རབ་འབྱོར་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར་འདི་ལྟ་སྟེ་དཔེར་ན། ཤིང་མཁན་ནམ། ཤིང་མཁན་གྱི་སློབ་མ་མཁས་པ་ཞིག་ཁང་བཟངས་རྣམ་པར་རྒྱལ་བྱེད་ཀྱི་ཚད་ཙམ་གྱི་ཁང་བཟངས་ཤིག་རྩིག་འདོད་པར་གྱུར་ལ། དེས་ཉི་མ་དང་ཟླ་བའི་དཀྱིལ་འཁོར་དག་ལས་ཚད་བླང་བར་སེམས་ན། རབ་འབྱོར་འདི་ཇི་སྙམ་དུ་སེམས། ཁང་བཟངས་རྣམ་པར་རྒྱལ་བྱེད་ལ་དཔྱད་ནས། རྣམ་པར་རྒྱལ་བྱེད་དང་མཉམ་པའི་ཁང་བཟངས་རྩིག་པར་འདོད་ལ། ཉི་མ་དང་ཟླ་བའི་གཞལ་མེད་ཁང་གི་དཀྱིལ་འཁོར་དག་ལས་ཚད་ལེན་པའི་མི་དེ་མཁས་པའི་རང་བཞིན་ཅན་ཞིག་ཡིན་སྙམའམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་བཞིན་དུ་མ་འོངས་པའི་དུས་ན་འབྱུང་བའི་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་རིགས་ཀྱི་བུ་མོ་གང་ལ་ལ་དག་གིས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཐོས་སམ། རྙེད་ནས་དེ་སྤངས་ཤིང་བོར་ཏེ། ཉན་ཐོས་དང་། རང་སངས་རྒྱས་ཀྱི་ཐེག་པ་དང་ལྡན་པའི་མདོ་སྡེ་དག་ལས་རྣམ་པ་ཐམས་ཅད་མཁྱེན་པ་ཉིད་བཙལ་བར་སེམས་ན། རབ་འབྱོར་འདི་ཇི་སྙམ་དུ་སེམས། བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དང་རིགས་ཀྱི་བུ་མོ་དེ་དག་མཁས་པའི་རང་བཞིན་ཅན་ཡིན་སྙམ་འམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་བདུད་ཀྱི་ལས་སུ་རིག་པར་བྱའོ། །རབ་འབྱོར་གཞན་ཡང་འདི་ལྟ་སྟེ་དཔེར་ན། མི་ལ་ལ་ཞིག་འཁོར་ལོས་སྒྱུར་བའི་རྒྱལ་པོ་ལྟ་འདོད་པར་གྱུར་ལ། དེས་མཁར་གྱི་རྒྱལ་པོ་མཐོང་ནས། འདི་སྙམ་དུ་འཁོར་ལོས་སྒྱུར་བའི་རྒྱལ་པོའི་ཁ་དོག་དང་། དབྱིབས་ཀྱང་མཁར་གྱི་རྒྱལ་པོ་འདི་ཅི་འདྲ་བ་དེ་ལྟ་བུ་ཞིག་ཡིན་ནོ་སྙམ་ནས་དེ་མཁར་གྱི་རྒྱལ་པོའི་ཁ་དོག་དང་། དབྱིབས་དང་། ཆ་ལུགས་དང་། མཚན་མ་དང་། རྟགས་དག་བཟུང་ནས་འདི་སྐད་དུ་འཁོར་ལོས་སྒྱུར་བའི་རྒྱལ་པོའི་ཁ་དོག་དང་། དབྱིབས་དང་། ཆ་ལུགས་དང་། མཚན་མ་དང་། རྟགས་ཀྱི་ཁྱད་པར་དག་ཀྱང་འདི་འདྲའོ་ཞེས་ཟེར་ན།