Degé Kangyur volume 30, F.85.a

པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་སྦྱིན་པར་བྱེད་པ་ཡང་མ་ཡིན། འདོར་བར་བྱེད་པ་ཡང་མ་ཡིན། རྒྱུན་ཏུ་ཞུགས་པའི་འབྲས་བུ་སྦྱིན་པར་བྱེད་པ་ཡང་མ་ཡིན། འདོར་བར་བྱེད་པ་ཡང་མ་ཡིན། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པ་ཉིད་དང་། རང་སངས་རྒྱས་ཉིད་དང་། རྣམ་པ་ཐམས་ཅད་མཁྱེན་པ་ཉིད་སྦྱིན་པར་བྱེད་པ་ཡང་མ་ཡིན། འདོར་བར་བྱེད་པ་ཡང་མ་ཡིན་ནོ། །​ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་སངས་རྒྱས་ཀྱི་ཆོས་རྣམས་སྦྱིན་པར་བྱེད་པ་ཡང་མ་ཡིན། འདོར་བར་བྱེད་པ་ཡང་མ་ཡིན། སོ་སོའི་སྐྱེ་བོའི་ཆོས་རྣམས་སྦྱིན་པར་བྱེད་པ་ཡང་མ་ཡིན། འདོར་བར་བྱེད་པ་ཡང་མ་ཡིན། ཉན་ཐོས་དང་། རང་སངས་རྒྱས་ཀྱི་ཆོས་རྣམས་སྦྱིན་པར་བྱེད་པ་ཡང་མ་ཡིན། འདོར་བར་བྱེད་པ་ཡང་མ་ཡིན། སངས་རྒྱས་ཀྱི་ཆོས་རྣམས་སྦྱིན་པར་བྱེད་པ་ཡང་མ་ཡིན། འདོར་བར་བྱེད་པ་ཡང་མ་ཡིན་ནོ། །​རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ནི་འདུས་བྱས་ཀྱི་ཁམས་འདོར་བར་བྱེད་པ་ཡང་མ་ཡིན། འདུས་མ་བྱས་ཀྱི་ཁམས་སྦྱིན་པར་བྱེད་པ་ཡང་མ་ཡིན་ནོ། །​དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་བྱུང་ཡང་རུང་། དེ་བཞིན་གཤེགས་པ་རྣམས་མ་བྱུང་ཡང་རུང་། ཆོས་ཀྱི་དབྱིངས་ཀྱི་ཚུལ་འདི་ནི་གནས་པ་ཉིད་དེ། དེ་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ཤིང་མངོན་པར་ཐུགས་སུ་ཆུད་དེ། མངོན་པར་རྫོགས་པར་སངས་རྒྱས་ཤིང་། མངོན་པར་ཐུགས་སུ་ཆུད་ནས་ཀྱང་། གསུང་བ་དང་། རྣམ་པར་འགྲེལ་བ་དང་། རྣམ་པར་འབྱེད་པ་དང་། སྟོན་པར་མཛད་པའི་ཕྱིར་རོ། །​དེ་ནས་ལྷའི་བུ་འབུམ་ཕྲག་རབ་ཏུ་མང་པོ་དག་སྟེང་གི་བར་སྣང་ལ་འཁོད་ནས། ཅ་ཅོ་དང་། ག་ཞ་འདོན་ཅིང་། ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ད་དང་། པད་མ་དཀར་པོ་དང་། མན་དར་བ་དག་གིས་གཏོར་ནས། འདི་སྐད་དུ། ཨ་ལ་ལ་འཛམ་བུའི་གླིང་དུ་ཆོས་ཀྱི་འཁོར་ལོ་ལན་གཉིས་བསྐོར་བ་འདི་མཐོང་ངོ་། །​ཞེས་ཚིག་ཏུ་ཡང་བརྗོད་དོ། །​ཤེས་རབ་ཀྱི་ཕ་རོལ་ཏུ་ཕྱིན་པ་འདི་བསྟན་པ་ན། དེ་ལས་ལྷའི་བུ་སྟོང་ཕྲག་དུ་མ་དག་



The English translation of this folio by 84000 Translating the words of the Buddha can be found at:
https://read.84000.co/translation/toh10.html?part=UT22084-029-001-12147#UT22084-029-001-12147