།དེ་ལ་སྤྱོས་ཤིང་བརྒྱད་དམ། བོང་བ་དང་། དབྱུག་པ་དང་། མཚོན་ཆས་བསྣུན་ན། བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར་བརྟག་པར་བྱ་སྟེ། བདག་ལ་སུ་ཞིག་གཤེ་ཞིང་བརྒྱད་ལ། བོང་བ་དང་། དབྱུག་པ་དང་། མཚོན་ཆས་བསྣུན་པར་བྱེད་ཅེས་དེས་ཆོས་རྣམས་ཀྱི་ངོ་བོ་ཉིད་ལ་བརྟག་པར་བྱ་སྟེ་དེ་རྣམས་ཀྱི་ངོ་བོ་ཉིད་རྟོག་པ་ན་ཆོས་རྣམས་ཉིད་ཀྱང་མི་དམིགས་ན། ཆོས་རྣམས་ཀྱི་ངོ་བོ་ཉིད་ལྟ་ག་ལ་ཡོད་དེ་དེ་ལྟར་ཆོས་ཀྱི་ངོ་བོ་ཉིད་ལ་རྟོག་པ་ན་འདི་སྙམ་དུ་སེམས་ཏེ། ང་ལ་གཅོད་པའམ། འབིགས་པ་སུ་ཡོད་སྙམ་མོ། །དེ་དེ་ལྟར་ཆོས་ཀྱི་ངོ་བོ་ཉིད་ལ་རྟོག་པ་ན། མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །དེ་ལ་མི་སྐྱེ་བའི་ཆོས་ལ་བཟོད་པ་ཐོབ་པ་གང་ཞེ་ན། ཉོན་མོངས་པ་མི་སྐྱེ་བ་ཉིད་དང་། ཤེས་པ་གཅད་དུ་མེད་པ་ཉིད་དོ། །བཟོད་པ་འདི་གཉིས་ལ་གནས་ནས་བསམ་གཏན་བཞི་ཡོངས་སུ་རྫོགས་པར་བྱེད་དོ། །ཚད་མེད་པ་བཞི་དང་། གཟུགས་མེད་པའི་སྙོམས་པར་འཇུག་པ་བཞི་དང་། དྲན་པ་ཉེ་བར་གཞག་པ་བཞི་དང་། འཕགས་པའི་ལམ་ཡན་ལག་བརྒྱད་པའི་བར་དང་། རྣམ་པར་ཐར་པའི་སྒོ་གསུམ་དང་། དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཡོངས་སུ་རྫོགས་པར་བྱེད་དོ། །དེ་འཕགས་པ་ཟག་པ་མེད་པའི་ཆོས་འཇིག་རྟེན་ལས་འདས་པའི་ཆོས་ཉན་ཐོས་དང་། རང་སངས་རྒྱས་རྣམས་དང་། ཐུན་མོང་མ་ཡིན་པ་དེ་དག་ལ་གནས་ནས་འཕགས་པའི་མངོན་པར་ཤེས་པ་ཡོངས་སུ་རྫོགས་པར་བྱེད་དོ། །མངོན་པར་ཤེས་པ་དེ་དག་ཡོངས་སུ་རྫོགས་པར་བྱས་ནས་མངོན་པར་ཤེས་པ་དེ་དག་ལ་གནས་ཏེ། ལྷའི་མིག་རྣམ་པར་དག་པས་ཤར་ཕྱོགས་ཀྱི་སངས་རྒྱས་བཅོམ་ལྡན་འདས་རྣམས་མཐོང་ངོ་། །མཐོང་ནས་ཀྱང་སངས་རྒྱས་རྗེས་སུ་དྲན་པ་ཐོབ་པར་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་དེའི་སངས་རྒྱས་རྗེས་སུ་དྲན་པ་རྒྱུན་མི་ཆད་པར་འབྱུང་བར་འགྱུར་རོ། །ཕྱོགས་མཚམས་ཀྱི་བར་དུ་ཡང་དེ་བཞིན་ནོ། །ལྷའི་རྣ་བའི་ཁམས་ཀྱིས་སངས་རྒྱས་བཅོམ་ལྡན་འདས་དེ་དག་གིས་གང་གསུངས་པ་དེ་དག་ཐམས་ཅད་འཛིན་པར་བྱེད་དོ། །བཟུང་ནས་ཀྱང་དེ་བཞིན་ཉིད་དུ་སྒྲུབ་པར་བྱེད་དེ། སེམས་ཅན་རྣམས་ལ་ཡང་དེ་བཞིན་ཉིད་དུ་ཆོས་སྟོན་པར་བྱེད་དོ།