བཙུན་པ་རབ་འབྱོར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ནི་སངས་རྒྱས་བཅོམ་ལྡན་འདས་དེ་དག་དང་། དགེ་བའི་རྩ་བ་དེ་དག་དང་། མངོན་པར་འདུ་བྱེད་པ་དེ་དག་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བ་གང་ཡིན་པའི་སེམས་བསྐྱེད་པ་དེ་དག་ཀྱང་མེད་པ་ཡིན་ན། འདི་སྐྱོན་དུ་མི་འགྱུར་རམ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་དེས་ནི་འདི་ལྟར་རྣམ་པར་བརྟག་པར་བྱ་སྟེ། སྐུ་དེ་དག་དང་། དགེ་བའི་རྩ་བ་དེ་དག་དང་། མངོན་པར་འདུ་མཛད་པ་དེ་དག་ནི་འགགས་པ་ཡིན་ན། འོན་ཀྱང་མཚན་མར་བཟུང་ནས་རྣམ་པར་རྟོག་པར་བྱེད་དེ། སངས་རྒྱས་བཅོམ་ལྡན་འདས་དེ་དག་དང་། དགེ་བའི་རྩ་བ་དེ་དག་དང་། མངོན་པར་འདུ་མཛད་པ་དེ་དག་དང་། སེམས་བསྐྱེད་པ་དེ་དག་མཚན་མར་བཟུང་ནས། རྣམ་པར་རྟོག་པར་བྱེད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ནི། དེ་ལྟར་མཚན་མའི་ཚུལ་གྱིས་ཡོངས་སུ་སྔོ་བ་ལ་རྗེས་སུ་ཡི་རང་བར་གནང་བར་མི་མཛད་དོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་པ་དག་མཚན་མར་འཛིན་ཅིང་རྣམ་པར་བརྟགས་ནས། དམིགས་པ་གང་ཡིན་པ་དེ་ཉིད་དེའི་དམིགས་པ་ཆེན་པོ་ཡིན་པའི་ཕྱིར་རོ། །དེ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་སྔོ་བར་འདོད་པས་ནི་དམིགས་ནས་མཚན་མར་བཟུང་སྟེ། ཡོངས་སུ་བསྔོ་བར་མི་བྱའོ། །དམིགས་པའི་འདུ་ཤེས་དང་། མཚན་མའི་འདུ་ཤེས་ཀྱིས་ཡོངས་སུ་སྔོ་བ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་དོན་ཆེ་བར་མ་གསུངས་སོ། །དེ་ཅིའི་ཕྱིར་ཞེ་ན། བསྔོ་བ་དེ་ནི་དུག་དང་བཅས་པ། ཟུག་རྔུ་དང་བཅས་པ་ཡིན་པའི་ཕྱིར་རོ། །འདི་ལྟ་སྟེ་དཔེར་ན། ཁ་ཟས་བསོད་པ། དུག་དང་སྦྱར་བ། ཁ་དོག་དང་། དྲི་དང་ལྡན་པ་དེ་ལ་བྱིས་པའི་རང་བཞིན་ཅན་གྱི་མིས་བཟའ་བར་བསམས་ནས། དེས་དེ་ཟ་བ་ན་ཁ་དོག་དང་དྲིས་ཀྱང་དགའ་བར་བྱེད་ལ། ཞུ་བའི་ཚེ་ནི་སྡུག་བསྔལ་བའི་རྣམ་པར་སྨིན་པར་འགྱུར་རོ། །དེ་བཞིན་དུ་འདི་ལ་ཁ་ཅིག་ལོག་པར་ཟིན་པ་དང་།