བརྩོན་འགྲུས་དང་། བསོད་ནམས་དང་། ཡེ་ཤེས་མི་དམིགས་ཏེ། འཁོར་གསུམ་ཡོངས་སུ་དག་པས་བྱང་ཆུབ་ཀྱི་ཕྱིར། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་སྦྱོང་བར་བྱེད་པ་དང་། བདག་དང་། སེམས་ཅན་དང་། བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་རྣམས་མི་དམིགས་ཏེ། འཁོར་གསུམ་ཡོངས་སུ་དག་པས་བྱང་ཆུབ་ཀྱི་ཕྱིར་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་སྦྱོང་བར་བྱེད་པ་དང་། སེམས་ཅན་ཐམས་ཅད་མི་དམིགས་པས་བྱང་ཆུབ་ཀྱི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་སྦྱོང་བར་བྱེད་པ་དང་། དགེ་བའི་རྩ་བ་ཐམས་ཅད་ཀྱང་ཡོངས་སུ་བསྔོ་བ་དུག་མེད་པ་དང་། ཡོངས་སུ་བསྔོ་བ་བླ་ན་མེད་པ་དང་། ཡོངས་སུ་བསྔོ་བ་མི་མཉམ་པ་དང་མཉམ་པ་དང་། ཡོངས་སུ་བསྔོ་བ་བསམ་གྱིས་མི་ཁྱབ་པ་དང་། ཡོངས་སུ་བསྔོ་བ་མཚུངས་པ་མེད་པ་དང་། ཡོངས་སུ་བསྔོ་བ་དཔག་ཏུ་མེད་པས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་པ་སྟེ། དེ་ནི་འཇིག་རྟེན་ལས་འདས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱའོ། །ཅིའི་ཕྱིར་ན། འཇིག་རྟེན་པ་ཞེས་བྱ། ཅིའི་ཕྱིར་ན། འཇིག་རྟེན་ལས་འདས་པ་ཞེས་བྱ་ཞེ་ན། དེ་ལ་འཇིག་རྟེན་པ་ཞེས་བྱ་བ་ནི། གང་དག་གིས་འཇིག་རྟེན་དུ་འགྱུར་བ་དང་། གང་དག་འཇིག་རྟེན་འགྲུབ་པར་བྱེད་པ་དང་། གང་དག་གིས་འཇིག་རྟེན་དང་མཉམ་པ་དང་། གང་དག་གིས་འཇིག་རྟེན་གྱི་ཕྱིར་སྦྱིན་པ་དང་། གང་དག་གིས་འཇིག་རྟེན་ལས་འབྱུང་བར་མི་འགྱུར་བ་དང་། གང་དག་འཇིག་རྟེན་འབྱུང་བར་འགྱུར་བ་དང་། གང་དག་འཇིག་རྟེན་དུ་འབྱུང་བར་འགྱུར་བ་སྟེ། དེ་དག་ནི་འཇིག་རྟེན་པ་ཞེས་བྱའོ། །དེ་ལ་འཇིག་རྟེན་ལས་འདས་པ་གང་ཞེ་ན། གང་དག་གིས་འཇིག་རྟེན་སྒྲོལ་བ་དང་། གང་དག་འཇིག་རྟེན་སེལ་བར་བྱེད་པ་དང་། འཇིག་རྟེན་གང་དག་གིས་སྒྲོལ་བར་བྱེད་པ་དང་། གང་དག་འཇིག་རྟེན་མ་ཡིན་པར་འགྱུར་བ་དང་། གང་དག་གིས་འཇིག་རྟེན་ལས་འབྱུང་བར་འགྱུར་བ་དང་།