གླང་པོ་ཆེའི་འདུལ་མཁན་ལ་སྨྲས་པ། ཀྱེ་གླང་པོ་འདུལ་མཁན་ནམ་མཁའ་འགུལ་བ་འདྲ་ཞིང་ཕྱོགས་ཀུན་མྱུར་དུ་འདུ་བར་འགྲོ་བ་འདྲ། །ས་ནི་མཐའ་དག་འཁོར་ལོ་བཞིན་འཁོར་ཤིང་རྣམས་མཁའ་ལ་འཁོར་བ་འདྲ། །གླང་པོའི་དབང་པོ་གངས་རི་འགྲོ་བ་ལྟ་བུ་འདི་རྒྱུག་མཐོང་ནས་ནི། །རི་བོ་འདི་རྒྱུག་སྙམ་ནས་རི་རྣམས་གྱ་ཙོམ་མྱུར་དུ་རྒྱུག་པ་འདྲ། །ཀྱེ་གླང་པོ་ཆེ་འདུལ་མཁན་གླང་པོ་ཆེའི་དབང་པོ་ཐུལ་ཅིག་ཐུལ་ཅིག །གླང་ཆེན་དབང་པོ་ཚར་གཅད་པར། །བཟང་པོ་རབ་ཏུ་འབད་པར་གྱིས། །གླང་ཆེན་གཉེའུ་རེངས་ཁྱེར་བ་ཡིས། །ཁོ་བོ་ཅིར་འགྱུར་གཏོལ་མེད་ཁྱེར། །གླང་པོ་ཆེ་འདུལ་བས་སྨྲས་པ། ལྷ་དྲང་སྲོང་དམ་པས་སྨྲས་པའི་གསང་སྔགས་བཟླས་བགྱི་ཞིང་། །འདི་ལ་ལྕགས་ཀྱུས་ཚར་བཅད་འབད་པ་ཡང་བགྱི་ན། །འཆི་བར་ངེས་པ་རྣམས་ཀྱི་ཚེ་ཡིས་སྨན་བཞིན་དུ། །གླང་པོ་འདི་ནི་བདག་སྟོབས་ཟིལ་གྱིས་མནན་ནས་མཆི། །མི་ཡི་དབང་པོ་ལྕགས་ཀྱུ་འམ། །ཞགས་པ་འམ་ཡང་ན་ལྕག་གིས་ཀྱང་། །འདོད་ཆགས་གཉེའུ་རེངས་ཁྱེར་བའི་སེམས། །ཚར་གཅད་ནུས་པ་མ་ལགས་སོ། །འདོད་ཆགས་སེམས་ཀྱི་ཟུག་རྔུ་ནི། །ཇི་ཞིག་ལྟར་ན་སྐྱེ་འགྱུར་ཏེ། །ཚུལ་འགའ་ཞིག་གིས་རྒྱས་འགྱུར་ལ། །འགའ་ཞིག་གིས་ཀྱང་ཞི་བར་འགྱུར། །གང་གི་ཚེ་གླང་པོའི་འདུལ་མཁན་དེས་གླང་པོ་ཆེ་དམ་པ་དེ་གནས་ཐམས་ཅད་དུ་བཟློག་པར་མ་ནུས་པ་དེའི་ཚེ། རྒྱལ་པོ་ལ་སྨྲས་པ། ལྷ་གླང་པོ་ཆེ་འདི་ནི་འཁྲུལ་གྱིས་ཤིང་གི་ཡལ་ག་ལ་འཇུས་མཛོད་ཅིག །དེ་ནས་རྒྱལ་པོ་དང་འདུལ་མཁན་ཤིང་གི་ཡལ་ག་ལ་འཇུས་ཏེ་འདུག་གོ། །དེ་ནས་དིའུ་ཤི་བ་ལས་ཐར་ཏེ་བདེ་བར་གྱུར་ནས་རྒྱལ་པོས་འདུལ་མཁན་ལ་སྨྲས་པ། ཁྱོད་ཀྱིས་གླང་པོ་ཆེ་དམ་པ་མ་དུལ་བར་ང་ལ་ཕུལ་ལོ། །དེས་སྨྲས་པ། ལྷ་འདི་བདག་གིས་ཤིན་ཏུ་དུལ་བར་བགྱིས་ཏེ། འོན་ཀྱང་ནགས་ཀྱི་བལ་གླང་མོའི་དྲི་ཚོར་ནས་ཉན་དུ་མ་བཏུབ་ལགས་སོ། །ལྷ་དེ་ལྟ་ལགས་མོད་ཀྱི་དཔྱད་དྲན་ནས་རིང་པོ་མི་ཐོགས་པར་མཆི་བར་འགྱུར་རོ། །དེ་ནས་གླང་པོ་ཆེ་དེ་མྱོས་པ་དང་བྲལ་བར་གྱུར་ནས་ཞག་བདུན་ལོན་པ་དང་དཔྱད་རྗེས་སུ་དྲན་ནས་རང་ཉིད་གནས་སུ་འོངས་ཏེ་འདུག་གོ། །དེ་ནས་གླང་པོ་ཆེ་འདུལ་མཁན་གྱིས་རིངས་པ་རིངས་པར་རྒྱལ་པོ་ལ་སྨྲས་པ།