།རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདག་ཉིད་ཀྱང་དགེ་བའི་ཆོས་རྣམས་ལ་བརྩོན་པར་བྱེད་ལ་གཞན་དག་ཀྱང་བརྩོན་འགྲུས་ཡང་དག་པར་འཛིན་དུ་འཇུག་སྟེ། དེ་བཞིན་དུ་རྗེས་སུ་དགའ་བར་བྱེད་པའི་བར་དུ་སྦྱར་རོ། །དེའི་ངོ་བོ་ཉིད་མེད་པའི་བར་དུ་ཡང་དེ་བཞིན་དུ་སྦྱར་རོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བདག་ཉིད་ཀྱང་བསམ་གཏན་ལ་སྙོམས་པར་འཇུག་ཅིང་ཚད་མེད་པ་རྣམས་དང་། གཟུགས་མེད་པའི་སྙོམས་པར་འཇུག་པ་རྣམས་ལ་སྙོམས་པར་འཇུག་ལ། གཞན་དག་ཀྱང་གཟུགས་མེད་པའི་སྙོམས་པར་འཇུག་པའི་བར་དག་ལ་འགོད་པར་བྱེད་ཅིང་། བསམ་གཏན་དང་། ཚད་མེད་པ་དང་། གཟུགས་མེད་པའི་སྙོམས་པར་འཇུག་པ་རྣམས་ཀྱི་བསྔགས་པ་ཡང་རྗོད་པར་བྱེད་དོ། །གཞན་གང་དག་བསམ་གཏན་དང་། ཚད་མེད་པ་དང་། གཟུགས་མེད་པའི་སྙོམས་པར་འཇུག་པ་རྣམས་ལ་སྙོམས་པར་འཇུག་པ་གང་ཡིན་པ་དེ་དག་གི་བསྔགས་པ་ཡང་རྗོད་པར་བྱེད་པ་ནས་རྗེས་སུ་དགའ་བར་བྱེད་པའི་བར་དུ་དེ་བཞིན་དུ་སྦྱར་རོ། །དེ་བསམ་གཏན་དེ་དག་དང་། ཚད་མེད་པ་དང་། གཟུགས་མེད་པའི་སྙོམས་པར་འཇུག་པ་དེ་དག་ལ་གནས་ནས། སེམས་ཅན་རྣམས་སྦྱིན་པས་ཚིམ་པར་བྱེད། ཚུལ་ཁྲིམས་ལ་འགོད་པར་བྱེད། བཟོད་པ་ལ་འགོད་པར་བྱེད། བརྩོན་འགྲུས་ལ་འགོད་པར་བྱེད། ཏིང་ངེ་འཛིན་ལ་འགོད་པར་བྱེད། ཤེས་རབ་ལ་འགོད་པར་བྱེད། རྣམ་པར་གྲོལ་བ་ལ་འགོད་པར་བྱེད། རྣམ་པར་གྲོལ་བའི་ཡེ་ཤེས་མཐོང་བ་ལ་འགོད་པར་བྱེད་དོ། །དེ་རྣམ་པར་གྲོལ་བའི་ཡེ་ཤེས་མཐོང་བ་དང་ལྡན་པ་དེས་ཉན་ཐོས་དང་། རང་སངས་རྒྱས་ཀྱི་ས་ལས་འདའ་བར་འགྱུར་རོ། །འདས་ནས་ཀྱང་རྣམ་པར་གྲོལ་བའི་ཡེ་ཤེས་མཐོང་བ་དེས་བྱང་ཆུབ་སེམས་དཔའི་སྐྱོན་མེད་པ་ལ་འཇུག་པ་དང་། རྣམ་པ་ཐམས་ཅད་མཁྱེན་པ་ཉིད་ཐོབ་པ་ནས། དེའི་ངོ་བོ་ཉིད་མེད་པའི་བར་དུ་དེ་བཞིན་དུ་སྦྱར་རོ། །རབ་འབྱོར་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་དང་པོ་བསྐྱེད་པ་ནས་བཟུང་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་ཅིང་། སེམས་ཅན་རྣམས་སྦྱིན་པས་ཚིམ་པར་བྱེད། ཚུལ་ཁྲིམས་ལ་འགོད་པར་བྱེད། བཟོད་པ་ལ་འགོད་པར་བྱེད། བརྩོན་འགྲུས་ལ་འགོད་པར་བྱེད། ཏིང་ངེ་འཛིན་ལ་འགོད་པར་བྱེད། ཤེས་རབ་ལ་འགོད་པར་བྱེད། རྣམ་པར་གྲོལ་བ་ལ་འགོད་པར་བྱེད། རྣམ་པར་གྲོལ་བའི་ཡེ་ཤེས་མཐོང་བ་ལ་འགོད་པར་བྱེད་དོ།