ཐབས་མཁས་པས་སེམས་ཅན་ཕྱིན་ཅི་ལོག་བཞིས་ཕུང་པོ་དག་ལ་མངོན་པར་ཞེན་ཅིང་། མི་རྟག་པ་ལ་རྟག་པར་འདུ་ཤེས་པ་དང་། སྡུག་བསྔལ་ལ་བདེ་བར་འདུ་ཤེས་པ་དང་། བདག་མེད་པ་ལ་བདག་ཏུ་འདུ་ཤེས་པ་དང་། མི་སྡུག་པ་ལ་སྡུག་པར་འདུ་ཤེས་ཤིང་། དངོས་པོ་ལ་མངོན་པར་ཞེན་པ་དག་དངོས་པོ་ལས་རྣམ་པར་འབྱེད་པར་བྱེད་དོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཅི་བྱིས་པ་སོ་སོའི་སྐྱེ་བོ་རྣམས་གང་ལ་གནས་ནས། དངོས་པོའོ། །ཞེས་མངོན་པར་ཞེན་པར་གྱུར་པའི་དངོས་པོ་བྱུང་བའམ། འབྱུང་བ་དེ་བཞིན་ཉིད་དང་། མ་ནོར་བ་དེ་བཞིན་ཉིད་ཅེས་བགྱི་བ་དེ་ལྟ་བུ་མཆིས་ལགས་སམ། གལ་ཏེ་མ་མཆིས་ན་ནི་ལས་གང་གིས་འགྲོ་བ་ལྔའི་འཁོར་བ་ལས་ཡོངས་སུ་ཐར་བར་མི་འགྱུར་བ་དེ་ལྟ་བུའི་ལས་ཀྱང་ཇི་ལྟར་མངོན་པར་འདུ་བགྱིད་པར་འགྱུར་ལགས། བཀའ་སྩལ་པ། རབ་འབྱོར་ཕྱིན་ཅི་ལོག་མ་གཏོགས་པར་གང་ལ་གནས་ནས། བྱིས་པ་སོ་སོའི་སྐྱེ་བོ་རྣམས་ལས་མངོན་པར་འདུ་བྱེད་པའི་དངོས་པོ་ནི་ཐ་ན་སྐྲའི་རྩེ་མོའི་ཆ་ཤས་གཞག་པ་ཙམ་ཡང་མེད་དོ། །རབ་འབྱོར་དེའི་ཕྱིར་ཅི་ནས་ཀྱང་དོན་འདི་ཉིད་རྒྱ་ཆེར་ཡོངས་སུ་རྫོགས་པར་བྱ་བ་དང་། མཁས་པས་ཤེས་པར་བྱ་བའི་ཕྱིར་ཁྱོད་ལ་དཔེས་བཤད་པར་བྱའོ། །རབ་འབྱོར་འདི་ཇི་སྙམ་དུ་སེམས། རྨི་ལམ་རྨི་བ་གང་ལ་གནས་ནས། འདོད་པ་ལྔའི་ཡོན་ཏན་དག་གིས་དགའ་མགུར་སྤྱོད་པར་འགྱུར་ན། རྨི་ལམ་རྨི་བའི་དངོས་པོ་དེ་ལྟ་བུ་འགའ་ཞིག་ཡོད་སྙམ་འམ། གསོལ་པ། བཅོམ་ལྡན་འདས་རྨི་ལམ་ཉིད་ཀྱང་མ་མཆིས་ལགས་ན། རྨི་ལམ་རྨི་བ་གང་ལ་གནས་ནས། འདོད་པ་ལྔའི་ཡོན་ཏན་དག་གིས་དགའ་མགུར་སྤྱོད་པར་འགྱུར་བའི་དངོས་པོ་ལྟ་ག་ལ་མཆིས་ལགས། བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། གང་དག་རྨི་ལམ་ལྟ་བུ་མ་ཡིན་པའི་འདུས་བྱས་སམ། འདུས་མ་བྱས་སམ། ཟག་པ་དང་བཅས་པའམ། ཟག་པ་མེད་པའི་ཆོས་འགའ་ཞིག་ཡོད་སྙམ་འམ། གསོལ་པ། བཅོམ་ལྡན་འདས་གང་དག་རྨི་ལམ་ལྟ་བུ་མ་ལགས་པའི་འདུས་བྱས་སམ། འདུས་མ་བྱས་སམ། ཟག་པ་དང་བཅས་པའམ། ཟག་པ་མ་མཆིས་པའི་ཆོས་ནི་འགའ་ཡང་མ་མཆིས་ལགས་སོ།