།དེ་ཅིའི་ཕྱིར་ཞེ་ན། འདི་ལྟར་ངོ་བོ་ཉིད་གང་གིས་རབ་ཏུ་ཕྱེ་བའི་ངོ་བོ་ཉིད་དེ་དག་ལ་མེད་པའི་ཕྱིར་རོ། །དེ་སེམས་ཀྱི་བརྩོན་འགྲུས་དེ་དང་ལྡན་པས་འཆི་ཀར་ཡང་སེམས་ཅན་རྣམས་ཀྱི་དོན་བྱེད་ལ་སེམས་ཅན་དེ་དག་ཀྱང་མི་དམིགས་སོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡང་ཡོངས་སུ་རྫོགས་པར་བྱེད་ལ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དེ་ཡང་མི་དམིགས་སོ། །སངས་རྒྱས་ཀྱི་ཆོས་རྣམས་ཀྱི་བར་དུ་ཡང་ཡོངས་སུ་རྫོགས་པར་བྱེད་ལ། སངས་རྒྱས་ཀྱི་ཆོས་དེ་དག་ཀྱང་མི་དམིགས་སོ། །སངས་རྒྱས་ཀྱི་ཞིང་ཡང་ཡོངས་སུ་དག་པར་བྱེད་ལ་སངས་རྒྱས་ཀྱི་ཞིང་དེ་ཡང་མི་དམིགས་སོ། །དེ་ལུས་དང་སེམས་ཀྱི་བརྩོན་འགྲུས་དེ་དང་ལྡན་པས་དགེ་བའི་ཆོས་ཐམས་ཅད་ཀྱང་ཡོངས་སུ་འཛིན་ལ་དེ་དག་ལ་ཡང་ཆགས་པར་མི་བྱེད་དེ། དེ་ཆགས་པ་མེད་པས་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་ཞིང་འཇིག་རྟེན་གྱི་ཁམས་ནས་འཇིག་རྟེན་གྱི་ཁམས་སུ་འགྲོ་སྟེ། སེམས་ཅན་རྣམས་ཀྱི་དོན་བྱེད་ཅིང་། རྫུ་འཕྲུལ་གྱི་ཆོ་འཕྲུལ་གང་དང་གང་རྣམ་པར་སྤྲུལ་པར་འདོད་པ། རྫུ་འཕྲུལ་གྱི་ཆོ་འཕྲུལ་དེ་དང་དེ་རྣམ་པར་སྤྲུལ་པར་བྱེད་དོ། །ཡང་ན་ནི་མེ་ཏོག་གི་ཆར་འབེབས་སོ། །ཡང་ན་ནི་སྤོས་ཀྱི་ངད་འགྱེད་པར་བྱེད་དོ། །ཡང་ན་ནི་འབྲུག་སྒྲ་སྒྲོགས་པར་བྱེད་དོ། །ཡང་ན་ནི་གླུ་དབྱངས་སྒྲོགས་པར་བྱེད་དོ། །ཡང་ན་ནི་ས་གཡོ་བར་བྱེད་དོ། །ཡང་ན་ནི་རིན་པོ་ཆེ་སྣ་བདུན་གྱི་ས་གཞི་སྟོན་པར་བྱེད་དོ། །ཡང་ན་ནི་མུན་ནག་གི་སེམས་ཅན་རྣམས་ཀྱི་ཆེད་དུ་བདག་ཉིད་ལས་འོད་འབྱིན་པར་བྱེད་དོ། །ཡང་ན་ནི་སྤོས་གཏོང་བར་བྱེད་དོ། །ཡང་ན་ནི་སྲོག་གཅོད་པ་མེད་པའི་མཆོད་སྦྱིན་བྱེད་དོ། །ཡང་ན་ནི་སེམས་ཅན་མཐའ་ཡས་པ་ལམ་ལ་འཛུད་པར་བྱེད་དོ། །སྲོག་གཅོད་པ་ལས་ཟློག་པར་བྱེད་པ་ནས། ལོག་པར་ལྟ་བའི་བར་དག་ལས་ཟློག་པར་བྱེད་དོ། །ཁ་ཅིག་ལ་ནི་སྦྱིན་པས་ཕན་འདོགས་པར་བྱེད་དོ། །ཁ་ཅིག་ལ་ནི་ཚུལ་ཁྲིམས་ཀྱིས་ཕན་འདོགས་པར་བྱེད་དོ། །ཁ་ཅིག་གི་དོན་དུ་ནི་ཡན་ལག་དང་ཉིང་ལག་ཡོངས་སུ་གཏོང་བར་བྱེད་དོ། །ཁ་ཅིག་ལ་ནི་བུ་དང་ཆུང་མ་ཡོངས་སུ་གཏོང་བར་བྱེད་དོ། །ཁ་ཅིག་ལ་ནི་རྒྱལ་སྲིད། ཁ་ཅིག་གི་དོན་དུ་ནི་བདག་ཉིད་ཡོངས་སུ་གཏོང་བར་བྱེད་དེ། ཐབས་གང་དང་གང་གིས་སེམས་ཅན་རྣམས་ཀྱི་དོན་བྱར་རུང་བའི་ཐབས་དེ་དང་དེས་སེམས་ཅན་རྣམས་ཀྱི་དོན་བྱེད་དོ།