ཐེག་པ་ཆེན་པོ་པ་གང་ཡིན་པ་དེས་དེ་སྐད་དུ་སྨྲས་ཏེ། སེམས་ཀྱིས་དེ་ལྟར་ཡོངས་སུ་སྔོ་བར་བྱེད་ན། དམིགས་པ་གང་དང་། དངོས་པོ་གང་དག་གིས་སེམས་དེ་བསྐྱེད་པའི་དངོས་པོ་དེ་དག་དང་། དམིགས་པ་དེ་དག་རིགས་ཀྱི་བུ་དེ་དག་གིས་ཇི་ལྟར་མཚན་མར་བཟུང་བ་དེ་བཞིན་དུ་ཡོད་ཅིང་དམིགས་པ་ཞིག་ཡིན་ནམ། བྱམས་པས་སྨྲས་པ། བཙུན་པ་རབ་འབྱོར་གྱིས་དངོས་པོ་དེ་དག་དང་། དམིགས་པ་དེ་དག་ནི་ཐེག་པ་ཆེན་པོ་པའི་རིགས་ཀྱི་བུ་དེ་དག་གིས་ཇི་ལྟར་མཚན་མར་བཟུང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པ་བཞིན་དུ་ཡོད་པ་མ་ཡིན་ཞིང་དམིགས་སུ་མེད་དོ། །རབ་འབྱོར་གྱིས་སྨྲས་པ། གལ་ཏེ་དངོས་པོ་མེད་པ་ལ་དམིགས་པ་མེད་པ་དག་གིས་ཕྱོགས་བཅུའི་འཇིག་རྟེན་གྱི་ཁམས་རབ་འབྱམ་ཐམས་ཅད་ན། སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་མཚན་མར་བཟུང་ནས། དེ་དག་གིས་ཐུགས་དང་པོ་བསྐྱེད་པ་ནས་བཟུང་སྟེ། དམ་པའི་ཆོས་གནས་པའི་བར་གྱི་དགེ་བའི་རྩ་བ་གང་ཡིན་པ་དག་དང་། ཉན་ཐོས་ཀྱི་ཐེག་པ་པ་སློབ་པ་དང་། མི་སློབ་པ་དེ་དག་གི་དགེ་བའི་རྩ་བ་གང་ཡིན་པ་དེ་དག་ཐམས་ཅད་མངོན་པར་བསྡུས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ན། མི་རྟག་པ་ལ་རྟག་པར་འདུ་ཤེས་ཕྱིན་ཅི་ལོག་པ་དང་། སེམས་ཕྱིན་ཅི་ལོག་པ་དང་། ལྟ་བ་ཕྱིན་ཅི་ལོག་པ་དང་། སྡུག་བསྔལ་བ་ལ་བདེ་ཞེས་བྱ་བ་དང་། བདག་མེད་པ་ལ་བདག་ཅེས་བྱ་བ་དང་། མི་སྡུག་པ་ལ་སྡུག་ཅེས་བྱ་བར་འདུ་ཤེས་ཕྱིན་ཅི་ལོག་པ་དང་། སེམས་ཕྱིན་ཅི་ལོག་པ་དང་། ལྟ་བ་ཕྱིན་ཅི་ལོག་པ་དང་། ཇི་ལྟ་བ་བཞིན་དུ་དེ་ཡང་ཕྱིན་ཅི་ལོག་པར་མི་འགྱུར་གྲང་། ཡང་ན་དངོས་པོ་ཇི་ལྟ་བ་བཞིན་དུ་དམིགས་པ་ཡང་དེ་ཁོ་ན་ལྟ་བུ་ཡིན་ཞིང་། བྱང་ཆུབ་ཀྱང་དེ་ཁོ་ན་བཞིན་ལ་སེམས་ཀྱང་དེ་ཁོ་ན་བཞིན། སྦྱིན་པའི་ཕ་རོལ་ཏུ་ཕྱིན་པ་དང་། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་། བཟོད་པའི་ཕ་རོལ་ཏུ་ཕྱིན་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། བསམ་གཏན་གྱི་ཕ་རོལ་ཏུ་ཕྱིན་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དེ་ཁོ་ན་བཞིན།