དེ་རླུང་ཤས་ཆེ་བའི་སྙུན་གྱིས་ཐེབས་ནས་དེས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་སོང་ལ་རྫ་མཁན་ཡངས་པའི་འོད་ལས་མར་དང་། ཏིལ་མར་དང་། བུ་རམ་ཆུ་ཁྱེར་ཏེ་ཤོག་ཤིག །བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལས་མཉན་ནས་རྫ་མཁན་ཡངས་པའི་འོད་གང་ན་བ་དེར་སོང་སྟེ་ཕྱིན་པ་དང་། རྫ་མཁན་ཡངས་པའི་འོད་ལ་འདི་སྐད་ཅེས་སྨྲས་སོ། །ཡངས་པའི་འོད་ཤེས་པར་གྱིས་ཤིག་བཅོམ་ལྡན་འདས་རླུང་ཤས་ཆེ་བའི་སྙུན་གྱིས་ཐེབས་ཏེ། དེ་ལ་མར་དང་། ཏིལ་མར་དང་བུ་རམ་ཆུ་དགོས་སོ། །དེ་ནས་རྫ་མཁན་ཡངས་པའི་འོད་ཀྱིས་ཚེ་དང་ལྡན་པ་ཀུན་དགའ་བོ་ལས་མཉན་ནས་མར་དང་། ཏིལ་མར་དང་། བུ་རམ་ཆུ་ཁྱེར་ཏེ་བུ་དང་ལྷན་ཅིག་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་གང་ན་བ་དེར་དོང་སྟེ་ཕྱིན་པ་དང་། མར་དང་། ཏིལ་མར་གྱིས་བཅོམ་ལྡན་འདས་ཀྱི་སྐུ་བྱུགས་ནས་ཆུ་འཇམ་པོས་སྐུ་ཁྲུས་བྱས་ཏེ། བུ་རམ་ཆུའི་བཏུང་བ་གསོལ་ཏོ། །དེས་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་བཟོད་ཅིང་འཚོ་བར་གྱུར་ཏོ། །དེ་ནས་རྫ་མཁན་ཡངས་པའི་འོད་ཀྱིས་དེའི་ཞབས་གཉིས་ལ་གཏུགས་ནས་སྨོན་ལམ་གདབ་པར་བརྩམས་པ། བདག་ཀྱང་རབ་ཏུ་སྦྱིན་པ་འདི་ཡིས་ཤཱཀྱའི་རིགས་སྐྱེས་པ། །ཡོན་ཏན་རིགས་དང་རུས་དག་མཉམ་པའི་སངས་རྒྱས་ཉིད་གྱུར་ཅིང་། །བདག་གིས་ཚངས་པའི་འཇིག་རྟེན་བར་གྱི་ཉམ་ཐག་འཆི་བ་ཡི། །ཕ་རོལ་ཞི་བ་རྒྱ་ཆེན་འཇིགས་པ་མེད་པ་སྒྲོལ་བར་ཤོག །དེའི་བུས་ཀྱང་སྨོན་ལམ་བཏབ་པ། བདག་ཀྱང་ལས་འདིས་ན་གཟུགས་མེད་པའི་ཆོས་རྣམས་རྟོགས་པ་དང་། བཅོམ་ལྡན་འདས་ཀྱི་རིམ་གྲོ་བྱེད་པར་གྱུར་ཅིག །ཅེས་བྱས་སོ། །རྒྱལ་པོ་ཆེན་པོ་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྫ་མཁན་ཡངས་པའི་འོད་གང་ཡིན་པ་དེ་ནི་ང་ཉིད་ཡིན་ཏེ། དེར་ངས་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ཐོག་མར་བསོད་སྙོམས་ཕུལ་ལོ། །དེའི་ཚེ་དེའི་དུས་ཀྱི་བུ་གང་ཡིན་པ་དེ་ནི་ཀུན་དགའ་བོ་ཡིན་ནོ།། །།འདུལ་བ་གཞི། བམ་པོ་ལྔ་བཅུ་རྩ་གཅིག་པ། བཙུན་པ་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བའི་སླད་དུ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་བསྙེན་བཀུར་བགྱིས་ལགས།