།ཚོར་བར་འདུ་ཤེས་པ་དང་། འདུ་ཤེས་སུ་འདུ་ཤེས་པ་དང་། འདུ་བྱེད་རྣམས་སུ་འདུ་ཤེས་པ་དང་། རྣམ་པར་ཤེས་པར་འདུ་ཤེས་པ་དང་། མིག་ཏུ་འདུ་ཤེས་པ་ནས་ཡིད་དུ་འདུ་ཤེས་པའི་བར་དང་། གཟུགས་སུ་འདུ་ཤེས་པ་ནས་ཆོས་སུ་འདུ་ཤེས་པའི་བར་དང་། དེ་བཞིན་དུ་སྦྱར་ཏེ། སངས་རྒྱས་སུ་འདུ་ཤེས་པ་དང་། བྱང་ཆུབ་ཏུ་འདུ་ཤེས་པ་དང་། འདུས་བྱས་ཀྱི་ཁམས་སུ་འདུ་ཤེས་པ་དང་། འདུས་མ་བྱས་ཀྱི་ཁམས་སུ་འདུ་ཤེས་པ་དང་། རབ་འབྱོར་འདུ་ཤེས་ཇི་སྙེད་པ་ཐམས་ཅད་དང་། འདུ་ཤེས་མེད་པ་ཇི་སྙེད་པ་དེ་དག་ཐམས་ཅད་ནི་གཉིས་སོ། །ཇི་ཙམ་དུ་གཉིས་ཡོད་པ་དེ་ཙམ་དུ་དངོས་པོ་ཡིན་ནོ། །ཇི་ཙམ་དུ་དངོས་པོ་ཡོད་པ་དེ་ཙམ་དུ་འདུ་བྱེད་དོ། །ཇི་ཙམ་དུ་འདུ་བྱེད་ཡོད་པ་དེ་ཙམ་དུ་སེམས་ཅན་རྣམས་སྐྱེ་བ་དང་། རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། འཁྲུག་པ་རྣམས་ལས་ཡོངས་སུ་མི་འགྲོལ་ལོ། །རབ་འབྱོར་རྣམ་གྲངས་དེས་ན་ཁྱོད་ཀྱིས་གཉིས་ཀྱི་འདུ་ཤེས་ཅན་ལ་ནི་སྦྱིན་པ་མེད་དོ། །ཚུལ་ཁྲིམས་མེད་དོ། །བཟོད་པ་མེད་དོ། །བརྩོན་འགྲུས་མེད་དོ། །བསམ་གཏན་མེད་དོ། །ཤེས་རབ་མེད་དོ། །ལམ་མེད་དོ། །མངོན་པར་རྟོགས་པ་མེད་དོ། །ཐ་ན་འཐུན་པའི་བཟོད་པ་ཡང་མེད་ན། གཟུགས་ཡོངས་སུ་ཤེས་པ་ནས་རྣམ་པར་ཤེས་པའི་བར་དུ་ཡོངས་སུ་ཤེས་པ་ལྟ་ག་ལ་ཡོད་ཅེས་དེ་ལྟར་རིག་པར་བྱ་སྟེ། རྣམ་པ་ཐམས་ཅད་མཁྱེན་པ་ཉིད་ཤེས་པའི་བར་དུ་ཡང་དེ་བཞིན་དུ་སྦྱར་རོ། །གང་ལ་ལམ་བསྒོམ་པ་མེད་པ་དེ་ལ་ནི་རྒྱུན་ཏུ་ཞུགས་པའི་འབྲས་བུ་ནས། དགྲ་བཅོམ་པ་ཉིད་ཀྱི་བར་དང་། རང་བྱང་ཆུབ་དང་། བག་ཆགས་ཀྱི་མཚམས་སྦྱོར་བ་ཐམས་ཅད་སྤོང་བའི་བར་དུ་ཡང་ག་ལ་ཡོད། ཤེས་རབ་ཀྱི་ཕ་རོལ་ཏུ་ཕྱིན་པ་ཁྲི་བརྒྱད་སྟོང་པ་ལས། ལམ་བསྒོམ་པ་བསྟན་པའི་ལེའུ་ཞེས་བྱ་སྟེ་དྲུག་ཅུ་རྩ་དགུ་པའོ།། །།དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་དངོས་པོའི་འདུ་ཤེས་ཅན་ལ་འཐུན་པའི་བཟོད་པ་ཡང་མ་མཆིས་ན། ཐོབ་པ་ལྟ་ག་ལ་མཆིས། མངོན་པར་རྟོགས་པ་ལྟ་ག་ལ་མཆིས་ཏེ། མ་མཆིས་ན་ཅི་དངོས་པོ་མ་མཆིས་པའི་འདུ་ཤེས་ཅན་ལ་འཐུན་པའི་བཟོད་པ་མཆིས་ལགས་སམ།