ཁྱིམ་བདག་རྣམས་ལ་འདི་སྐད་ཅེས་སྨྲས་སོ། །དགེ་སྦྱོང་གཽ་ཏ་མ་འདོད་ཞེན་ཆེའམ་འདོད་ཞེན་ཆུང་བ་དང་། དེའི་ཉན་ཐོས་རྣམས་འདོད་ཞེན་ཆེའམ། འདོད་ཞེན་ཆུང་བ་ངས་ཁྱེད་ཅག་ཡིད་ཆེས་པར་བྱའོ། །དེ་ནས་བྲམ་ཟེ་སྨྲ་འདོད་ཀྱི་སེང་གེས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤེས་ལྡན་གཽ་ཏ་མ་དགེ་སློང་གི་དགེ་འདུན་དང་ཐབས་ཅིག་ལ་བདག་གིས་བཅའ་བ་བུ་རམ་ཞིག་འབུལ་ཞིང་མཆིས་ན་གནང་བར་མཛད་དུ་གསོལ། བཅོམ་ལྡན་འདས་ཀྱིས་བྲམ་ཟེ་སྨྲ་འདོད་ཀྱི་སེང་གེ་ལ་ཅང་མི་གསུང་བས་གནང་ངོ་། །དེ་ནས་བྲམ་ཟེ་སྨྲ་འདོད་ཀྱི་སེང་གེས་བཅོམ་ལྡན་འདས་ཅང་མི་གསུང་བས་གནང་བར་རིག་ནས། བཅོམ་ལྡན་འདས་ཀྱི་སྤྱན་སྔ་ནས་སོང་ངོ་། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་བྲམ་ཟེ་སྨྲ་འདོད་ཀྱི་སེང་གེ་ཀླན་ཀ་ཚོལ་བས་སངས་རྒྱས་ལ་སོགས་པ་དགེ་སློང་གི་དགེ་འདུན་རྣམས་བཅའ་བ་བུ་རམ་ལ་སྤྱན་དྲངས་ཀྱིས། ཁྱེད་ཅག་ལས་གང་གིས་ཇི་ཙམ་ཡོག་པ་དེས་དེ་ཙམ་ཞིག་བླང་བར་བྱའོ། །བྲམ་ཟེ་སྨྲ་འདོད་ཀྱི་བུ་སེང་གེ་ལ་བུ་རམ་འཚོང་བའི་ཁང་པ་ལྔ་བརྒྱ་ཡོད་པ་ནས་དེས་བུ་རམ་གྱི་ཁང་པ་རེ་རེ་ནས་བུ་རམ་གྱི་སྣོད་བླངས་ཏེ། བུ་རམ་གྱི་སྣོད་ལྔ་བརྒྱ་ཁྱེར་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤེས་ལྡན་གཽ་ཏ་མ་བུ་རམ་བསྡོགས་ལགས་ན། ཉན་ཐོས་ཀྱི་དགེ་འདུན་དང་ཐབས་ཅིག་ཏུ་བཞུགས་ཏེ། ལོངས་སྤྱད་དུ་གསོལ། དེ་ནས་བཅོམ་ལྡན་འདས་ཕྱག་དང་ལྷུང་བཟེད་བཅབས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ། །དེ་ནས་བྲམ་ཟེ་སྨྲ་འདོད་ཀྱི་སེང་གེས་བུ་རམ་གྱི་སྣོད་ཅིག་བླངས་ཏེ་བྲིམ་པར་བརྩམས་པ་དང་། བཅོམ་ལྡན་འདས་ཀྱིས་ཇི་ལྟར་དགེ་སློང་གི་དགེ་འདུན་གྱི་བར་དུ་བྲིམས་ཀྱང་ལྷག་པས་ཐམས་ཅད་དེ་ཁོ་ན་བཞིན་དུ་འདུག་པ་དེ་ལྟར་བྱིན་གྱིས་བརླབས་སོ། །དེ་ནས་བྲམ་ཟེ་སྨྲ་འདོད་ཀྱི་སེང་གེ་མངོན་པར་དད་པར་གྱུར་ཏོ།