Degé Kangyur volume 2, F.6.a

བདག་གི་མ་འཇིག་རྟེན་གྱི་ཁམས་འོད་ཟེར་ཅན་དུ་སྐྱེས་ཏེ། དེ་ཡང་བཅོམ་ལྡན་འདས་ཀྱིས་འདུལ་བར་འགྱུར་ལགས་ན། བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ་གདུལ་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་སུའི་རྫུ་འཕྲུལ་གྱིས་དོང་། བཅོམ་ལྡན་འདས་བདག་གིའོ། །​དེ་ནས་བཅོམ་ལྡན་འདས་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་རི་རབ་ཀྱི་རྩེ་མོ་ལ་གོམ་པ་བོར་ཞིང་གཤེགས་པ་དང་། ཞག་བདུན་གྱིས་འཇིག་རྟེན་གྱི་ཁམས་འོད་ཟེར་ཅན་དུ་བྱོན་ཏོ། །བུ་མོ་བཟང་མོ་དེས་ཚེ་དང་ལྡན་པ་མཽད་གལ་གྱི་བུ་རྒྱང་རིང་པོ་ཁོ་ན་ནས་མཐོང་ངོ་། །​མཐོང་ནས་ཀྱང་དགའ་བ་དང་བཅས་པས་དེའི་དྲུང་དུ་སོང་སྟེ་སྨྲས་པ། ཀྱེ་མའོ་ཡུན་རིང་ཞིག་ལོན་ནས་བུ་མཐོང་ངོ་། །​ཀྱེ་མའོ་ཡུན་རིང་མོ་ཞིག་ལོན་ནས་བུ་མཐོང་ངོ་། །​དེ་ནས་སྐྱེ་བོའི་ཚོགས་ཆེན་པོས་སྨྲས་པ། ཤེས་ལྡན་དག་རབ་ཏུ་བྱུང་བ་འདི་ནི་རྒན་ན་ཇི་ལྟར་བུ་མོ་འདི་དེའི་མ་ཡིན། ཚེ་དང་ལྡན་པ་མཽད་གལ་གྱི་བུ་ཆེན་པོས་སྨྲས་པ། ཤེས་ལྡན་དག་ཁོ་བོའི་ལུས་འདི་འདིས་བསྐྱེད་དེ། དེས་ན་ཁོ་བོའི་མ་ཡིན་ནོ། །​དེ་ནས་བཅོམ་ལྡན་འདས་ཀྱིས་བུ་མོ་བཟང་མོ་དེའི་བསམ་པ་དང་། བག་ལ་ཉལ་དང་། ཁམས་དང་། རང་བཞིན་མཁྱེན་ནས་དེ་དང་མཐུན་པའི་འཕགས་པའི་བདེན་པ་བཞི་རྟོགས་པར་འགྱུར་བའི་ཆོས་བཤད་པ་མཛད་དེ། དེ་ཐོས་ནས་བུ་མོ་བཟང་མོ་དེས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ། དེས་བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ་ཞེས་བྱ་བ་ནས་ལྷ་དང་མི་རྣམས་སུ་རབ་ཏུ་བཞག་ཅེས་བྱ་བའི་བར་གོང་མ་བཞིན་ནོ། །​ཡང་སྨྲས་པ། ཉེས་པ་མང་པོར་ལྡན་པས་མི་བཟད་པའི། །ངན་སོང་ལམ་ནི་ཁྱོད་ཀྱི་མཐུས་བཅད་དེ། །​མཐོ་རིས་འགྲོ་བ་བསོད་ནམས་བཟང་ལྡན་ཕྱེ། །​མྱ་ངན་འདས་པའི་ལམ་ཡང་བདག་གིས་ཐོབ། །​ཁྱེད་ལ་བརྟེན་ནས་ཤིན་ཏུ་རྣམ་དག་མིག །​ཉེས་དང་བྲལ་བས་དག་པ་དེང་འདིར་ཐོབ། །​འཕགས་པ་དགྱེས་པའི་གོ་འཕང་ཞི་ཐོབ་



The English translation of this folio by 84000 Translating the words of the Buddha can be found at:
https://read.84000.co/translation/toh1-6.html?part=UT22084-001-006-7906#UT22084-001-006-7906