Degé Kangyur volume 48, F.284.a

ཁ་དོག་དུ་མ་དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་སྣང་བར་བྱས་ཏེ། ཚངས་པའི་འཇིག་རྟེན་གྱི་བར་དུ་མངོན་པར་བྱུང་ནས། ཟླ་བ་དང་ཉི་མ་རྣམས་ཀྱི་འོད་མོག་མོག་པོར་བྱས་ཏེ། སླར་ལོག་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །​དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་དོན་དེ་ཞུས་པ། བལྟ་སྡུག་བལྟར་འོས་གཟུགས་དང་མཚན་རྣམས་དང་། །དཔེ་བྱད་བཟང་པོ་རྣམས་ཀྱིས་རབ་མཛེས་ཤིང་། །​འོད་ཀྱི་དཀྱིལ་འཁོར་འོད་ཀྱིས་འོད་མཛེས་པ། །​འཛུམ་པ་མཛད་དེ་བདག་ལ་བསྟན་དུ་གསོལ། །​ཚུལ་ཁྲིམས་འཕགས་ཤིང་སྤྱོད་པ་ལེགས་སྤྱད་པ། །​ཏིང་འཛིན་ཤེས་རབ་བསགས་པའི་ཡེ་ཤེས་འོད། །​རྣམ་གྲོལ་སྙིང་པོ་སྟོབས་ལྡན་ཡང་དག་གཟིགས། །​འཛུམ་པ་མཛད་དེ་བདག་ལ་བསྟན་དུ་གསོལ། །​བཟོད་པའི་སྟོབས་ལྡན་སྟོབས་ཀྱི་ཤུགས་མངའ་བ། །​བརྩོན་འགྲུས་མངོན་པར་འཕགས་ཏེ་མི་བསྐྱོད་པ། །​མིག་ཏུ་སྡུག་ཅིང་བདེན་པ་བཞི་གཟིགས་པ། །​འཛུམ་པ་མཛད་དེ་བདག་ལ་བསྟན་དུ་གསོལ། །​རྡོ་རྗེའི་སྐུ་མངའ་སྲ་བརྟན་མི་ཤིགས་པ། །​སྲེད་མེད་བུ་མཐུ་སྲེད་མེད་བུ་བས་མཆོག །​ཚངས་དབྱངས་སྒྲ་སྙན་འཇམ་པའི་དབྱངས་ལྡན་པ། །​འཛུམ་པ་མཛད་དེ་བདག་ལ་བསྟན་དུ་གསོལ། །​བཞུགས་ཀྱང་ཚངས་དང་དེ་བཞིན་ལྷ་ཚོགས་ཀྱིས། །​དེ་བཞིན་གཤེགས་པའི་སྤྱི་གཙུག་མ་མཐོང་ལ། །​གུས་དང་བཅས་པས་ཀུན་ནས་བལྟ་བགྱིད་པ། །​འཛུམ་པ་མཛད་དེ་བདག་ལ་བསྟན་དུ་གསོལ། །​ཁྱོད་ཀྱིས་ཆོས་ཀྱི་འཁོར་ལོ་དམ་པ་བསྐོར། །​མི་རྟག་སྒྲས་ནི་ལྷ་དང་ལྷ་མིན་དང་། །​དེ་བཞིན་ཀླུ་དང་གནོད་སྦྱིན་རབ་བསྐྱོད་པ། །​འཛུམ་པ་མཛད་དེ་བདག་ལ་བསྟན་དུ་གསོལ། །​སྣང་བ་མཉེས་ཤིང་མུན་པ་རྣམས་བྲལ་བ། །​ཀུན་ནས་སྤྱན་མངའ་མཉམ་པ་ཉིད་བཞུགས་པ། །​ཡོན་ཏན་མཆོག་མངའ་ཡོན་ཏན་སྙིང་པོ་བསྟན། །​འཛུམ་པ་མཛད་དེ་བདག་ལ་བསྟན་དུ་གསོལ། །



The English translation of this folio by 84000 - Translating the words of the Buddha can be found at:
https://read.84000.co/translation/toh103.html?part=UT22084-048-003-343#UT22084-048-003-343