།དེ་ནས་སྐྱེས་བུ་གཡོན་ཅན་པད་མའི་རྩ་ལག་གི་བློ་སྐྱེས་པ་རབ་ཏུ་བྱུང་བ་དཀའ་ཐུབ་ཅན་སྐྱོན་མེད་པ་ཉེས་པ་མི་བྱེད་པ་འདི་ལ་ཡང་དག་པ་མ་ཡིན་པས་སྐུར་བ་བཏབ་པས་ད་འདི་གསད་པ་ལ་ཐུག་ན། བདག་གིས་འདི་ཡལ་བར་དོར་བ་ནི་བདག་གི་ཆ་མ་ཡིན་ནོ་སྙམ་དུ་བསམས་ནས་སླར་ལོག་སྟེ། རྒྱལ་པོའི་དྲུང་དུ་སོང་ནས་རྐང་པ་གཉིས་ལ་གཏུགས་ཏེ་སྨྲས་པ། ལྷ་རབ་ཏུ་བྱུང་བ་འདིས་ནི་ལས་འདི་མ་བགྱིས་ཏེ། སྡིག་པའི་ལས་འདི་ནི་བདག་གིས་བགྱིས་ཀྱིས་རབ་ཏུ་བྱུང་བ་འདི་གཏང་བར་གསོལ། དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་སྐྱེས་བུ་གཡོན་ཅན་པད་མའི་རྩ་ལག་གང་ཡིན་པ་དེ་ནི་ང་ཉིད་ཡིན་ཏེ། ངས་རང་སངས་རྒྱས་ལ་ཡང་དག་པར་མ་ཡིན་པས་སྐུར་པ་བཏབ་པ་གང་ཡིན་པ་དེའི་ལས་ཀྱི་རྣམ་པར་སྨིན་པས་ང་ལོ་མང་པོ་དང་ཞེས་བྱ་བ་ནས། སེམས་ཅན་དམྱལ་བ་རྣམས་སུ་བཙོས་སོ་ཞེས་བྱ་བའི་བར་གོང་མ་བཞིན་དུའོ། །ལས་ཀྱི་ལྷག་མ་དེ་ཁོ་ནས་ད་ལྟར་ང་མངོན་པར་རྫོགས་པར་བྱང་ཆུབ་པ་ན་ཡང་བྲམ་ཟེའི་བུ་མོ་རྩྭ་མིས་ཡང་དག་པ་མ་ཡིན་པས་སྐུར་པ་བཏབ་སྟེ། འདི་ནི་ཐུན་མོང་མ་ཡིན་པའོ། །བཙུན་པ་བཅོམ་ལྡན་འདས་ཀྱིས་ཕྲིན་ལས་ཅི་ཞིག་མཛད་ན། ཕྲིན་ལས་དེའི་རྣམ་པར་སྨིན་པས་ཡུལ་དགྲ་མཐར་དགེ་སློང་གཉིས་ཀྱིས་ལྔ་བརྒྱར་མ་ཚང་བའི་དགེ་སློང་རྣམས་དང་ཐབས་ཅིག་ནས་རུལ་གསོལ་ལ། ཚེ་དང་ལྡན་པ་ཤཱ་རིའི་བུ་དང་། མཽད་གལ་གྱི་བུ་གཉིས་ནི་ལྷའི་ཞལ་ཟས་ལ་ལོངས་སྤྱོད་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་བཞིན་གཤེགས་པ་ཉིད་ཀྱིས་སྔོན་གྱི་ཚེ་རབས་གཞན་རྣམས་སུ་ལས་རྣམས་བྱས་ཤིང་བསགས་པ་ཞེས་བྱ་བ་ནས། འབྲས་བུ་དག་ཏུ་འགྱུར་བ་ཉིད་ཅེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་སྐྱེ་དགུ་རྣམས་ཀྱི་ཚེ་ལོ་བརྒྱད་ཁྲི་ཐུབ་པ་ན་འཇིག་རྟེན་དུ་སྟོན་པ་རྣམ་པར་གཟིགས་ཞེས་བྱ་བ་ཞིག་བྱུང་ནས་ཞེས་བྱ་བ་ནས། སངས་རྒྱས་བཅོམ་ལྡན་འདས་ཞེས་བྱ་བའི་བར་གོང་མ་བཞིན་དུའོ། །དེ་འཁོར་དྲུག་ཁྲི་དང་ལྗོངས་རྒྱུ་ཞིང་གཤེགས་པ་ན། རྒྱལ་པོའི་ཕོ་བྲང་བ་ཤེས་ལྡན་དུ་བྱོན་ཏོ།