་བའི་རྩ་བ་དང་ལྡན་པར་ཡང་འགྱུར་རོ། །རྟག་ཏུ་དགྲ་ཐམས་ཅད་ཤིགས་པར་འགྱུར་རོ། །མེ་ཏོག་གམ། བདུག་པའམ། སྤོས་སམ། ཟས་དང་། སྐོམ་གྱི་ཡོ་བྱད་ལ་ལན་ཉི་ཤུ་རྩ་གཅིག་བཟླས་བརྗོད་བྱས་ལ་སངས་རྒྱས་དང་། ཆོས་དང་། དགེ་འདུན་ལ་དབུལ་བར་བྱའོ། །དེ་ལྟར་བྱས་ན་རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་དེས་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་གི་སངས་རྒྱས་དང་། ཆོས་དང་། དགེ་འདུན་ལ་ལྷའི་མཆོད་པ་དང་། དེ་བཞིན་གཤེགས་པའི་མཆོད་པའི་མཆོག་གིས་མཆོད་པ་བྱས་པར་འགྱུར་རོ།