གྲོང་ཡིད་ལ་བྱེད་པ་དང་། གྲོང་ཁྱེར་ཡིད་ལ་བྱེད་པ་དང་། རྒྱལ་པོའི་ཕོ་བྲང་ཡིད་ལ་བྱེད་པ་དང་། ཡུལ་ཡིད་ལ་བྱེད་པ་དང་། བླ་མ་དང་མཁན་པོ་ཡིད་ལ་བྱེད་པ་དང་། ཕ་མ་དང་ཕུ་ནུ་དང་། སྲིང་མོ་དང་ཉེ་དུ་དང་སྣག་གི་གཉེན་མཚམས་དང་ལྡན་པའི་ཡིད་ལ་བྱེད་པ་དག་དང་། རྐུན་པོ་ཡིད་ལ་བྱེད་པ་དང་། གདོལ་པ་དང་ལྡན་པ་ཡིད་ལ་བྱེད་པ་དག་དང་། འཇིག་རྟེན་དང་ལྡན་པ་དང་། སྨད་འཚོང་མ་དང་ལྡན་པའི་རྣམ་པར་རྟོག་པ་ཡིད་ལ་བྱེད་པ་འདི་དག་དང་། ཡིད་ལ་བྱེད་པ་གཞན་དག་འབྱུང་བར་འགྱུར་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ལུང་ནོད་པ་དང་། ཁ་ཏོན་དུ་བྱེད་པ་དང་། ཚུལ་བཞིན་དུ་ཡིད་ལ་བྱེད་པ་ན། བདུད་སྡིག་ཅན་བར་ཆད་དང་རྣམ་པར་གཡེང་བ་དག་ཉེ་བར་སྒྲུབ་པར་འགྱུར་བས་ན། རབ་འབྱོར་དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར་གཞན་ཡང་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་རིགས་ཀྱི་བུ་མོ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཡི་གེར་འདྲི་བའི་ཚེ། རྙེད་པ་དང་བཀུར་སྟི་དང་ཚིགས་སུ་བཅད་པ་དག་དང་། གོས་དང་ཟས་དང་མལ་ཆ་དང་སྟན་དང་ནད་ཀྱི་གསོས་སྨན་དང་། ཡོ་བྱད་དག་འབྱུང་བར་འགྱུར་ཞིང་། བྱང་ཆུབ་སེམས་དཔའ་དང་རིགས་ཀྱི་བུ་དང་རིགས་ཀྱི་བུ་མོ་དག་དེའི་རོ་མྱོང་བར་བྱེད་ལ། ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཡི་གེར་འདྲི་བར་བྱེད། ལུང་ནོད་པར་བྱེད། ཁ་ཏོན་དུ་བྱེད། ཚུལ་བཞིན་དུ་ཡིད་ལ་བྱེད་ན། རབ་འབྱོར་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཡི་གེར་འདྲི་བ་དང་། ལུང་ནོད་པ་དང་ཁ་ཏོན་དུ་བྱེད་པ་དང་། ཚུལ་བཞིན་དུ་ཡིད་ལ་བྱེད་པའི་ཚེ། བདུད་སྡིག་ཅན་མདོ་སྡེ་ཟབ་མོ་དག་ཉེ་བར་སྒྲུབ་པར་བྱེད་ན། དེ་ལ་བྱང་ཆུབ་སེམས་དཔའ་ཐབས་ལ་མཁས་པ་དག་གིས་བདུད་ཀྱིས་ཉེ་བར་བསྒྲུབས་པའི་མདོ་སྡེ་ཟབ་མོ་དེ་དག་ལ་དགའ་བ་བསྐྱེད་པར་མི་བྱའོ། །དེ་ཅིའི་ཕྱིར་ཞེ་ན། རབ་འབྱོར་མདོ་སྡེ་དེ་དག་ནི་རྣམ་པ་ཐམས་ཅད་མཁྱེན་པ་ཉིད་ཐོབ་པར་བྱེད་པ་མ་ཡིན་པའི་ཕྱིར་རོ།