ཁྱིམ་བདག་གི་རིགས་ཤིང་སཱ་ལ་ཆེན་པོ་ལྟ་བུའམ། རྒྱལ་ཆེན་བཞིའི་རིས་ཀྱི་ལྷའམ། སུམ་ཅུ་རྩ་གསུམ་པའམ། འཐབ་བྲལ་བའམ། དགའ་ལྡན་ནམ། འཕྲུལ་དགའ་འམ། གཞན་འཕྲུལ་དབང་བྱེད་དམ། ཚངས་རིས་སམ། ཚངས་པའི་མདུན་ན་འདོན་པའམ། ཚངས་འཁོར་རམ། འོད་ཆུང་ངམ། ཚད་མེད་འོད་དམ། འོད་གསལ་ལམ། དགེ་ཆུང་ངམ། ཚད་མེད་དགེའམ། དགེ་རྒྱས་སམ། འབྲས་བུ་ཆེ་བའམ། འདུ་ཤེས་མེད་པའི་སེམས་ཅན་ནམ། མི་ཆེ་བའམ། མི་གདུང་བའམ། གྱ་ནོམ་སྣང་ངམ། ཤིན་ཏུ་མཐོང་ངམ། འོག་མིན་ནམ། ནམ་མཁའ་མཐའ་ཡས་སྐྱེ་མཆེད་དམ། རྣམ་ཤེས་མཐའ་ཡས་སྐྱེ་མཆེད་དམ། ཅི་ཡང་མེད་པའི་སྐྱེ་མཆེད་དམ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དམ། རྒྱུན་དུ་ཞུགས་པའི་འབྲས་བུའམ། ལན་ཅིག་ཕྱིར་འོང་བའི་འབྲས་བུའམ། ཕྱིར་མི་འོང་བའི་འབྲས་བུའམ། དགྲ་བཅོམ་པ་ཉིད་དམ། རང་བྱང་ཆུབ་བམ། འཁོར་ལོས་སྒྱུར་བའི་རྒྱལ་སྲིད་དམ། རྒྱལ་སྲིད་ལ་དབང་བྱེད་པ་ལ་ཡང་མཆོག་ཏུ་འཛིན་པར་མི་བྱེད་དེ། གཞན་དུ་ན་སེམས་ཅན་ཐམས་ཅད་དང་ཐུན་མོང་དུ་བྱས་ནས། མཚན་མ་མེད་པ་དང་། དམིགས་སུ་མེད་པ་དང་། གཉིས་སུ་མེད་པས་འཇིག་རྟེན་གྱི་ཐ་སྙད་ཀྱིས་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་ཀྱིས་དོན་དམ་པར་ནི་མ་ཡིན་ནོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པ་དེ་དང་། ཐབས་ལ་མཁས་པ་དེས་བསམ་གཏན་བཞི་རོ་མྱང་བ་མེད་པའི་ཚུལ་གྱིས་སྐྱེད་པར་བྱེད་དོ། །ལྷའི་མིག་རྣམ་པར་སྨིན་པ་ལས་བྱུང་བ་གང་གིས། ཤར་ཕྱོགས་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ། འཚོ་ཞིང་བཞེས་པ་དེ་དག་མཐོང་ལ། དེའི་མཐོང་བ་དེ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཀྱི་བར་དུ་ཆུད་ཟ་བར་མི་འགྱུར་བ་དང་། ལྷོ་དང་། ནུབ་དང་། བྱང་དང་། ཕྱོགས་མཚམས་ཀྱི་འཇིག་རྟེན་གྱི་ཁམས་དག་ན། སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་བཞེས་པ་དེ་དག་ཀྱང་མཐོང་ལ། ནམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་ཀྱི་བར་དུ་དེའི་མཐོང་བ་དེ་ཆུད་མི་ཟ་བར་འགྱུར་བའི་ལྷའི་མིག་མངོན་པར་སྒྲུབ་པར་བྱེད་དོ།